Pinngortitaleriffimmeersoq Lene Kielsen Holm atuakkiani pillugu nersornaaserneqarpoq Saqqummersinneqarfia 28.07.2014
Atuagaq “The meaning of ice” (Betydningen af is”) julip aallartinnerani The William Mills Prize 2014-imik nersornaaserneqarpoq Issittut aamma Antarktis pillugit atuakkiat oqaluttualiaanngitsut pitsaanersaattut. Atuakkamik aqqissueqataallunilu peqataasimavoq Lene Kielsen Holm, Pinngortitaleriffimmi ilisimatuutut misissuisartuullunilu pilersaarummi pisortaasoq.
The William Mills Prize ukiut tamaasa The Polar Libraries Colluquy-imit Cambridge-miittumit agguaanneqartarpoq – tassanilu suleqatigiissitaq nunanit tamaneersunik inuttalik sulianik tammatsaaliortariaqartunik issittullu pillugit paasissutissanik siammarterinermut iluaqutaasunik katersuisarpoq. Atuakkanik 2014-imi nersornaasiinissamut inassutigineqarsinnaasunik 17-inik katersuisoqarsimavoq. “The meaning of Ice” makku tunngavigalugit ajugaatinneqarpoq:
“The Meaning of Ice”-imi issittuni immap sikua, Canadami, Alaskami Kalaallit Nunaannilu inuit isigisaralugulu inuuffigisaat, kinguaariippassuillu inussutissaminnik aallerfigisartagaat nersorniarneqarpoq. Issittuni inuiaqatigiinni pingasuni inuit 40-nit amerlanerusut atuakkami assigiinngitsutigut peqataasimapput oqaluttuarlutik, eqqumiitsuliorlutik, titartakkanik assilialiorlutik, nunap assinginik, ilaqutariit assinginik allaat nerisassiornermi ilitsersuutinik. Oqaluttuanut ilanngunneqartarsimapput assiliisut assilisaat assitoqqallu qangalu assilisaasimasut, meeqqat titartagaat kigartuillunilu titartakkat alutornartut.
“The Meaning of Ice” Issittut tassanilu inuusut piffissami pinngortitarsuarmi tassani pissutsit sukkasuumik allanngoriartorfigisaanni, minnerunngitsumillu immap sikuata allangoriartorfigisaani paasineqarnissaannut iluaqutaaqataassaaq. Atuakkap atuartoq aallaruttarpaa immap sikuanut, sikumik oqaluttuullugu, immallu sikuata pingaarutaanik paasitillugu.
Pinngortitaleriffiup Lene Kielsen Holm atuakkioqatigisimasaalu nersornaasigaanneranni pilluaqquai.
Lene Kielsen Holm
The Meaning of Ice: People and Sea Ice in Three Arctic Communities. Edited by Shari Fox Gearheard, Lene Kielsen Holm, Henry Huntington, Joe Mello Leavitt, Andrew R. Mahoney, Margaret Opie, Toku Oshima and Joelie Sanguya. Hanover, NH: International Polar Institute Press, 2013.
