*Required
*Required
*Required
*Required
*Required
*Required
*Required
*Required
Send
Thank you for your application!
 

Ph.d.-nngorniartorpassuit Nuummeerrattut

Assimi: Professor Søren Rysgaard Silap Pissusianik Ilisimatusarfiup laboratoriaani ilinniartut takornariartippai. Asseq: John Connolly

Allattoq:  Mikv

Nuummi, eqqornerusumik oqaatigalugu Pinngortitaleriffimmi Hotel Hans Egede-milu, nunarsuarmioqatigiippassuit ulluni makkunani tusarsaallutillu takussaapput. Tassami ph.d.-nngorniarpassuit, tassa ilisimatusartartunngorniartut, 50-it missaanniittut silap pissusiata allanngoriartornerata avatangiisinut, inunnut naggataagullu taakku peqqissusiannut kingunerisaat pillugit pikkorissaleruttorput.

Ilisimatusartartunngorniartut nunanit assigiinngitsunit aqqaneq marlunnit ikinnerunngitsunit aggersuupput, sapaatip akunneranilu matumani ilisimatusaatigalugu ingerlataminnik ilisimatuussutsikkut tunngavilersorlutik nalilersuinernik sungiusartussaallutik. Peqataasut tamarmik immikkut suliniutiminnik saqqummiussissapput, Nuummullu tikinginnerminni suliartik ilisimatuussutsikkut tunngavilersukkamik allaaserereernikuullugu. Taannalu peqataasut allat ilisimatuussutsikkut tunngavilersukkamik immersueqataaffiginissaanut piareersaateqarfigereersimassavaat.

Ilisimatuunngorniarlutik ilinniartut marlunnut avillutik immikkooqqapput. Arlaat pinngortitamik aallaaveqarlutik ilisimatusartut, arlaallu inuiaqatigiilerisut nakorsanik akoqarlutik. Nakorsat ilisimatuunngorniartut qulequttat pineqartut inunnut sunniutaannik misissuisuupput. Pinngortitalerisut Pinngortitaleriffimmiipput, arlaallu Hotel Hans Egedemiillutik.

Pinngortitaleriffimmiittut Nordfrostimik taallugu ilisimatusaatip ataani ingerlasuupput, taannalu suliniutip allap Defrostimik taasap ataani ingerlasuulluni. Defrost Nunat Avannarliit ilisimatuusaatitut ingerlataraat silap pissusiata allanngornerata aammalu nunarsuup sermeqarfiisa apummillu qallersimasup imminnut sunneqatigiittarnerinik ilisimatusarnernik ingerlaqartuulluni. Defrostip anguniagaraa silap pissusianik naatsorsueriaatsit, nunarsuullu qaqornersaannillusooq ilisimatusarnerit aammalu issittumi uumassusillit ataqatigiinnerisa akornanni ataqatigiissitsiniarluni ikaartarfiliornissarlusooq.

Hotel Hans Egedemiittut inuussutissarsiornermi suliniutit angisuut innuttaasut peqqissusiannut, illoqarfinnut suliniummut qanittumiittunut kiisalu inuiaqatigiinnut tamarmiusunut avatangiisinullu sunniutigisinnaasaannik allannguisinnaanerinillu isiginninniarnissaq sammisaraat. Aallaavigineqarpoq London Miningip Isukasiani saviminissarsiorfimmik pilersaarutaa, tassani tamatuma nunatsinnut aammalu Issittoqarfimmut tamarmut sunniutigisinnaasai misissorniarneqarlutik.

Hotel Hans Egedemi ilisimatusartartunngorniartunut aaqqissuussineq NUNA-MED-imik taallugu peqqissaanermik sulialinnut ataatsimeersuartitsinermut atavoq. Ataatsimeersuarneq 7. septemberimiit 9. septemberip tungaanut ingerlanneqassaaq.

Itinerusumik paasisaqarusunnermi saaffigisassat:

Pinngortitami ilisimatusaateqartunut: Professor Torben Røjle Christensen oqarasuaat: +46 7095 6374 3
Peqqissutsimik inuiaqatigiilerinermillu ilisimatusaateqartunut: Nakorsaq Gert Mulvad oqarasuaat: 483253