Nunatsinni nipisat nungutaanissamut aarlerinartorsiunngillat Saqqummersinneqarfia 14.02.2014

Allattoq:  MiKv

Pinngortitaleriffiup nunatsinni aalisartut isumaqatigai, taakku oqarmata nipisat imartatsinniittut nungutaanissamut ulorianartorsiunngitsut. World Wildlife Foundations-ip (WWF) aalisakkanut ilitsersuusiaani saqqummertussanngortumi qularnanngilaq nipisak nungutaanissamut ulorianartorsiortutut allassimalissaaq aappaluttumik qalipaasigaalluni. Taamaaliortoqarnerata kingunerisaanik innuttaasut isumaqalersinneqarsinnaalissapput aamma nipisak nunatta imartaaniittartoq nungutaanissamut ulorianartorsiortoq.

Uppernarsineqarnikuuvoq nipisak nunatta imartaaniittartoq immikkooruteqartutut isigineqarsinnaasoq Atlantikup Avannaani nipisannit aammalu Islandip nipisaanit allaanerussuteqarluni. Pinngortitaleriffilli imartatsinni nipisaat amerlassusiat paasiniarlugu misissuineq ajorpoq, tassami nipisak aalisakkanut isaatitsilluaataasartunut allanut sanilliullugu nukinnik atuiffiuallaarnikuunngimmat. Taamaakkaluartorli tunisisarnernit paasissutissaatit aammalu aalisartut ataasiakkaat tunisinerit tamaasa paasissutissaataannik katersinikkut nipisaqassutsip qanoq innera ineriartorneralu nalilersorneqarsinnaavoq.

Pinngortitaleriffik nipisanniarnernik aalisartut suleqatiginerisigut malinnaavoq, taakku tunisinermit allagartatigoortunik paasissutissiisarmata sineriallu tamakkerlugu nipisannik pisanik katersanik Pinngortitaleriffimmut nassiussuisarmata. Nipisaat pisarineqartartut ukiuni kingullerni amerliartorput, kisiannili paasissutissaatit maannakkut pigineqartut naapertorlugit peqassuseq appariartortutut isikkoqanngilaq.

Pinngortitaleriffik aamma pisortat, tunisassiortut KNAPK-lu peqatigalugit nunatsinni nipisanniarneq pillugu aqutsinermik pilersaarusiaqalernissamik siunnersuusiornermi suleqataavoq. Taanna suliarineqarpoq nipisaat nunatsinneersut MSC-mik meqqilerneqarnissaat anguniarneqarmat. Nipisanniarneq piujuartitsinermik tunngaveqaqqullugu pilersaarutikkut immaqa anguneqassaaq nipisanniarnerup arlaatigut killilersorneqalernissaa. Aamma peqassuseq kiisalu nipisaat siaruarsimanerat malinnaaffiginiarlugu siunnersuutigineqarpoq tunisinerit tamaasa pisaasartut nalunaarsorneqaqqissaarneqartarnissaat aallaavigineqassasoq. Nipisaqassutsip biologinit misissuiffigineqartarnissaa maannaagallartoq pilersaaruteqarfigineqanngilaq aningaasartuutigineqartussat matumani eqqarsaataallutik.

Itinerusumik paasisaqarusunnermi saaffigisassaq:
Ilisimatusartoq Rasmus Berg Hedeholm oqarasuaat 361200 imal. email: rahe@natur.gl