*Required
*Required
*Required
*Required
*Required
*Required
*Required
*Required
Send
Thank you for your application!
 

Nunatta DCE-mik isumaqatigiissutaa sivitsorneqarpoq

Assimi: Avatangiisinut Pinngortitamullu Naalakkersuisoq Kim Kielsen aamma Ilinniartitaanermut Ilisimatusarnermullu Minister Sofie Carsten Nielsen DCE-isumaqatigiissut atsioqatigiissutigaat. Assiliisoq: Pinngortitaleriffik.

Avatangiisinut Pinngortitamullu Naalakkersuisoq Kim Kielsen aammalu Ilinniartitaanermut Ilisimatusarnermullu ministeri Sofie Carsten Nielsen sapaatip akunnera una Pinngortitaleriffimmi tusagassiortunik katersortitsipput. Tassani Nunatta Danmarkimik Nationalt Center for Miljø og Energi (DCE; siornatigut DMU, Danmarkimi Avatangiisinik Misissuiveqarfik) pillugu isumaqatiissutaata sivitsorneqarnera atsioqatigiissutigineqarmat.

Isumaqatigiissut aatsitassarsiornernut ikummatissarsiornernullu atatillugu avatangiisit pillugit siunnersuisarnerni ukiuni tallimani tulliuttuni anguniagaasunut attuumassuteqarpoq. Isumaqatigiissut naapertorlugu DCE Pinngortitaleriffillu pisussaapput Namminersorlutik Oqartussanut nangittumik siunnersuisussaatitaallutik, peqatigitillugu DCE pisussaaffiligaavoq ilisimasanik Pinngortitaleriffmmut tunniussuiutigaluni sulisunik Pinngortitaleriffimmiittunik piginnaanngorsaaqataassalluni.

Nunatsinni Aatsitassarsiornerit pillugit Avatangiisinut Aqutsisoqarfik aningaasanut inatsisitigoortumik DCE-mut ukiumoortumik akiliuteqartarpoq. Taakku DCE-p Pinngortitaleriffiullu aatsitassarsiorniarnernut ikummatissarsiorniarnernullu atatillugu qinnuteqartoqaraangat nalilersuinernut kiisalu avatangiisit sunnerneqarsinnaanerinik nalilersuinernik pitsaassusiliinernut aammalu apeqqutinut avatangiisinut tunngassuteqartunut akissuteqartarnernut atorneqartarput.

Kim Kielsen aamma Sofie Carsten Nielsen. Assiliisoq: Pinngortitaleriffik.

Taamaalilluni suliffissualiorniarnernut uuliaarluertoqarsinnaaneranulluunniit atatillugu avatangiisit pisuussutillu uumassusillit mianeriniarlugit iliuusissat eqqarsaatigilluagaasumik pilersaarusiorluagaasumillu pinissaannik ilisimasat annertusarneqarlutik. Ilisimasat tamakku Danmarkimut iluatinnaateqartuupput, tassami Danmark 3 sømil killeqarfiup avataani imaani avatangiisinut sillimaniarnermullu akisussaasuummat.

Namminersorlutik Oqartussat DCE-llu isumaqatigiissutaanik ukiunik tallimanik sivitsuinerup qulakkiissavaa Pinngortitaleriffimmi piginnaasanik sulisutigullu nukinik qaffassaanerup nalaani ikorfartuinissaq, peqatigitillugulu DCE-p Pinngortitaleriffiullu akornanni suleqatigiinnerup ingerlaqqinnissaa qulakkeerneqassalluni.