Saattuaqassuseq suli appasittumiittuarsinnarpoq Saqqummersinneqarfia 21.11.2012

Pinngortitaleriffik ukioq mannamiit saattuat pillugit ukiunut marlunnut atuuttussamik siunnersuivoq. Taamaaliornikkut saattuarniartartut periarfissaqalissapput siunissamut ungasinnerulaartumut pilersaarusiorsinnaanissamut. Misissuisarnernit saattuarniartartullu nalunaarsuutaannit paasissutissat takutissappassuk saattuaqassuseq aappaagu allannguuteqarujussuartoq, taava Pinngortitaleriffik siunnersuinerminik 2013-imi allannguuteqartitsissaaq.

Saattuat pillugit biologit 2013 aamma 2014-imi siunnersuinerat 2012-imut sanilliullugu allannguuteqanngilaq. Aqutsiveqarfinni tamaginni tamakkerlugit 2.100 tonsit saattuartassiissutigineqarsinnaasutut innersuussutigineqarput. Pinngortitaleriffimmeersut misissuisarnerminnit paasissutissaataasa kiisalu saattuarniarnermit nalunaarsuutit paasinarsisippaat saattuaqassuseq suli appasittumiittuarsinnartoq.

Pinngortitaleriffiup kaammattuutigaa Holsteinborg Dyb-ip suli saattuarniarfioqqusaanngikkallarnissaa, tamaani saattuaqassuseq suli appasittumiimmat. Saattuaqarfinnik aalisarfioqqusaajunnaartitsisarnerup peqassutsimut iluaqutaasarnera allani misilittagaasartut takutippaat, kisiannili Holsteinborg Dyb-imi matoqqatitsineq malunnaataasumik suli allannguuteqartitsinngilaq. Paasissutissanik sukumiinerusunik pissarsiniartunut Saattuat takkuteqqissinnaapput takkunnissaannulli piffissaq sivisussaaq innersuussutigineqarpoq.

Pinngortitaleriffimmeersut Qeqartarsuup Tunuani misissuisarnerisa takutippaat tamaani saattuaqassuseq siuariartuuteqanngitsoq, allaat saattuaaqqat siunissami aalisarneqarsinnaalersussat takkussuuttut ikiliartornerat malunnaateqarluni. Taavani saattuarniartarneq 2001-miilli annikillisinneqarujussuarnikuugaluarpoq.

Saattuaqassuseq tamakkiisumik isiginiarlugu ukiuni saattuarniarfiulluarsimasunut sanilliussilluni ullumikkut peqassuseq suli appasittumiittuarsinnarpoq, Pinngortitaleriffiullu kaammattuutigaa saattuarniarfinni tamani piffissami aalajangersimasumi saattuarniartoqartalernissaa, tassa marsip naaneraniit juulip qaammataata qeqqata tungaanut. Taamaaliornikkut qulakkeerneqassammat saattuaaqqat siunissami aalisarneqarumaartussat allilluarnissaat aammalu saattuaqassutsip atorluarneqarnerunissaa pingaartumik “qituttunik” qalerualinnik eqqaanaveersaarnikkut.

Saattuarniarneq pillugu siunnersuineq 2013/14 (1.8MB)

Itinerusumik paasisaqarusunnermi saaffigisassat:

Biolog saattualerisoq AnnDorte Burmeister, 361201, anbu@natur.gl imaluunniit immikkoortortami pisortaq Helle Siegstad, 361220, hesi@natur.gl