*Required
*Required
*Required
*Required
*Required
*Required
*Required
*Required
Send
Thank you for your application!
 

1. g-mi ilinniartorpassuit Pinngortitaleriffimmut pulaarput

Assimi: Biologinut ikiortaasup Jakob Lundip raajat suiaassusiat qanoq ililluni aalajangiunneqartarnersoq takutippaa.

GUX-Nuuk-mi 1. g-mi ilinniartut tamarmik sapaatip akunnerani kingullermi Pinngortitaleriffimmut pulaarput. Marlunngornermi pingasunngornermilu ilinniartunik 100-it sinnilinik Pinngortitaleriffimmiittoqarpoq, ilinniartullu tulleriiaarlutik “paasisassarsiorfissat” assigiinngitsut qulit ornittarpaat, taakkunanilu biologassistentinit ilisimatuutullu misissuisartunit oaluttuunneqarlutillu ilitsersuunneqartarlutik.

Taamaaliortoqarpoq ilinniartut Pinngortitaleriffimmi sulerisoqartarneranik oqaluttuunniarlugit immaqalu aamma assistentitut ilisimatuutulluunniit misissuisartuulluik biologimik geologimilluunniit sammisaqalerusussinnaasunik kajumissaarinissaq siunertaralugu. Tamakku Kalaallit Nunaanni pisariaqartinneqarput, nunaqavissullu tikilluaqqunangaarput.

Ilinniartut arlalissuit – immaqa aatsaavissuaq – saarullinnik ammarlaanik assamminnik attuipput. Nangaagaluarsinnarlutik saarulliit siunnaannik kusanarluinnartunik namminneerlutik tigusigaangamik alutorsarluinnartarput.  Taamaaliornerup siunertaa inip tulliani misigilluartarpaat, siunnaat misissornerisigut saarulliit qassinik ukioqarnerat misissorsinnaanngortaramikku.

Amerlanerillu aamma raajat suiaassusiannik misissuineq misilippaat, paasillugulu raajat inuusuttuaqqat allamik suiaassuseqartuusaaginnartanngitsut. Inersimasunngoraangamimmi ataatanngorlutillu anaananngortarput. Uumasunilli masattormiunik sammisaqartinneqaannaratik inini allani aamma filmertinneqarlutillu Pinngortitaleriffiup asimi sulisarneranik kiisalu silap pissusaanik, timmissanik, uumasuaqqanik immap natermiunik, aalisakkanik arfernillu misissuisarneranik oqalugiarfigineqatsiartarput.

GEUS, De Nationale Geologiske Undersøgelser for Danmark og Grønland, Pinngortitaleriffiup ilinniarnertunngorniartunik pulaartitsinerani ukiut aappassaanni aamma peqataavoq ujaqqanik aatsitassanillu Kalaallit Nunaanneersunik takutitsilluni.

Pinngortitaleriffiup GEUS-illu tungaanniit isigalugu ulloq iluatsilluarpoq, soqutiginninnerujussuarlu takutinneqartoq tunngavigissagaanni ilinniartorpassuit aamma taamatut isumaqarunarut.