*Required
*Required
*Required
*Required
*Required
*Required
*Required
*Required
Send
Thank you for your application!
 

Biologit misissuinerit amerlanerusut pisariaqartippaat

Assimi: Immap naqqanik sajuppillatsitsisarluni misissuinerit kingunerisinnaasaat paasiniarlugit misissuinerit piniartut suleqatigalugit 2012-imi ingerlanneqarput. Asseq: Pinngortitaleriffik

Allattoq:  MiKv

Qimusseriarsuarmi qilalukkat qernertat immap naqqanik sajuppillatsitsisarluni misissuinernit sunnerneqarsimasinnaanerat takussutissaqarpasinngilaq; kisiannili 2012-imi kisinneqarnerminni 2007-imi kisitsinermut sanilliullugit eqimanerunerat malunnarpoq. Paasissutissalli amerlanerusut pisariaqartinneqarput taama assigiinngissuteqarsimanerat immap naqqanik sajuppillatsitsisarluni misissuinernit peqquteqarsimaneranik inaarusiissalluni.

Aamma piniartut Qimusseriarsuarmi immap naqqanik sajuppillatsitsisarluni uuliasiorniarluni 2012-imi august-septemberimi misissuisoqarnerata nalaani qilalukkat qernertat allatut pissusilersulernerannik maluginiagaqarsimanngillat. Aamma nalinginnaasumik pisaqarfigisartakkamik avataatigut sumiiffinni allanartuni pisaqartarsimanngillat.

Tassa Qimusseriarsuarmi immap naqqanik sajuppillatsitsisarluni misissuinerit qilalukkanut qernertanut sunniutigisinnaasai pillugit biologit misissuinerannit inernerugallartut, maanna Pinngortitaleriffiup nittartagaani atuarneqarsinnaalersut taama eqikkarneqarsinnaapput.

Nalunaarusiami tuluttoortumi Qimusseriarsuarmi immap naqqanik sajuppillatsitsisarluni misissuinerit ingerlanneqarneranni qilalukkanik qernertanik kisitsinernit inernernerit atuarneqarsinnaapput. Aamma Kullorsuarmi Savissivimmilu piniartunik apersuilluni misissuinernit inernerit atuarneqarsinnaapput.

Biologit 2012-ip aasaanerani misissuineri pingasunik immikkoortortaqarput. Nalunaarusiaq nalunaarusiaagallartutut taaneqarpoq, misissuinerit immikkoortuinit marlunnit inernerit taamaallaat saqqummiunneqarmata; pingajuaneersut suli piariinngimmata. Misissuinerni taakkunani sammineqarput immap naqqanik sajuppillassutip nipaata immap iluani siaruar-tarnera, sakkortussusia aammalu nipip nipaarukkiartortarneranut tungassutillit. Misissuinernit inernerit kingulliit ukiup naannginnerani saqqummiunneqartussaapput.

Qilalukkanut qernertanut sajuppillatsitsisarnernullu tunngatillugu paasissutissat
Nalunaarusiaagallartoq aammalu ilisimatuussutsikkut allaaserisartaa Pinngortitaleriffiup nittartagaaniilerput. Aamma misissuinerit immikkoortuinit pingasunit eqikkaanerit atuarneqarsinnaapput.

Immap naqqanik sajuppillatsitsisarluni misissuisoqarnerata nalaani timmisartoq Twin Otter atorlugu qilalukkanik qernertanik pingasoriarluni 2012-imi kisitsisoqarpoq. Asseq: Pinngortitaleriffik

Qilalukkanut qernertanut sajuppillatsitsisarnernullu tunngassutillit ilisimaneqarpallaanngillat
Qilalukkanut qernertanut sajuppillatsitsisarnernullu tunngassutillit misisuinerit qulaani pineqartut nunatsinni siullerpaamik aatsaat ingerlanneqarput. Misissuinerit Pinngortitaleriffmmeersunit aammalu Danmarkimi avatangiisinut misissuiveqarfimmeersunit, DCE-meersunit, piniartunik Kullorsuarmeersunik aammalu Savissivimmeersunik suleqateqarluni ingerlanneqarput. Ilisimatusartartut qulequttamut pineqartumut tunngatillugu ilisimasaat annikitsuararsuupput, taamaattumillu ilisimasassat amerlasoorsuit katersorneqaqqaassapput nakkutilleeriaatsinik pitsaasunik aammalu immap naqqanik sajuppillatsitsisarnerit ingerlanneqarnerini qilalukkat qanoq mianerineqarnissaannik biologit tutsuiginartumik siunnersuisinnaaqqullugit.

Nunarpullu issittoqarfinnit allanit qulequtaq pillugu ilisimasanik allanik isumalluutissaqanngilaq. Taamaattumik biologit siunnersuipput siunissami nunatta imartaani sajuppillatsitsisarluni misissuilernerni qulaani allaaserineqartunut misissuinernut assingusunik tamatigut ingerlatsisoqartassasoq. Ilisimatusartartut pissutsinut apeqqusersuippput ilisimasallu qilalukkanut sajuppillatsitsisarnernullu tunngassutillit taama annikitsigitillugit mianersortumik periuseqartoqarnissaa innersuussutigalugu – ilanngullugulu aamma eqqaasitsissutigineqarluni mianersortumik periuseqarnissamik tunaartaq pineqartumi matumani pingaartinneqartariaqartoq.

Qilalukkat qernertat immallu naqqanik sajuppillatsitsisarluni misissuinerit.

Itinerusumik paasisaqarusunnermi saaffigisassaq:
Seniorforsker Mads Peter Heide-Jørgensen oqarasuaat +45 3283 3827 imal. mail: mhj@ghsdk.dk