*Required
*Required
*Required
*Required
*Required
*Required
*Required
*Required
Send
Thank you for your application!
 

Kitaata imartaani raajat ikiliartorput

Allattoq:  PeMi

Kitaata Tunullu imartaanni 2015-imut raajartassiissutigineqarsinnaasutut biologit Pinngortitaleriffimmeersut siunnersuutigisaannik Naalakkersuisut tigusaqaqqammerput.

Nunatta Kitaata imartaani raajaqassuseq – tassa oqimaassusinngorlugu – malunnaatilissuarmik appariarsimavoq, pissutsillu assigiinngitsut takutippaat raajaqassutsip pitsaanngitsumik ineriartornera ukiuni qanittuni aggersuni imailiallaannaq illorraap tungaanut saatinneqarsinnaanaviarunanngitsoq. Taamaattumik NAFO-mi (Atlantikup avannaata kitaani aalisarnikkut suleqatigiiffik) ICES-imilu (Nunat tamat imaani ilisimatusarnernut tunngatillugu siunnersuisooqatigiiffiat) biologit innersuussutigivaat Nunatta kitaata imartaani 60.000 tonsit 2015-imi raajartassiissutigineqartariaqaraluartut. Raajat pillugit 2013-imi 2014-imilu siunnersuinerni 80.000 tonsinik pisassiisoqartariaqaraluartoq innersuussutigineqarpoq.

Tunup imartaani 2015-imut raajartassiissutigineqarsinnaasutut innersuussutigineqartut siorna innersuussutigineqartunit allannguuteqaratik 2.000 tonsiupput.

Peqassuseq najummassimanarsiartuaarpoq

Kitaata imartaani raajartassiissutigineqarsinnaasutut innersuussutit siunnersuisooqatigiinnit tunngavilersorneqarput raajaqassutsip oqimaassusinngorlugu appariartuinnavinneranik kiisalu avataata raajaqassusiata – 1970-ikkut aallartinneriniit siullerpaamik – sinerissap qanittuani raajaqassutsimut sanilliullugu appasinnerulersimanera. Aammalu peqassuseq tamaat isigalugu arnarluit angusallunnut sanilliullugit amerlanerunerujussuupput. Tamatumali peqassutsimut qanoq kinguneqarsinnaanera biologinit ilisimaneqanngilaq.

Pinngortitaleriffimmeersut Nunatta kitaata imartaani raajaqassutsimik ukiumoortumik misissuisarnerisa takutippaat raajaqassuseq 2004-mi qaffasinnerpaaffigisaminiit ullumimut ammuinnavik ingerlasimasoq. Peqatigisaanik tunisassiorlutik raajarniartartut akunnermut kalinnermi pisarisartagaat 2008-miit ikiliartorsimapput

Aamma siunissami raajarniarnissani tunngaviusussat pitsaavallaanngitsumik inisisimapput:  raajaaqqanik ukiunik marlunnik-pingasunik utoqqaassusilinnik peqassuseq appasittuarsinnarpoq. Saarulliit raajaqassutsimik sunniisartut amerliartuaarput, pingaartumik Nunatta kitaata kujataata imartaani amerleriarsimallutik. Saarulliit raajartortarput, taamaattumillu biologit naatsorsuutigaat saarulliit ukiuni aggersuni suli amerlanerulissappata tamatuma raajaqassutsimut sunniutaattaaq suli anertunerulissasoq aamma. Misissuisarnerit takutippaat raajaqarfinni saarulleqaleraangat raajat aamma ikilisarmata.

Siunnersuineq naatsorsuinerpassuarnik tunngaveqarpoq

Raaajat pillugit siunnersuineq naatsorsuuterpassuarnik tunngaveqarpoq – tassa qarasaasiaq atorlugu naatsorsuinermut programmi pisariusupilussuaq – taaannalu biologit nunarsuaq tamakkerlugu raajaqassutsimut tunngatillugu paasissutissaataanik ilisimaneqartunik aallaaveqarluni suliaavoq. Naatsorsuut raajarniarnermit aammalu Pinngortitaleriffup misissuisarnerinit paasissutissaatit peqassutsimillu sunniisartut ilisimaneqartut tunngavigalugit naatsorsuusiortarpoq.

Naatsorsuusiornerit takutippaat 2015-imi pisat 60.000 tonsinit amerlanerussappata taava raajarniarnerup piujuartitsiniarnermik tunngaveqarunnaarnissaa aarleqqutigineqarsinnaalissasoq.

Siunnersuineq uani atuarneqarsinnaavoq.

Itinerusumik paasisaqarusunnermi saaffigisassaq:

Aalisakkanut Qalerualinnullu Immikkoortortami pisortaq Helle Siegstad oqarasuaat 36 12 00 imal. mail: hesi@natur.gl