Avaleraasartuut Tunup imartaani tamani siumugassanngorsimapput Saqqummersinneqarfia 18.08.2014
Assimi: Tunup imartaani Arni Frederiksson-imik misissuiffiit (= ammalortumik nalunaarsorneqarsimasut). Ammalortut nalunaarpaat avaleraasartuut kvadrasømilimut pisat kiilunngorlugit). Kisitsisit ataatungaanittut (sanimukaartut): allorniusat tukimukartut. Kisitsisit saneraatungaaniittut: allorniusat sanimukartut. Immap qalipaasersorneqarnera immap kissasusiata agguaqatigiissinnera ulluni 5. – 12- august takuneqarsinnaapput.
Pinngortitaleriffiup Tunup imartaani avaleraasartooqassutsimik misissuineri 12. August 2014 naammasseqqammerput. Misissuinernit inernerugallartut takutippaat imartaq misissuiffiusoq tamarmi avaleraasartooqartoq, misissuiffiusoq Tasiilap avataaniit nunap isuanut isorartussuseqarluni.
Nunatta avaleraasartooqassuseq misissortinniarlugu islandimiut ilisimatusaatigalugu umiarsuaat Arni Frederiksson attartorpaa, imartarlu misissuiffigineqartoq 200 sømilinik avasissuseqarpoq. Sumi tamaani avaleraasartuunik siumugassaqarfiuvoq – taamaallat imaq sinerissap qanittuaniittoq nillertoq peqarfiulaartaraluarluni piisappoq. Naak Nunatta kitaata kujataa suli misissuiffigineqanngikkaluartoq, taamaattoq biologit ilimagaat tamanna aamma avaleraasartooqassasoq.
“Inernerugallartunit uissuumminarnerpaaq tassaavoq Nunap isuata kujataatungaani aamma avaleraasartooqarmat, allaat sualinnik naammattuuisoqarluni”, Aalisakkanut Qalerualinnullu Immikkoortortami pisortaq Helle Siegstad oqarpoq.
Atlantikup Avannarliup imartaata kangiani annertunerpaartaani avaleraasartooqarpoq, tamanna nunat tamaani imartallit norskit misissuutaat marluk, savalimmiormiut ataaseq aammalu islandimiut misissuutaat ataaseq junip qiteqqunneraniit augustip qiteqqunneranut misissuinerannit erserpoq.
Biologit nunatsinneersut, Islandimeersut, Savalimmiuneersut Norgemeersullu ulluni makkunani ulupputileruttorput paasissutissat misissuinernit pissarsiarineqarsimasut suliareqqillugit. Inernerit nunarsuarmiut ilisimatuussutsikkut suleqatigiiffiata ICES-ip København-imi ulluni 26. august – 1. september ataatsimiinnissaani saqqummiunneqartussaapput.
Nunatta imartaani avaleraasartooqassutsimik naliliinerit nunarsuaq tamakkerlugu peqassutsimik naliliinermut ilanngunneqassapput. Pinngortitaleriffimmeersut ilisimatusartartut naatsorsuusiornissani taakkunani suleqataapput. Avaleraasartoortassiissutigineqarsinnaasut pillugit ilisimatuussutsikkut ICES-ip ataani 2015-imoortunik inaarutaasumik siunnersuinerit aatsaat oktoberip aallartinnerani piariissapput.
