Tunumi raajaqassuseq appariaateqarpoq Saqqummersinneqarfia 09.10.2013
Allattoq: Mikv
Tunup imartaani raajaqassuseq pitsaavallaanngitsumik inissisimavoq, nunattali kitaata imartaani raajaqassuseq allannguuteqangaanngilaq. Taamaattumik nunatta kitaata imartaani 2014-imut raajartassiissutigineqarsinnaasutut biologit siunnersuinerat siornamiit allannguuteqanngilaq – tassa raajartassat 80.000 tonsit qaangertariaqanngikkaluaraat.
Tunulli imartaanut tunngatillugu nalunaarut uissuumminartortaqarneraaq, tassa tamaani aappaagumut pisassiissutigineqarsinnaasutut innersuussutigineqarmata amerlanerpaamik 2.000 tonsit. Taamaalilluni siunnersuinermi siornamut sanilliussilluni pisassiissutigineqarsinnaasut 10.400 tonsinik appariaateqarput. Pisassiissutigineqarsinnaasut appariaateqarnissaat ukiuni arlaqalersuni ilimanarsiartuaarsimavoq, tassami aalisarnernit nalunaarsuutit Pinngortitaleriffiullu misissuisarnerinit paasissutissaatit ukiuni arlaqalersuni takutimmassuk Tunumi raajaqassuseq appariartuinavissimasoq. Peqassutsip appariartuinnavissimanera tamaani saarulliit amerliartornerinut naapertuuppoq – saarulliimmi raajatortarmata.
Kitaata imartaani raajartarineqartartut arnarluttarasaaqaat
Kalaallit Nunaata kitaata imartaani raajaqassuseq 1990-ikkut aallartisimalernerinut sanilliullugu appasittuarsinnarpoq. Raajaqassutsimik naliliiniarluni ukiormanna misissuinerni paasinarpoq siunissami aalisarneqarumaartussanik raajaaqqanik peqassutsimut pilersuineq appasittuarsinnartoq. Peqatigitillugu arnarluppassuaqarnera paasinarpoq. Taamaalilluni raajarniarnermi arnarluppassuarnik pisaqartoqartarnera peqqutaalluni suffisussaagaluartunik raajarniarnerup siunissaanik qularnaarinnittussaagaluartunik annertuumik ilanngartuisoqarpoq. Aamma kitaata imartaani raajarniarfiusartuni saarulliit 2012-imi 2013-imilu amerleriaateqarsimanerat malunnarpoq, tamaattoqarneralu raajaqassutsimut sunniinerluttarpoq.
Nunatta kitaata imartaani raajarniarneq ukiuni kingulliunerusuni imartani suli mikineruartortuni katersuukkaluttuinnarpoq. Taamaalilluni ukiuni makkunani raajarniartarnerit Store Hellefiske Bankep Qeqertarsuullu Tunuata avannaaniunerusoq ingerlanneqartarput.
Naatsorsuinerit takutippaat Nunatta kitaata imartaani 2014-imi peqassutsip nammassinnaasaanik raajarniartoqassappat pisarineqarumaartussat 80.000 tonsit sinnertariaqanngikkaluaraat. Killiliussaq qaangerneqassappat raajaqassutsip qaffakkiartoqqissinnaanissaa qularnarsissaaq aamma saaruliit amerliartornerat eqqarsaatigalugu.
Itinerusumik paasisaqarusunnermi saaffigisassaq:
Aalisakkanut Qlerualinnullu Immikkoortortami pisortaq Helle Siegstad oqarasuaat: +299 361200.
