Nunatta imartaani saattuaqassuseq pitsanngoriaateqangaanngilaq Saqqummersinneqarfia 11.11.2013
Allattoq: MiKv
Aqutsiveqarfinni tamani saattuaqassuseq suli appariaateqassanngippat, aamma avataaniittut sinerissallu qanittuiniittut eqqarsaatigalugit, saattuartassiissutit tamakkerlugit 2.100 tonsinik amerlassuseqartariaqaraluarput. Taama Pinngortitaleriffik isumaqarpoq saattuat pillugit 2014-imut siunnersuinermut atatillugu.
Saattuat pillugit 2014-imut siunnersuineq 2013-imi siunnersuinermut sanilliullugu allannguuteqanngilaq. Pinngortitaleriffiup saattuarniartartullu paasissutissaataasa takutippaat aqutsiveqarfinni tamani peqassuseq suli appaseqisoq.
Aammaartumik Pinngortitaleriffiup innersuussutigaa Sisimiut avataat Holsteinsborg Dyb saattuarniarfiusariaqanngitsoq, tamaani saattuaqassuseq suli appaseqimmat. Tamaani saattuaqassuseq siuariaateqarsimanngilaq, akerlianilu biologit misissuinerisa takutippaat 2012-imiit 2013-imut saattuat ikileriarsimasut. Saattuarniarfiusartunik matusigallartarnernit misilittakkat takutippaat, saattuaqassuseq matusigallarnerup nalaani ajunngitsumik sunnerneqartartoq.
Aamma Pinngortitaleriffimmit innersuussutigineqarpoq aqutsiveqarfinni tamani piffissami aalajangersimasumi saatuarniartoqartalertariaqartoq, innersuussutigineqarporlu martsimiit juulimut saattuarniarfiusariaqartoq. Taamaaliornikkut saattuanik pisuussutit atorluarneqarnerulissagaluarput, saattuat nerpiginnerusut pisarineqartalerlutik qituttunillu qalerualinnik aammalu nerpikitsunik avammut eqqaaginnarnikkut annaasaqaataaginnartartut ikilisarneqarsinnaagaluarmata.
Aqutsiveqarfinni ataasiakkaani 2013/14-imut pisassiissutigineqarsinnaasutut innersuussutit. * Aqutsiveqarfimmi Sisimiut avataanni saattuarniarneq 2011-mi 2012-imilu matoqqavoq. ** Aqutsiveqarfimmi Sisimiuni pisassiissutit oktober 2013-imi 150 tonsinik qaffanneqarput, aqutsiveqarfimmilu Nuuk-Paamiut-mi 200 tonsinik qaffanneqarlutik.
Pinngortitaleriffiup saattuat pillugit siunnersuinerata siunertaraa saattuaqatigiiaat amerlanerpaat ikiliartuinnarnerisa unitsinnissaat. Saattuaqatigiiaat amerliartortinneqassappata pisassiissutigineqartussat siunnersuinermi innersuussutigineqartunit appasinnerutinneqarsinnaapput.
Saattuat pillugit siunnersuisarnerit ukiut marlukkaartumik pisarnissaat Pinngortitaleriffimmit siorna atortinneqalerpoq. Saattuat pillugit paasissutissat biologinit saattuarniartartunillu pissarsiarineqartartut takutippassuk saattuaqassuseq soorlu aappaagu malunnaatilimmik allannguuteqalersoq, taava Pinngortitaleriffik piareersimavoq saattuat pillugit 2014-imut siunnersuineq nalilersoqqissallugu.
Itinerusumik paasisaqarusunnermi saaffigisassaq:
Biolog AnnDorte Burmeister oqarasuaat 361201, mail: anbu@natur.gl
