Silap pissusianut Ilisimatusarfimmi suliassat nutaat Saqqummersinneqarfia 09.02.2012
Septembarip aallaqqaataani 2011 qinnuteqaqqusissummik Silap Pissusianut Ilisimatusarfik nassiussivoq, Nunatsinni silap pissusianut tunngatillugu ilisimatusaatissanut atugassanik, silap pissusiata allanngornerata sunniutissaannik misissuinermut atugassanik. Makkununnga tunngasutigut qinnuteqaateqartoqarsinnaasimalluni: Issittup imartaani, nunataani tatsinilu uumassusileqatigiiaat pillugit ilisimatusarnissamut aammalu Kalaallit Nunaanni inuiaqatigiilerinermut tunngasunik ilisimatusarnissamut – ilaatigut tassani pineqarlutik naleqqussarnissamut pinaveersaartitsinissamullu pilersaarusiornissat. Tamakkununnga aningaasat 10,1 mio. kr-it illuartinneqarsimapput.
Ullup kingusinnerpaamik qinnuteqarfissap nalliunnerani, oktobarip 15-ani, Silap Pissusianut Ilisimatusarfik qinnuteqarfigineqarsimavoq 24-init, katillugit 18,0 mio kr.-inik nalilinnik. Qinnuteeqatit taakkua nalilersoqqissaarneqarsimapput, naliliisussanik ataatsimiitsitaliornikkut, aalajangerneqarsimallunilu suliariniakkat 14-it taperserneqassasut, taakkunannga 10-it suliaallutik ingerlareersut, taamaasillutillu ukiut suliaqarfiusussat sivitsorneqarlutik 2014-ip tungaanut.
Tamakkua saniatigut suliassat sisamat nutaarluinnaat silap pissusiata allanngoriartorneranut attuumassutillit taperserneqassapput, tassaasut:
- Nunatta kitaani ulittarnerata tinittarneratalu angumasaani uumassusileqatigiiaat –uumassusillit periusaasa/pinnguutaasa taakkulu avannamut killeqarfiisa attaveqatigiinnerannik misissuineq
- Issittup imartaani (immap naqqaniunngitsoq sinerissamullu attuumassuteqanngitsut) ummasut nerisaqaqatigiinnerannik misissuineq. Immap uumasuaraai pingaaruteqarpat? Tunngaviusumik kulstoffeqassusaannik anersaartuusiannillu uuttortaaneq.
- Nuup kangerluanut tatsit imaartartut nakkutiginissaannut uuttortaatinik ikkussuineq.
- Ukiuunerani Kangersunermi/Nuuk kangerluani uuttortaatinik (tissukartartunik) ikkussuineq
Malugeqquneqarpoq misissuinissani nutaani sisamaasuni ingerlatsisut tamarmik nunatsinninngaanneersummata, Silap Pissusianut Ilisimatusarfimminngaaneersuullutik, tamannalu uppernarsaataammat Silap Pissusianut Ilisimatisarfiup, 2009-mi pilersinneqarneraniit pisinnaasatigut annertusiartuinnarneranut.
