*Required
*Required
*Required
*Required
*Required
*Required
*Required
*Required
Send
Thank you for your application!
 

Pinngortitaleriffik Ilisimatusarfillu ingerlaqatigiinnialerput

Assimi: Nunatsinni ilinniartitaanertigut ilisimatusarnertigullu periarfissat annertusarniarlugit Pinngortitaleriffik Ilimmarfillu allorassaaqatigiinnialerput. Assimi takuneqarsinnaapput Pinngortitaleriffiup pisortaa Klaus Nygaard aamma Ilisimatusarfiup pisortaa Tine Pars. Asseq: Pinngortitaleriffik.

Allattoq:  EmKr/PeMi

Nunatsinni ilinniartitaanertigut ilisimatusarnikkullu periarfissat pitsanngorsarniarlugit Pinngortitaleriffik Ilisimatusarfillu peqatigiinnerunialerput. Ilinniarfeqarfiit allat kaammattorneqarput illoqarfiup ilaani ilinniarfeqarfimmik angisuumik pilersitsiniarnissamut peqataaqqullugit, taamaalilluni ilinniarneqarsinnaasut nutaat pilersinneqarniassammata aammalu ilisimatusarneq ilisimasanillu annertusaaneq qaffassarneqarniassammat. Ilinniarfeqarfissarsuaq Ilimmarfiup Pinngortitaleriffiullu inissisimaveqarfiini pilersinneqarsinnaasoq takorloorneqarpoq.

Ilinniarfeqarfissarsuarmik pilersitsiniarnermi anguniarneqarpoq ilinniarfeqarfiit periarfissarititaasa, pisinnaasaasa ilisimasaasalu kattullugit iluaqutigineqarnerulernissaat, aammalu ilinniartitaanikkut, ilisimatusarnikkut qaammarsaanikkullu immikkoortumik kateriffeqalernissaq. Taamaalilluni immikkoortitaarluni siuarsaaniarnermiit peqatigiilluni angusassaq anginerusunngortinniarneqarluni.

Pinngortitaleriffiup Ilisimatusarfillu suleqatigiinnerulernissartik qanittukkut isumaqatigiissutigaat. Suliffeqarfiit peqatigiillutik aningaasaliisartut nunatta avataniittut maaniittullumi kiminniarsarinialersaarpaat Nunatsinni ilinniarfeqarfiit ilisimatusarfeqarfiillu peqatigalugit aningaasaliissuteqarluni ineriartortitsisinnaanerup periarfissagissaarneranik.

”Nunatsinni Issittumilumi inuaqatigiinnut iluaqutissaq annertunerpaajutinniarlugu universitetinik ilisimatusarfeqarfinnillu allanik peqatiserinninnissamik isumaqatigiissuteqarpugut”, Ilisimatusarfiup rektoria Tina Pars oqarpoq.

Nunarput Issittumi nunanut allanut sanilliullugu immikkooruteqarpoq, namminerisamik ilisimatusarfeqarluni qaffasinnerusunillu ilinniarfeqarluni nunaqavillutik ilisimatusartartoqarlutik ilinniartitsisoqarlutillu. Taamaalilluni suliffeqarfiit avataaneersut suleqatiginninnikkut anginerusumik pilersitseqataanissamik periarfissagissaarput.

”Suut tamarmik ataqatigiinnerat eqqarsaatigalugu ilisimatusartariaqarnerit ukiuni makkunani pisariaqaleraluttuinnarput. Taamaattoqarnera peqqutaalluni ilisimatusariaatsit assigiinngitsut suleqatigiissittariaqarnerannik minnerunngitsumillu inunnut tunngasortaasa ilanngunneqarnissaannik pisariaqartitsineq annertusiartorpoq. Silap Pissusianik Ilisimatusarfeqarfik Nuummiittoq qallunaanit kalaallinillu ingerlanneqartoq taama ilisimatusartoqartariaqarneranik assersuutissaalluarpoq. Taama periuseqarluni ilisimatusarnerit suli siammasinnerulersinniarpagut”, Pinngortitaleriffiup pisortaa Klaus Nygaard oqarpoq.

Itinerusumik paasisaqarusunermi saaffigisassat:

Pinngortitaleriffiup pisortaa Klaus Nygaard oqarasuaat 361200 imaluunniit Ilisimatusarfimmi rektor Tine Pars oqarasuaat 385602.