Uillut silap allanngorneranik oqaluttuarsinnaapput Saqqummersinneqarfia 05.08.2013

Allattoq:  MaBl / PeMi

Pinngortitaleriffimmi aamma Aarhus Universitetimi ilisimatusartut Nuup Kangerluani sissami tinittartumi ulittartumilu uillut, Mytilus edulis, amerlassusiat, toqorartanerat alliartortarnerallu pillugit ilisimatuussutsikkut ilanngutassiaq saqqummiuteqqammerpaat. Misissuineq ukiuni arlalinni ilisimatuussutsikkut suliat ilagaat, tamatumanilu Kalaallit Nunaata Kitaani Issittup kiannerumaartortaani issittortaanilu sissani tinittartuni ulittartunilu uumasut naasullu allanngortarnerannik allaaserinninnissaq siunertarineqarpoq.

Sissani tinittartuni ulittartunilu uumassusilinnik peqassutsit arlallit pingaarnerit Issittup kiannerumaartortaani issittortaanilu siammarfeqarput. Taamaattumik sissani tinittartuni ulittartunilu uumasoqassutsit, tamakkunani uillut uumasuupput, silap kiassusiata immallu sikuata allanngornerannut immikkut malussarissorujussuusut naatsorsuutigineqarpoq taamaattumillu uillut sumiiffimmi uninngaannarlutik uumasut uumaffii pillugit piffissami siusinnerusumi maannakkullu allanngornerat pillugu paasissutissanut takussutissaasinnaapput.

Misissuinermi suleqatigiit maannakkut Upernaviup eqqaani suliat tikillugit misissuipput. Nuup Kangerluani uillunik misissuinerup takutippaa ukiuunerani silap issikinnera aamma sikup ingusarnera pissutaallutik uillut aniguisarnissaat killilerneqartartoq taamaattumillu uumassusillit uumaffigisinnaasaannut assigiinngitsorpassuarnik alliartornissamut atugassaqarfiusunut tatineqartartut. Misissuineq ilisimatuussutsikkut atuagassiakkut Marine Ecology –Progress Series -kkut saqqummiunneqarpoq.