*Required
*Required
*Required
*Required
*Required
*Required
*Required
*Required
Send
Thank you for your application!
 

EU-p issittumi ilisimatusarnerit annertusaaviginiarpai

Europap nunarsuup issittortaani ilisimatuussutsikkut misissuinernik ingerlatai annertusarniarlugit suliniutit nutaat EU Horizon 2020-programme aqqutigalugu aningaasaliiffigineqarput.

Allattoq:  PeMi

Suliniutikkut 2 million Euronik aningaasaliiffigineqartukkut 2020-llu tungaanut ingerlanneqartussami Europami ilisimatusarfeqarfiit 22-t, nunarsuaq tamakkerlugu ataqqisaasut, suleqatigiissinneqassapput. Taamaaliornermi siunertarineqarpoq europamiut issittuni ilisimatusariaasiisa 2020-p tungaanut siuarsarneqarnissaat ataqatigiissarneqarnissaallu.

Suliniut EU-PolarNet programme-mik taaguuteqartinneqartoq aallartiinnartoq ilisimatusarnernik ingerlataqartartut susassaqarsinnaasullu ilisimatusaatigisinnaasaminnik siunnersuusioqquneqassapput. Ilisimatusaatigalugu suliniutinit Europami inuiaqatigiit taakkulu aningaasaqarnerinut siuarsaataasumik kinguneqarnissaat anguniarneqarpoq.  Kiisalu EU-Polarnetsikkut politikerit, inuussutissarsiorfiit suliffissuaqarnermilu aqutsisut, sumiiffinni inuiaqatigiit ilisimatusartartullu oqaloqatigiiffigisinnaasaannik pilersitsisoqarpoq, taamaalilluni europamiut Qalasersuarmi Avannarlermi Kujallermilu ataqatigiissumik ilisimatusarnernik suliaqartalerniassammata.

Apeqqutit nunarsuup issittoqarfiinut tunngassutillit ukiuni qulikkaani kingullerni Europami tamarmi politikkikkut oqallittarnerni soqutigineqaraluttuinnarsimapput. Europami nunat naalakkersuisuisa massakkut aningaasaliiumassuseqarnerulernerat soqutiginninnerulersimanermut ersiutaavoq, tassami issittuni siunertaqarluartumik misissuisoqartarnissaa politikikkut siunniusanik ilusilersueqataasalersimammat, tamakkununnga ilaallutik: silap pissusiata allanngoriartornera, nukissiorneq isumannaatsoq, nunarsuarmi tamarmi inuussutissaqarnerup isumannaatsuunissaa, inerisaanermut aningaasaqarnikkullu ineriartornermut tunngassutillit. Kiisalu apeqqutit issittoqarfinnut tunngasut suulluunniit pimoorunneqarnissaat aammalu siunnersuisoqartarnissaa pillugit Europa-Kommissionimik qanittumik suleqateqarnissaq EU-PolarNet-imut pingaarluinnartuuvoq.

“Nutaamik ataqatigiissumik suliniuteqartoqarnera Europa-Kommissionip nuannaarutigaa, tassami ilisimatuussutsikkut nunarsuup Qalasersuaqarfiinut tunngassutilitsigut ilisimatusarnerit soqutigisallu allat ataatsimoortinneqarmata. Tassanimi apeqqutinut issittunut tunngassuteqartunut nunarsuatsinullu ataatsimoorussatsinnut iluaqutaasussanik oqallittarfimmik “angerlarsimaffimmik nutaamik” pilersitsisoqarpoq, Dr. Andrea Tilche oqarpoq. Taanna Climate Action and Earth Observation Unit-imi, Europa-Kommission GD for Forskning og Innovation-imiittumi pisortaavoq.

Pinngortitaleriffik ilisimatusarfeqarfinnut peqataasussanut EU-PolarNet-imut 22-nut ilaavoq.

“Pinngortitaleriffiup Kalaallit Nunaanni suliffeqarfiusup europamiut ilisimatusarnikkut suliffeqarfiinut tusaamasaasorujussuarnik peqateqarluni suliniuteqalernera nuannaarutissarujussuuvoq. Pinngortitaleriffiup nukittoqutaasa ilagaat pitsaalluinnartunik, Issittuni tamarmi ukioq kaajallallugu misissuinissamut atorsinnaasunik atortuuteqarnini. Pinngortitaleriffik aamma atuagarsornikkut teknikikkullu ilinniarluarsimasunik sulisoqarpoq, immikkut ilisimasaqarnertik pisinnaassuseqarnertillu atorlugit suleqataaanissamut ajukkunnanngilluinnartunik. Europamiut suleqatigiiffiata Kalaallit Nunaanni ilisimasat suliniutillu ilisimaneqalersissavaat“, Pinngortitaleriffiup pisortaa Klaus Nygaard oqarpoq.

EU-PolarNet-ip suliniuteqartarnera Alfred Wegener Institut for Polar-og Marinforskning-imit Tysklandimiittumit ataqatigiissarneqartarpoq.

Suliniutigineqartussaq tassanilu peqataarusuttut pillugit paasissutissat amerlanerusut uani pineqarsinnaapput: www.eu-polarnet.eu

Imaluunniit:
Professor Søren Rysgaard, Arctic Research Centre, på mail: rysgaard@remove-this.natur.gl

 

EU-PolarNetimi suleqataasut:

Agecia Estatal Consejo Superior de Investigaciones Cientificas (CSIC)
Alfred Wegener Institut Helmholtz Zentrum für Polar und Meeresforschung (AWI)
Arctic Monitoring and Assessment Programme Secretariat (AMAP)
British Antarctic Survey (NERC-BAS)
Bulgarian Antarctic Institute (BAI)
Centre National de la Recherché Scientifique (CNRS)
Consiglio Nazionale Delle Ricerche – Department of Earth System Science and Environmental Technologies. (CNR-DTA)
Geological Survey of Denmark and Greenland (GEUS)
Grønlands Naturinstitut (GINR)
Institut Polaire Français Paul Emile Victor (IPEV)
Institut Royal des Sciences Naturelles de Belgique (RBINS)
Instituto de Geografia e Ordenamento do Território da Universidade e Lisboa (IGOT-UL)
Instytut Geofizyki Polskiej Akademii Nauk (IGF PAS)
Ministerio de Economía y Competitividad (MINECO)
Norges Forskningråd  (RCN)
Oulun Yliopisto (UOULU)
Polarfoskningssekretariatet (SPRS)
Rijksuniversiteit Groningen (RUG)
Tallinna Tehnikaülikool (IG TUT)
Universität Wien – Austrian Polar Research Institute (UW-APRI)
Vrije Universiteit Brussel (VUB)