*Required
*Required
*Required
*Required
*Required
*Required
*Required
*Required
Send
Thank you for your application!
 

Issittup imaani uumassuseqassutsip assigiinngisitaarnera eqqumaffigineqarpoq

Allattoq:  PeMi

’Circumpolar Biodiversity Monitoring Programme’ (CBMP-Marin, tassa Issittoq kaajallallugu imaani uumassuseqassutsip assigiinngisitaarneranik malinnaaviginnilluni misissuisarnerit ingerlaavartut)-mimi ilisimatusartartut ukiumoortumik ataatsimeeqatigiinnerat, ukiormanna Pinngortitaleriffimmi ingerlanneqartoq, naammasseqqamerpoq. Ilisimatusartartoqatigiit pingaarnertut suliassaraat Issittup tamarmiusup imaata uumassuseqassutsimigut assigiinngisitaassusianik nakkutiginneqqissaarnissaq. Misissuisarnerit ingerlanneqartut saniatigut ukiormanna ataatsimeeqatigiinnermi nutaatut Nunatsinnut tunngatillugu aalajangiunneqarpoq immap naqqasiorluni kalinnermi pisarisoorneqartartut aaqqissuussaasumik nalunaarsorneqartalernissaat pillugu malitassiortoqassasoq. Taamaaliortarnissat Nunatta kitaata Tunullu kujasissortaani aalisakkanik misissuisarnertigoortumik ukiuni tulliuttuni pingasuni ingerlanneqartassapput. Tamatuma saniatigiut Issittup imartaani uumassuseqassutsip assigiinngisitaarnera malinnaaffigeqqissaarniarlugu ukiuni aggersuni suleriusissanut tunngassuteqartut ataatsimeeqatigiinnermi aalajangersarneqarput.

Ataatsimeeqatigiinnermi Issittumi ilisimatusartartut 30-t nunanit Issittoqarfimmeersut CBMP-Marin-imilu suleqataasut peqataapput, nunat peqataatitaqartut tassaallutik: USA, Canada, Island, Savalimmiut, Norge aamma Rusland kiisalu Kalaallit Nunaat/Danmark. Taakku saniatigut aamma pisarnertut ataatsimeeqataapput ICC-mit aallartitaq kiisalu ’Arctic Monitoring and Assessment Programme’, AMAP-ip aallartitaa.

”Ataatsimiinnermi naqissuserneqarpoq Issittup imaani uumassuseqassutsip assigiinngisitaarnerata allannguutigisinnaasaanik malinnaaqqissaarnissamik piumassuseqartoqarnera pingaartitsinerlu. Kalaallit Nunaatalu CBMP-Marin-mi pingaarutilimmik suleqataanera suliani ingerlanneqartuni ingerlanneqalerumaartussanilu malunnarluarpoq”, CBMP-Marin-mi ukioq kingulleq siulittaasooqataareerluni tunuartussanngortoq Pinngortitaleriffimmi ilisimatusartartoq Thomas Juul-Pedersen naliliivoq.

CBMP-Marin-imi immikkut ilisimasaqarfiullutik suleqatigiissitat arfiniliupput, sammisarineqartullu makkuupput: imaani siku, tappiorannartut, uumasut naqqasiortut, aalisakkat, timmissat imaanilu miluumasut.

Kalaallit Nunaat 2013-14-imi CBMP-Marin-imi siulittaasooqataavoq, Pinngortitaleriffimmilu ataatsimiinnermi siulittaasooqataaffik Ruslandimut ingerlateqqinneqarpoq.

CBMP ’Conservation of Arctic Flora and Fauna’-p (CAFF, Issittumi naasoqassutsip uumasoqassutsillu pujuartinneqarnissaat pillugu suliniaqatigiiffik) Issittumilu Siunnersuisooqatigiit ataanni suleqatigiissitaavoq, suliassaralugulu pisuussutit uumassusillit Issittumiittut misissuiffigineqartarnerisa ataqatigiissarneqarnissaat. Ataqatigiissaarinikkut anguniagaavoq Issittumi uumassuseqassutsip ataqatigiinnerini allannguutaasinnaasunik maluniukiartortunik aammalu akornusersuutaasinnaasunik siusinaartumik paasinnittarnissamik, attaveqatigiissutigineqartarnissaannik kiisalu iliuuseqapallannissanik qulakkeerinneqataanissaq.

CBMP-mi sulineq pillugu paasisaqarnerorusukkuit uani qupperaasinnaavutit: www.caff.is/monitoring

Itinerusumik paasisaqarusunnermi saaffigisassaq:

Silap Pissusianik Ilisimatusarfimmi ilisimatusartartoq Thomas Juul-Petersen oqarasuaat 36 12 00 imal. mail: thpe@natur.gl