*Required
*Required
*Required
*Required
*Required
*Required
*Required
*Required
Send
Thank you for your application!
 

Sinerissap qanittuani saarulleqatigiiaat siuariaateqarput

Sinerissap qanittuani biologit saarulleqassutsimik misissuinerisa takutippaat tamaani saarulliit amerlatsikkiartortut. Tamanna biologit aappaagumut nunatta sineriaani saarullinniarnissanut siunnersuineranni erserpoq: aappaagumut 12.063 tonsit tikillugit saarullittassiissutigineqarsinnaanerat innersuussutigineqarpoq, tamannalu ukiormannamut innersuussutigineqartunit 4.000 tonsinik qaffasinneraaq.

Ilisimatusartartut taama siunnersuinerminnut tunngavilersuutigaat Nuup Sisimiullu eqqaanni saarulleeqqat aalisarneqalerumaartussat amerleriarsimanerat, saarulliit ukioqatigiiaat amerlanerulernerat kiisalu saarullittarineqartartut agguaqatigiissillugu 10 cm-inik siornamut sanilliullugu anginerulermanerat 44 cm-iniit 54 cm-inut takissuseqalersimallutik.

Sinerissap qanittuani saarulleqatigiiaanut tunngatillugu allannguutit taamaammata pisassiissutigineqarsinnaasunik qaffaaneq pivoq, naak saarulleqatigiiaat immikkoortut qanoq amerlatigisunik peqarnersut taamaalillunilu aalisarnerup taakkununnga qanoq sunniuteqartiginera naammaginartumik ilisimaqqissaarneqanngikkaluartoq.

Taamaakkaluartoq sinerissap qanittuanut innersuussuteqarneq pisinnaasimavoq, periuseq nutaaq suut tamaasa ilisimaqqissaanngikkaluarlugit naatsorsueriaaseq ilisimatusartartunit ineriartortinneqarsimasoq naapertorlugu.

ICES-ip, tassa nunarsuarmioqatigiit imaani misissuisarnerni siunnersuisoqatigiivisa, aammalu Pinngortitaleriffiup 2014-imut aalisagaqatigiiaat pillugit ilisimatuussutsikkut siunnersuineranni sinerissap qanittuani saarullinnut tunngassuteqartoq nutaarsiassaavoq malunnaateqarnerpaaq. Siunnersuineq tamakkiisoq nunatsinni Naalakkersuisunut ulluni kingullerni ingerlateqqammerneqarpoq.

Nunatsinneersut aalisartagaannut allanut tunngatillugu siunnersuineq allannguuteqanngilaq:

Nunatta avataani tamarmi saarullinnut tunngatillugu: Tamaani saarulliit suffeqqittalernissaat periarfissiissutiginiarlugu toqqaannaq aalisarneqartariaqanngikkaluarput.

Avataani qalerallit – Tunup, Islandip Savalimmiullu imartaanni: Siunnersuineq allannguuteqarnani pisassiissutigineqarsinnaapput 20.000 tonsit.

Suluppaagaq natermiu (S. mentella) Tunup imartaani imavimmut iteriannginnerani: Siunnersuineq allannguuteqarnani pisassiissutigineqarsinnaapput 3.500 tonsit.

Aalisagaqatigiiaat allat Kalaallit Nunaanut soqutiginaatillit:

Ammassaat – Tunup, Islandip Jan Mayenillu imartaanni: Tamaani ammassaat amerlassusiannut tunngatillugu paasissutissat nutaat pigitinnagit 2013/2014-imi aalisartoqartariaqanngikkaluarpoq. Ammassannut tunngatillugu inaarutaasumik siunnersuineq islandimiut misissuinerannit inernerit piareerneqarnissaannut utaqqimaarunneqarallarpoq. 2012/2013-imut 570.000 tonsit pisassiissutigineqarput.

Saarulliit, sejit kullerillu – Barentip imartaani:  Barentip imartaani saarulleqassuseq pitsanngoriaateqarujussuarsimavoq, kisiannili sejit kullerillu atugarliorput

Saarullinnut tunngatillugu siunnersuineq siornamut sanilliullugu 53.000 tonsinik qaffaaffigineqarpoq, taamaalilluni 2014-imut 993.000 tonsit pisassiissutigineqarsinnaasutut innersuussutigineqarlutik. Tamaani nunatsinneersut 2012-imi pisassiissutigineqartunit 8.500 tonsinik pisaqarput. 2014-imi kullerinik pisassiissutigineqarsinnaasutut 150.000 tonsit innersuussutigineqarput siorna ukiormannamut innersuussutigineqartut 238.000 tonsiullutik. 2014-imi sejit pisassiissutigineqarsinnaasut 140.000 tonsit innersuussutigineqarput. 2013-imut innersuussutit 164.000 tonsiupput. Nunatsinneersut 2012-imi sejinik 679 tonsinik pisaqarput.

Siunnersuinermut tunngassutillit uani nassaarisinnaavatit.

Itinerusumik paasisaqarusunnermi saaffigisassaq:

Immikkoortortami pisortaq Helle Siegstad oqarasuaat 361200 imal. mail: HeSi@natur.gl