Iseriaannaalluni Saqqummersinneqarfia 09.11.2013
Assimi: Igor Dmitrenko (CEOS) aamma Sergey Kirillov (CEOS) CTD piareersaraat. Asseq: Søren Rysgaard
Allattoq: Pemi
Tunup Avannaarsuani Young Sundimi issittuni imartat sikuneq ajortut ilaata, ammalatap, aappaagumut misissuiffigineqarnissaa piareersarlugu angutit arfineq marluk Canadamit, Nunatsinnit, Ruslandimit Tysklandimillu aggersut piffissaq kingulleq atortorissaarutinik inississuipput. Ammalataq tappavaniittoq Arctic Science Partnershipip ataani 2014-imi misissuiffigineqartussat ilagaat.
Ilisimatuussutsikkut suleqatigiissutigisamut Arctic Science Partnership (ASP)-mut atatillugu Tunup Avannaarsuanut Young Sundimut 2014-imi ilisimatusartartut 100-t takkuttussapput. Tappavani ammalatami apriilimiit november tikillugu sullittoqassaaq. Ilisimatusaatit qulequttat arlalippassuit sammineqassapput, soorlu silaannarmut, sermersuarmut, imaanut, kuunnut, tatsinut, nunamut, nunamut qeriuaannartumut immallu naqqanut tunngassuteqartut sammineqassallutik. Taama siamasitsigisumik ilisimatusaateqarnissani Issittumi pisut aammalu silap pissusiata allanngorneranut tunngassuteqartut ilisimasat annertusarniarneqarput.
Leif Riemenschneider (Tyskland) ”kukkilattariaq” ammarteraa. Asseq: Søren Rysgaard
Ammalataq
Ammalataq imartaavoq sikuugaluartumiluunniit qerinngisaannartoq. Young Sundimi ammalataq kangerluttaata avataaniippoq, sikuliaagaluartut anorersuarnit sequminneqartarput, taamaalillunilu imartaq tamaaniittoq sikusarani. Tamaani tikikkuminaatsorsuarmi aappaagumut misissuinissanut ukiunullumi aggersuni atortussat piffissaq kingulleq ilanngullugu eqqanaarsarneqarput. Pinngortitaleriffimmi Silap Pissusianik Ilisimatusarfimmit Søren Rysgaard Ivali Lennert-ilu piareersaaqataallutik peqataapput.
Uuttortaassutit ingerlaavartut
Angalaqatigiit kangerluup qinngorpiaani misissuisarfimmik atortorissaarusersorsimasumik nappaapput. Taakku ilaat immami, qaavaniit ammut 350 meternik ititigisoq ilanngullugu, sarfap sukkassusianik uuttortaassutitaqarpoq. Ilaat nalunaaquttap akunnikkaartumik immap nillissusianik/kissassusianik tarajoqassusianillu uuttortaavoq – maannamiit aappaagu ilisimatusartartorpassuit takkunnissaasa tungaanut. Aamma bojit silasiutaaqqatut taaneqarsinnaasut aputip sikullu itissusiannik aammalu nillissusiannik/kissassusiannillu uuttortaasartunik inissiisoqarpoq. Paasissutissarpassuit tamakkunannga katersorneqartut ingerlaavartumik qaammataasaq atorlugu nassitsissutitigut ilisimatusartartut allaffiinut kialaartunut nassiussorneqartarput.
David Babb (CEOS). Asseq: Søren Rysgaard
Kukkialattariaq
Young Sundip qiterpasissortaani atortorissaarut nutaaq atorneqalerpoq. Taanna ”Kukkilattariamik” taaguuteqartinneqarpoq, taamaattungammammi; assinguinnarporli, tassami ”kukkilattarissap” immap tarajoqassusia aammalu nillissusia/kissassusialu uuttortartarpai, pitsaalluinnartumik – tassami uuttortakkat sumininnguamik nikittarneri nalunaarsortarmagit. ”Kukkilattarissap” assipajaava mikineq ukiortaareersimalersoq University of Manitobap misileraaviani SERF-mi (Sea ice Experimental Research Facility) iluatsittumik misilerarneqarpoq. Misileraavimmi tassani immap sikusarnera assiliniarsaralugu qerititsisarnerit ingerlanneqartarput. ASP-p ataani misissuisarnerni anguniagaavoq ”kukkilattariarpassuarnik” akikinnernik sanariarluni issittup imartaani sumi tamaani uuttortaatitassanik paasissutissanillu katersuutissanik sarfarsiataartitsinissaq.
Ivali Lennert (GCRC) aamma Egon Frandsen (ARC) angallatit ilaat misilittaraat. Asseq: Søren Rysgaard
Ukiuni aggersuni
ASP-mi suleqatigiinnerup ataani 2015-imi sammineqartussaavoq Qalasersuup imartaa, 2016-imi Canadap imartai Hudson Bay Fox Basin-ilu 2017-imilu Baffin Bugti suliaqarfiussalluni. Naggataagut neriuutaavoq Issittumi silap pissusiata allanngoriartornerata ataqatigiinnera paasisaqarfigineqarnerussasoq, taamaalillunilu nunarsuup sinneranut tunngassutillit aamma paasinarnerulissallutik.
