USA nannut pillugit suliami ikinnerussuteqaqqippoq Saqqummersinneqarfia 07.03.2013
Nannut nungutaanissaminnut ulorianartorsiunngillat – tassa maannarpiaq siunissarlu qanittoq eqqarsaatigalugu. Taama nunarsuarmioqatigiit nannut pillugit ilisimatuussutsikkut suleqatigiiffiat aamma Pinngortitaleriffimmeersunit peqataaffigineqartoq, Polar Bear Specialist Group, naliliinermini inerniliivoq.
Suleqatigiiffimmi ilaasortat USA-meersut aappassaaneerlutik misiliigaluarput
nannut nungutaalersutut nalilerteriarlugit CITES-ip ataani liste II-miit I-imut inisseriarlugit. CITES tassaavoq (Convention on International Trade in Endangered Species of Wild Fauna and Flora) nunarsuarmioqatigiit uumasunik naasunillu nungutaanissamik ulorianartorsiortut niuerutigineqartarnerat killilersimaarniarlugu isumaqatigiissutaat. Isumaqatigiissummi siunertaavoq uumasuniit naasuniillu niuerutissat taamaallaat piujuaannartitsinermik tunngaveqartut niuerutigineqarnissaat periarfissiissutigineqassasoq. Nuussisoqarsimagaluarpat taava nannunit tunisassiarineqartartut tamavimmik niuerutigineqartarnerat nunarsuaq tamakkerlugu inerteqqutigineqalersimassagaluarput, taamatullu avammut tunisassiarineqarsinnaanerat inerteqqutaalersimassagaluarluni. USA kingullermik 2010-mi taamaalioriaraluarpoq.
Nannut pillugit suleqatigiit Canadamit, USA-mit, Rusland-imit, Norge-mit, Danmark-imit nunatsinniillu peqataaffigineqartoq CITES-imi ataatsimiinnissaq sioqqullugu USA-mit siunnersuut pillugu ilisimatuussutsikkut nalileeqqullugu ukiormanna siusinnerusukkut piumaffigineqarpoq.
Nunatsinniit Danmarkimiillu pisortani atorfilittat ulluni makkunani CITES-p ukiumoortumik Bangkok-imi ataatsimiititsinerani 13. martsip tungaanut peqataapput. Ataatsimiinnermi USA-p nannut pillugit siunnersuutaa ilaatigut suliarineqartut ilagaat, tassani nannut pillugit ilisimatuussutsikkut suleqatigiit naliliinerat tunngavileeqataalluni.
Nannut pillugit suleqatigiit aamma naliliipput nannut ikiliartorsinnaanerinut peqqutaasunut pingaarnerpaaq tassaasoq Issittup kiatsikkiartornera peqqutaalluni imaani sikup milliartornera nunarsuarlu tamakkerlugu niuerutigineqarnerat peqqutaanani. Taamaalilluni suleqatigiit nalilerpaat nannut CITES-p ataani liste II-mit I-imut nuukkaluaraanni tamanna nanoqassutsimut annikitsuinnarmik sunniuteqassasoq.
“CITES-ip ataani listimi nuussinerit aatsaat pisariaqarput uumasut pineqartut ikitsuaraannanngorsimappata, siaruarsimanerat annikitsuinnanngorsimappat imaluunniit ukiut qulit ingerlaneranni amerlassutsimikkut affaannanngorsimappata imaluunniit kinguaariaat pingasut ingerlaneranni taama ikileriarsimappata. Silallu pissusiata allanngoriartornera kissatsikkiartorneralu taamaaginnarpat qularutissaanngilaq nannut siunissami nungukkiartornissaminnut aarlerinartorsiussammata. Ukiulli qulit tulliuttut qulit tulliuttut imaluunniit kinguaariiaat tulliuttut pingasut ingerlanerini taamaattoqarnissaa naatsorsuutiginngilarput,” Pinngortitaleriffimmi immikkoortortami pisortaq Fernando Ugarte oqarpoq.
Ameerikkarmiut taama siunnersuuteqarnerannut nalilersuinermi Pinngortitaleriffimmiit paasissutissat nalilersuinerillu ilapittuutaapput. Siunnersuut akuerineqarsimagaluarpat pineqartut nunarsuaq tamakkerlugu niuerutigineqarsinnaajunnaavissagaluarput. Uumasunit naasunillu liste II-miittunit tunisassiat aatsaat piujuartitsinermik tunngaveqarpata tunisassiarineqarsinnaapput aammalu uppernarsaaserneqartussaallutik imaluunnit NDF (NDF tassaavoq Non Detriment Findings) nalunaarusiamik tunngaveqaqqaartussaallutik.
Suliamut Pinngortitaleriffimmiit 2012-imi tunuliaqutissatut suliat uani nassaassaapput:
Siunnersuineq – CITES
Nannut pillugit suleqatigiit inerniliussaat uani takuneqarsinnaapput:
pbsg.npolar.no/en/news/archive/2013/CITES-PBSG-2013.html
Itinerusumik paasisaqarusunnermi saaffigisassaq:
Pinngortitaleriffiup Miluumasunut Timmissanullu immikkoortortaani pisortaq
Fernando Ugarte oqarasuaat 361200 imal. email: FeUg@natur.gl
