Nuup eqqaani 2013-mi immap sikuanik misissuineq Saqqummersinneqarfia 06.06.2013

Allattoq:  Peter Schmidt Mikkelsen / Brent Else

Issittumi ilisimatusarnerit pillugit peqatigiinnermi ilisimatusartut novembarimi 2012-mi siullermeerlutik ataatsimiikkamik angujuminaatsuusorinarsinnaasumik  isumaqatigiipput, tassaasumik ukioq 2013-imi nunat peqataasut tamarmik Nuup eqqaani immap sikuanik misissuisussanik aallartitsissasut. Sooq angujuminaatsuusorinarsinnaasoq? Tassa qaammatit sisamaannaat periarfissaralugit tamatuma piviusunngortinnissaanut pilersaarusiornissatsinnut periarfissinneqaratta. Nunanit pingasunit, sammisaqarfinniit assigiingitsunit sisamanit peqataasussaqarmat ilisimatusarnikkut peqatigiinniarnerup attanneqarsinnaaneranut misilittaaviusussatut inissisimalersimavoq.

Alex Hare, Odile Crabeck Karley Campbellilu sikup sannaai sikumilu uumassuseqassuseq misissorniarlugit tigusisut. Assiliisoq: Nicolas Xavier-Geilfus

Qujanartumilli pilersaarusiornerit eqaatsumik ingerlasimapput. Atortussanik nassiussuineq, angalanissat aaqqissuunneqarnerat, najugaqarfissaqartinneqarnerit misissuivissanullu aaqqissuussinerit Canadami, Kalaallit Nunaanni Danmarkimilu inissisimasut ilisimatusartut, allaffissornikkut sulisut aammalu pilersaarusianut ataqatigiissaarisut akornanni suleqatigiilluarnikkut tamanna iluatsissimavoq. Qanoq iserianngitsoq tassa Nuummut aallarpugut, ilisimatusarnissatsinnut piareersarluarsimalluta (tassa taamak isumaqarluta). Tassami pissutsit piviusut paasinarsisippaat, Kalaallit Nunaanni sulinissamut tamakkiisumik siumut piareersartoqarsinnaanngitsoq!

Usingiaasut. Assiliisoq: Nicolas Xavier-Geilfus

Siullertut piviusunngortitsinissatsinnut akimmisaartitsisut annersaat tassaasimavoq Kangerluarsunnguup sikuunnginnera. Ullualunni sikumi saattuaqqami katersigaluarsinnarluta, ulloq ataaseq atorlugu allamik misissugassatsinnik katersiviusinnaasumik ujarlernitsigut Kanajorsuarni siku suliassatsinnut atorsinnaasoq nassaaraaput. Tamannali aamma unammillernalaanngitsoorsimanngilaq, tassami ilulissat aniasut aqqutaaniinnermigut tikikkuminaallisarlunilu pigami, allaat ualeq ataaseq kiggugussaasimalluta aalariarfeerulluta, aammalu silap kiattuarsinnarnerata immap sikuata qanoq issusianut naatsorsuisinnaanerput akornusersorpaa, eqqoriaaginnartariaqartarsimalluta.  Tamakku atugassarisimagaluarlugit, Silallu

Pissusianik Ilisimatusarfimmiut pissutsinik misilittagaqarluartut iluaqutsiullugit, anguniakkatsinnik tamangajannik angusaqarsimanerput oqaatigisariaqarpoq. Nuuk, eqqaalu nuannersumik paasisaqarfigalugulu angalaarfigisinnaasimavarput.

Fei Wang, Lorenz Meire Ivali Lennertilu iluliaminermit misissugassanik tigusisut. Assiliisoq: Nicolas Xavier-Geilfus

Immap sikuanik misissuinermi peqataasut tassaallutik: Brent Else, Karley Campbell, Odile Crabeck, Ryan Galley, Alex Hare, Marcos Lemes, Fei Wang, and Nicolas-Xavier Geilfus, Centre for Earth Observation Science (CEOS) (Nunarsuarmi pissutsinut misissuinermut Ilisimatusarfik) University of Manitobmeersut, Jody Deming Shelley Carpenterilu University of Washingtonimeersut; Heidi Sørensen, Kalaallit Nunaanni Silap Pissuisanik Ilisimatusarfimmeersoq aammalu CEOS, Kalaallit Nunaanni Silap Pissusianik Ilisimatusarfik aammalu Arctic Research Centre,  Aarhus Universitetimiittoq sinnerlugit, Søren Rysgaard. Carl Isaksen Ivali Lennertilu suliami atortutigut ataqatigiissaarisuupput suliallu iluatsittumik ingerlaneranut  peqqutaanerpaanut ilaallutik.  Ilisimatusarluni misissuinermi sammisat assigiinngitsorpassuusimapput, ilaatigut makku sammineqarsimallutik; immap sikuata sunik katitigaaneranut uumasoqassusianullu tunngasut, immap sikuata silaannarmik kissatsitsisartunik gassinik aqqusaarneqartarneranut tunngasut, aammalu immap sikullu akornanni ataqatigiissutinut tunngasut. Suliaq ingerlanneqarpoq Kanajorsuarni, marsip aallartilaarneraniit apriilip qiteqqunnissaata tungaanut.

Brent Else

Winnipeg, MB

Jun. 4, 2013