*Required
*Required
*Required
*Required
*Required
*Required
*Required
*Required
Send
Thank you for your application!
 

Issittumi ilisimattorsaatissatut aningaasaliissutit agguaanneqarput

Allattoq:  Mikv

Pinngortitaleriffik Ph d-nngornitissanut sisamanut aammalu post.doc-itut atorfeqartussanut marlunnut aningaasaliissutinik 12 mio. koruunit missaannik agguaaqqammerpoq. Tamanna pivoq Nunatsinni ilisimatusarnermut siunnersuisoqatigiit innersuussuteqareernerisigut.

”Aningaasaliissutinik pissarsiniarneq imaannaanngissimavoq, tassami qinnuteqartunit 42-usunit piukkunnartorpassuarnik toqqagassaqaraluaratta. Qinnuteqartut ilinniarsimasamikkut piginnaasaat kisiisa isiginiarnagit kisiannili aamma suliniutiginiakkap nunatsinni piginnaanngorsaanikkut kiisalu nunatsinni Danmarkimilu ilisimatusarnikkut suleqatigiinnerunissamut tapertaalluarnisaa isiginiarsimavarputtaaq,” Nunatsinni ilisimatusarnermut siunnersuisoqatigiit siulittaasuat, Nunatta Katersugaasiviani pisortaanerusoq Daniel Thorleifsen, oqarpoq.

Aningaasaliissutit ilisimatusaatinut assigiinngitsunut makkununnga tapiissutigineqarput:

Karsten Fleischer Rex, tingulluutip Hepatitis B-p nunatsinni sooq taama atugaatigineranik ilisimatusaateqarnissamut, uffali nappaammut tassunga malittaasartullusooq nappaatit allat soorlu tingukkut kræfteqalersarneq aammalu tingut suliunnaartarnerat taama atugaanngitsigisut. Suliniut Dronning Ingridip Napparsimavissuani Aalborg Universitetimilu ingerlanneqassaaq.

Diana Krawczyk, taassuma misissorniarpaa imaata sikuata imaatalu kissassusia nillissusiatalu ukiuni 10.000-ni kingullerni nikerarsimanerat, immap naqqanit qillerilluni misissugassat quajaatinik kiselalger-inik akoqassusii misissorlugit. Suliniut Kalaallit Nunaani Silap Pissusianik Ilisimatusarfimmi ingerlanneqassaaq.

Aili Labansen, naak illersuutissatut iliuutsit atortinneqalereeraluartut soormitaava appat ineqarfiisa ilaat ikiliartorfiuppat, uffa timmiaqatigiit allat aalaakkaasumik inissisimasut. Suliniut Pinngortitaleriffimmi Aarhus Universitetimilu ingerlanneqassaaq.

Anne Mette Jørgensen, eqqaamasat isigissaasullu oqaatsit atorlugit oqaluttuarisaanermik allaaserinninnertullu naleqartigisinnaappat. Suliniut Ilisimatusarfimmi København Universitetimilu ingerlanneqassaaq.

Andreas Møller Jørgensen, taassuma misissuiffiginiarpaa inooqatigiinni tamat oqartussaaqataanerisa qarasaasiat qarasaasiatigoortumillu sullissivinnik qanoq ililluni soorlu atorneqarnera aammalu tamakkuninnga atuerpiarsinnaannginnerup killiliisarnera. Suliniut Ilisimatusarfimmi Universitetimilu ingerlanneqassaaq.

Outi Tervo, misissorniarpaa arfiviit tiinganiarnerminni neriniarnerminnilu nipertik atortarneraat. Post doc suliniut Pinngortitaleriffimmi København Universitetimilu ingerlanneqassaaq.

Suliniutinut siullerut marlunnut taaneqartunut Namminersorlutik Oqartussat ilisimatusarnernut aningaasaliissutigisartaanit tapersiisoqarpoq, sinnerinut Danmarkimi aningaasanut inatsisitigoortumik Issittumi ilisimatusarnernut aningaasaliissutaasartunit aningaasaliisoqarluni.

Itinerusumik paasisaqarusunnermi saaffigisassaq:
Pinngortitaleriffiup pisortaanera Klaus Nygaard oqarasuaat 361200 imal.nygaard@natur.gl