*Required
*Required
*Required
*Required
*Required
*Required
*Required
*Required
Send
Thank you for your application!
 

Avatangiisinut ilinniartitaanernullu tunngasut siunnerfiulerput

Pinngortitaleriffiup siunnerfigalugit anguniagassai 2013-imiit 2017-ip tungaanoortut siulersuisut ataatsimiinnerminni akuereqqammerpaat. Pinngortitaleriffiup pingaarnertut suliassaasa saniatigut ilinniartitaanerup avatangiisinullu tunngassuteqartutigut suliassat nutaat siunnerfigineqarnissaat aalajangiunneqarpoq.

Ilisimatuussutsikkut avatangiisinik misissuinerit nalilersuinerillu piginnaasaqarfigilluarnerulerumallugit Pinngortitaleriffimmi ilisimatusartartut ilisimattorsaleruttorput. Taamaaliorput ukiuni makkunani nunatsinni aatsitassarsiornernut aammalu nunami suliffissualiorniarluni suliniuteqarniarnernut atatillugu avatangiisinut tunngatillugu suliassat amerliartornerat ilutigalugu. Taamaattumik Pinngortitaleriffik suliassaqarfimmut atatillugu sapinngisaq tamaat piginnaanngorsarniarpoq, avatangiisinik misissuinernut tunngassuteqartuni akisussaasunngorniarluni. Tamatumunnga ullumikkut akisussaasuusoq tassaavoq Danmarkimi Avatangiisinut Nukissiuutinullu Ilisimatusarfeqarfik, DCE, Aarhusip Universitetiata ataaniittoq. DCE ullumikkut apeqqutini avatangiisinut tunngassuteqartuni nunatsinni Naalakkersuisunut pingaarnertut siunnersortaavoq, Pinngortitaleriffillu saniatigut siunnersortaaginnarluni. Taama inissisimasoqarnerata siunissami paarlaatitinneqarnissaa anguniarlugu Pinngortitaleriffik suliniuteqaleruttorpoq.

Anguniagassat pingaarnerit aappaattut ilisimatusarnermik tunngaveqartumik pinngortitaq pillugu ilinniartitaanerit ilisimatusarfeqarfinni (universitetini) ilinniarneqartartutut qaffasissuseqartumik nunatsinnut attuumassuteqartumik pilersitseqataanissaq suliniutigineqassaaq. Tassa taamatut ilinniartitaanerup ingerlarngata sapinngisamik annertunerpaartaata nunatsinni ingerlanneqartalernissaa anguniarneqarpoq, soorlu ARTEK-ip ataani ingerlatsinerup assipajaavanik aaqqiissuteqarnikkut. Tamatuma inerisarneqarnissaa anguniarlugu Pinngortitaleriffik nunatsinni avataanilu ilisimatusarfeqarfinnik suleqateqarnissanik atsioqatigiissuteqareerpoq.

“Pinngortitaleriffik pissanganartunik siunnerfilerneqarpoq. Pinngortitaleriffiup suliassaqarfiisa nunatsinnut nuunneqarnerisa kingorna suliffeqarfik inuiaqatigiinni pisariaqartitat naapertorlugit suliassaqarfimmigut ineriartorsimavoq. Siullermik pisuussutit uumassusillit piujuartitsinermik tunngaveqartumik iluaqutigineqarnissaat qulakkeerinneqataaffiginiarlugu ilisimatuussutsikkut tunngavissat katersorneqarnerat suliarineqarsimavoq. Tamatuma kingorna silap pissusianut tunngassuteqartut maannalu avatangiisinut tunngassuteqartut sammineqarnissaat pisariaqalerpoq. Ilinniartitaanernut tunngassuteqartuni tapertaarusuppugut, maannami Pinngortitaleriffiup ilisimatusarnikkut tunngavia ima pitsaatigilerpoq tamatuma suleqataaffigineqarnissaa piareersimaffigineqalerluni, Pinngortitaleriffiup siulersuisuini siulittaasoq Gert Mulvad oqarpoq.

Siulersuisut iluarisimaarlutik maluginiarpaat siunnerfiliilluni anguniagassatut pilersaarutit 2007-imiit 2012-ip tungaanoortut tamarmik anguneqarsimammata. Taamanikkut immikkut pilersaaruteqarfigineqartut tassaapput illutatigut atortutigullu annertusaanissat, Silap pissusianik ilisimatusarfeqarfiliornissaq kiisalu umiarsuup misissuutip “Adolf Jensen”-ip taarserneqarnissaa. Taanna umiarsuarmik Sanna-mik 2012-imi taarserneqarpoq.

Siunnerfiliilluni 2013-imiit 2017-ip tungaanut pilersaarutit allaaserineqarnerat uani atuarneqarsinnaapput.

Itinerusumik paasisaqarniarnermi saaffigisassaq:

Pinngortitaleriffiup Siulersuisuini siulittaasoq Gert Mulvad oqarasuaat: 483253