Pinngortitaleriffimmi saarngit palmillu Saqqummersinneqarfia 24.06.2013

Assimi: Saqqummersitsineq pisortatigoortumik Pinngortitaleriffup pisortaanit Klaus Nygaardimit ammarneqarpoq. Asseq: Fernando Ugarte, Pinngortitaleriffik.

Allattoq: Mikv

Nunatsinni pinngortitaq pillugu ilisimatusarnerit 1768-imiit ullumimut oqaluttuassartaa eqqumiitsuliortup inuusuttup Bolatta Silis-Høeghip kiisalu equmiitsuliortup ataqqisaasup akornatsinniigunnaareersullu Anne-Birthe Hovep suliaannik saqqummersitsineq akuulaagaq. Aammami puigornagu tappiorannartoqarfik alutornartoq, naqissusiisorlusooq uumasut nerisaqaqatigiiaarneranni allerpaat ilaanni inissisimasut imaani uumassuseqassutsimut tamarmut pingaartuunerannik.

Pinngortitaleriffimmi saqqummersitsinermi ataavartuusussami nutaami ilisimattorsaatigineqarsinnaasut ikinngillat. Qaatuaqissutaasinnaasut arlalissuupput – nunatsinni ukioq 0-umiit maannamut kiassutsit nillissutsillu nikerarneranniit pinngortitaq pillugu ilisimatusartartup siullerpaap paasisaanut kiisalu Tjalfe-ilisimasassarsiornernik taallugit 1908 aamma 1909-mi misissuisimanernut. Misissuisimanerit taakku kingusinnerusukkut nunatsinni nappatigilerluakkatsinnut aalisarnernut tunngaviliisuupput. Aap, saqqummersitsinermi aamma siumugassaapput uumasut niaquisa saarngi arlallit palmillu kanaartaat. Sooq aamma taakku ilaatinneqassappat – tamanna Pinngortitaleriffimmi pulaartup alapernaatsup saqqummersitsinermut atatillugu quppersagaliarineqarsimasumi nassuiaatissarsisinnaavaa.

Saqqummersitsineq qalipaatigissaarutitaqartoq imartoorlu taaguuserneqarsimasoq ”Paasisaqarusuppunga – Science & Society” Pinngortitaleriffiup pisortaaneranit, Klaus Nygaardimit, pisortatigoortumik ammarneqarpoq ulloq 20. juni 2013.

Saqqummersitsineq nunarsuarmioqatigiinnut tamanut saaffiginnittuuvoq, taamaattumillu kalaallisut tuluttullu oqaasertalersugaalluni. Pinngortitaleriffik inunnit ukiumut 1000-nit amerlanerusunit alakkarterneqartarpoq, taakkunannga amerlalaartorsuit nunatta avataaneersuusarlutik. Takornariat Pin-ngortitaleriffiup illutaa tamakkiusallugu angalaarsinnaasassapput, tassami saqqummersitsinerup ilusiligaanerata pulaat kaajalukaartilaartassammagit.

Sukumiinerusumik paasisaqarusunnermi saaffigisassaq:
Pisortaaneq Klaus Nygaard oqarasuaat 361200.

: Klaus Nygaard Kommuneqarfik Sermersuumilu Borgmester Asii Chemnitz Narup Nicolaj Sally oqaloqatigigaat. Asseq: Fernando Ugarte, Pinngortitaleriffik.

: Aalisakkanut Qalerualinnullu Immikkoortortami pisortaq Helle Siegstad Juaaka Lyberthilu. Asseq: Fernando Ugarte, Pinngortitaleriffik.

: Saqqummersitsinermi ammaanersiornermi peqataasut ilaat. Talerperlerpaami takuneqarsinnaavoq saqqummersitsinerup ilusiligaaneranut akisussaasoq Ida Fabricius. Asseq: Fernando Ugarte, Pinngortitaleriffik.

: Tappiorannartoqarfiusaap eqqaani. Asseq: Fernando Ugarte, Pinngortitaleriffik.

: Helle Siegstad palmit eqqaanni. Asseq: Fernando Ugarte, Pinngortitaleriffik.

: Oqaatsit atorlugit iikkami pinnersaasiaq. Asseq: Fernando Ugarte, Pinngortitaleriffik.

For yderligere oplysninger, kontakt:
Direktør Klaus Nygaard på tlf. +299 361200.