Kujataani apparpassuit toquinnarsimanerinut peqqutaasut naluneqarallarput Saqqummersinneqarfia 27.02.2014

Nanortallip Nunap Isuatalu akornannni apparpassuit toquinnarsimasut ulluni makkunani siu-morneqartartut taqqavani piniartunit oqaatigineqarpoq. Pinngortitaleriffik taqqavanermiunik piniartunik isumaqatigiissuteqarpoq appanik toquinnarsimasunik aammalu sumiiffimmi nassaarfigisanit appanik pisaanik misissugassanik nassitseqqullugit. Taamaaliornikkut appat qanoq issusiat, aqajarormiui ilanngullugit, sanilliunneqarsinnaaniassammata.

Tassa Pinngortitaleriffimmeersunit appat kujataata imartaaniittut sooq toquinnarsimanerinut peqqutaasinnaasut maannaagallartoq ilisimaneqanngilaq, neriuutigineqarporli misissuinernit inernerit ukiup matuma naannginnerani piareerneqarnissaat.

”Appat toquinnarsimanerinut peqqutaasinnaapput nerisassaalatsineq imaluunniit silarlorujussuarsimasinnaavoq appat neriniarsinnaanerinut akornutaasumik. Taamaattoqarsimassappat appat sanngiinnerusut eqqugaaqqaarsimassapput, nalinginnaasumik piaraakkajunnerusarput (ukiumik aniguisimanngitsulluunniit. Neriuppunga misissuinissatta tamanna paasinarsisikkumaaraat, Pinngortitaleriffimmi Seniorforsker Flemming Ravn Merkel oqarpoq.

Ilisimatusartartoq Flemming Ravn Merkel kaammattuivoq ukiuni kingullerni qulini-20-i  taamaattoqartarnerinik ilisimannittut Pinngortitaleriffimmut saaffiginneqqullugit. Tassami Nunatsinni, Svalbardimi Islandimilu appat ikiliartortillugit ilisimatusartartut soqutigaat paasisaqarfigissallugu taamaattoqartarnera qanoq akulikitsigisumik pisarnersoq. Nunatta kujataata imartaa siuliani taaneqartut nunat timmiaannut piaqqisartunut ukiisarfiuvoq. Ilisimatusartartut soqutigaat nunatta kitaata imartaani – tassani Nunap Isuaniit avannamut Aasiaat tikillugit – timmissanik toquinnarsimasunik siumuisarnernik misigisaqarsimasunit tamanit attavigineqarnissartik.