Nunarsuarmioqatigiit misissuiviit pillugit Nuummi ataatsimiipput Saqqummersinneqarfia 06.03.2013
Nunarsuup avannaatungaani ilisimatuussutsikkut misissuiveqarfiit 45-t suleqatigiissutigineqarnerat pillugu nunat 15-t aallartitaat ulluni makkunani Nuummi ataatsimiippput, suleqatigiinnerlu taanna INTERACT-imik taaneqartarpoq.
Ataatsimiinneq suleqatigiinnerup qiterpaarnerani nalilersuineruvoq, suleqatigiinnerlu 2011-mi aallartinneqarpoq EU-p sinaakkusiisumik aningaasaliissuteqartarnerisa arfineq aappaasa ataani aningaasaliiffigineqarluni. INTERACT-ip ataani misissuiveqarfiit suleqatigiissutigineqartut nunani makkunaniipput: Kalaallit Nunaat, Skandinavia, Svalbard, Rusland, Tuluit Nunaat (Skotland), USA (Alaska), Canada, Island, Savalimmiut Europallu qiterpasissortaani nunat qaqqartuut.
Ilisimatuussutsikkut misissuiveqarfinni taakkunani ilisimatusartartorpassuit nunanit tamalaaneersut 1000-nit amerlanerusut ukiut tamaasa inisimasarput. Aamma INTERACT-ip ataani ilisimatusariaatsit akimorlugit ilisimatusaqatigiit nunarsuarmit tamaneersut arlalippassuit, ilisimatusartartut nunarsuarmit tamaneersut aammalu ilisimatuussutsikkut alaatsinaannernik suliaqartartorpassuit suleqatigineqartarput. Suleqatigiiffiup INTERACT-ip pingaarnertut anguniagaraa nunami uumassuseqassutsip ataqatigiinnerata paasisaqarfiginerunissaa, taamaalilluni Issittumi silap pissusiata allanngornerata kinguneri paasigasuarneqarsinnaaniassammata, piumaarsinnaasut siulittuutigineqarsinnaniassammata piffissaagallarneranilu iliuuseqarfigineqarsinnaaniassammata.
“INTERACT iluaqutigalugu ilisimatusartartut nunarsuarmeersut Issittumut annguttarput. Taamaalilluni EU-mit aningaasaliissutaasut Issittumi inuiaqatigiinnut nunarsuarmioqatigiinnullumi tamanut iluaqutaasarput ilisimatuussutsikkut ilisimalikkanik pilersitsiinnaratik aamma ilisimalikkanik tunioraateqatigiittarnerit nalitoqimmata,” professor Terry V. Callaghan aamma INTERACT-imi ataqatigiissaarisoq oqarpoq.
INTERACT-imi ataatsimiinnermi peqataasut. Asseq: Emma Kristensen
INTERACT suleqatigiinneq ukioq ataaseq atuuteriiginnartoq paasinarsivoq iluaqutaalluartoq, tassami ilaatigut ilisimatuussutsikkut misissuiveqarfiit allattorsimaffiat aammalu suliat ingerlaartut allaaserineqarnerat naammassineqarmata.
Tassa INTERACT ilisimatusartartunut sumiiffinni avinngarusimasuni ilisimatusarniartunut saaffissaalerpoq sullissivik ataasiusorlusooq. Tassa suleqatigiiffimmit ilisimatusartartut nunarsuarmi tamaneersut ilisimatusarnerminnut atatillugu atugassaat pitsanngorsartuarniarneqarput.
Suleqatigiiffimmut EU-miit aningaasaliissutaasut 2011-miit 2014-ip tungaanoortuupput.
Ataatsimiinneq pineqartoq Pinngortitaleriffimmi ingerlanneqarpoq 7. marts 2013 naammassineqassalluni.
Itinerusumik paasisaqarusunnermi saaffigisassaq:
Ilisimatusartoq Kathrine Raundrup, Pinngortitaleriffik, oqarasuaat 361200 imal. email: KaRa@remove-this.natur.gl
