Pinngortitaleriffimmi suliassaqarfik nutaaq Saqqummersinneqarfia 26.05.2014
Pinngortitaleriffimmi immikkoortortaqarfik nutaaq avatangiisinut, aatsitassanut ikummatissanullu tunngassuteqartutigut siunnersuinernik sammisaqartussaq ullumikkut pisortatigoortumik atoqqaartinneqarpoq. Immikkoortortaq arfineq sisamanik sulisoqarluni aallartippoq nunattalu avataaniit aningaasalersorneqarluni piviusunngorluni. Schweizimi qullersaqarfeqartoq aningaasaateqarfik Oak Foundation kiisalu Danmarkimeersoq VILLUM Fonden immikkoortortartaap sulisuinik pingasunik ukiuni pingasuni atorfeqartitsinissamut aningaasaliisuupput.
Taamaalilluni Naalakkersuisut Pinngortitaleriffiullu qangaaniilli kissaatigisaat piviusunngorpoq. Naalakkersuisut anguniagaraat avatangiisinut tunngatillugu siunnersuisarnerup ullumikkut Danmarkimi avatangiisinut misissuiveqarfimmit Nationalt Center for Miljø og Energi, Aarhus Universitet, DCE-mit akisussaaffigineqartup siunissami nunatsinnut nuunneqarnissaa.
“Immikkoortoqarfiup nutaap inerisarneqanera Nunatta DCE-llu ukiorpassuarni pitsaasumik suleqatigiissimanerisa taamaatikkiartuaarneqalerneratut isigineqassanngilaq. Attaveqaatinik kipisisoqassanngilaq, ineriartornermilli allanngornermillu pilersitsisoqassaaq, avatangiisitta pinngortitallu illersorneqarnissaannut pikkorinnerulernissarput ilisimasaqarnerulernissarpullu siunertarigatsigu”, Avatangiisinut Pinngortitamullu Naalakkersuisoq Kim Kielsen immikkoortortaqarfittaap atoqqaartinneqarnissaanut atatillugu erseqqissaateqarpoq.
Taamaattumik Naalakkersuisut sinnerlugit pingasuullugu Namminersorlutik Oqartussat, DCE-p Pinngortitaleriffiullu akornanni isumaqatigiissutip ukiunut tallimanut sivitsorneqarnissaa ukiormanna kingusinnerusukkut isumaqatigiissutigeqqinneqassaaq. Tassani isumaqatigiissutaavoq DCE pingaarnertut siunnersuisuusoq Pinngortitaleriffillu siunnersueqataasartutut inissisimasoq. Tamanna Pinngortitaleriffiup siulersuisuini siulittaasup aporfissaqartinngivippaa.
“Kalaallit Nunaanni avatangiisinut misissuiveqarfik, Grønlands Miljøundersøgelser, kingusinnerusukkullu DCE ukiut 40-t ingerlanerini ilisimasarpassuaqalersimapput, ilisimasarpassuit tamakku ukiualunnguit ingerlanerini Kalaallit Nunaannut nuuginnarsinnaanngilagut. Qanoq iliornissavut tamaasa eqqarsaatigeqqissaartussaavagut minnerunngitsumillu silassorissaartariaqarpugut”, Gert Mulvad oqarpoq, nangillunilu:
“Suli ineriartorusuppugut, siunissamilu avatangiisit pillugit siunnersuinermut tunngassuteqartut akisussaaffigilerusuppagut. Tamakkumi tungaasigut akisussaaffik allanut Kalaallit Nunaata avataaniittunut isumagitittuaannarsinnaanngilarput.
Avatangiisinut, Aatsitassanut Ikummatissanullu Immikkoortortaqarfik avatangiisit tungaasigut uumaatsulerinerup, avatangiisini tappiorannartulerinerup , aatsitassalerinerup uuliasiornerullu avatangiisinut sunniutigisinnaasaanik misissuinerup, nunamik mingutsitsinerup ilinniartitsinerullu tungaasigut siunnersuinissamut tunngassuteqartuni 2014-imi ukiakkumiilli siunnersueqataalersinnaassapput.
Immikkoortoqarfittaaq siunissami suli amerlanerusunik ilisimatutut misissuisartunik sulisoqalersinnaavoq, taamaalillunilu misissuinikkut suliassanik, immikkut sammisassanik ph.d-ngorniutinillu aallartitsisarsinnaalissalluni.
Oqalugiaatit
Pinngortitaleriffiup siulersuisuisuini siulittaasup Gert Mulvadip oqalugiaataa.
Avatangiisinut Pinngortitamullu Naalakkersuisup Kim Kielsenip oqalugiaataa.
Itinerusumik paasisaqarusunnermi saaffigisassat
Pinngortitaleriffiup siulersuisuini siulittaasoq Gert Mulvad oqarasuaat 483285 imaluunniit suliassaqarfimmut tunngassuteqartuni Immikkoortortami pisortaagallartoq Josephine Nymand oqarasuaat 361200.
