Ilisimatuussutsikkut allaaserisaq Pinngortitaleriffimmeersoq nunarsuarmioqatitsinnit uitsataaqisoq Saqqummersinneqarfia 19.04.2015

Allattoq:  PeMi

Issittup imartaani miluumasut pillugit ilisimatuussutsikkut allaaserinnittarfimmi ataqqisaasumi Conservation Biology-mi qaammammi kingullermi ilisimatuussutsikkut allaaserisaq saqqummermat nunarsuarmioqatitsinnit tupinnaannartumik soqutigineqangaarluni uitsatigineqarsimavoq. Allaaserisaq Issittup imartaata miluumasuinik issittumullu ilisarnaataalluartunik killiffissiuilluni naliliinerusoq Pinngortitaleriffimmi seniorforskeritut atorfeqartumit pingaarnertullu allattuusumit Kristin L. Laidremit siuttuuffigineqarluni suliaavoq. Ilisimatusartartut arlalippassuit Norgemit, Ruslandimit, USAmit Canadameersullu allaqataapput aamma Pinngortitaleriffimmi Miluumasunut Timmissanullu Immikkoortortaqarfimmi pisortaasoq Fernando Ugarte minnerunngitsumillu Pinngortitaleriffimmi ukiorpassuarni nanulerisuulluni ilisimatusartuarsimasoq Erik W. Born allaqataallutittaaq.

Conservation Biology-mi ilisimatuussutsikkut allaaserisanit 1.257-iusunit saqqummiussaq uani pineqartoq issuarneqarnerpaat arfiniliattut inississimavoq. Tassa issuaanerit matumani pineqartut aammalu innersuussinerit amerlassusiat, internetsikkoortut, inuit akornanni qarasaasiatigoortumik attaveqatigiittarfitsigut nutaarsiassaqartitsivinnilu tamaginni maluginiarneqarluni saqqummiunneqarnerata amerlassusiat matumani pineqarluni. Taamaalilluni ilisimatuussutsikkut allaaserisaq marts 2015-miit saqqummertuni nunarsuaq tamakkerlugu issuarneqarnerpaarpaanut ilanngulluni.

Seniorforsker Kristin L. Laidre allaqataalu ilaatigut Danmarkimi avatangiisinut aqutsiveqarfiup aningaasaliissutigisartagaasa ilaannit Dancea-mit aammalu USA-mi naalakkersuisut avataarsualerinermik aqusiveqarfianit, NASA-mit, aningaasaliiffigineqarlutik Issittumi uummasoqassutsip assigiinngisitaassusia naliliiffigalu nalunaarusiarsuarmi Arctic Biodiversity Assesment–imi siorna innersuussutigisaminnik allaaserisakkut pineqartukkut malitseqartitsillutik suliaqarput. Allaaserisami qaammammi kingullermi saqqummertumi nutaartaaput Issittumiittut imartat sikuisa ineriartornerannik nalilersuinerit.

Pinngortitaleriffiup nittartagaani tusagassiortup namminersortup, Virginia Gewin-ip, USA-meersup atuagassiami tusaamasaasumi Science Magazine-mi ilisimatuussutsikkut allaaserisaq pillugu allaatigisaa aammalu National Geographic-ip allaaserisaa atuarneqarsinnaapput.

Aamma ilisimatuussutsikkut allaatigisap imarisai pillugit Pinngortitaleriffiup Namminersorlutik Oqartussanut ilisimatitsissutaa nittartakkatsinni atuarneqarsinnaavoq.

Itinerusumik paasisaqarusunnermi saaffigisassaq:

Miluumasunut Timmissanullu Immikkoortortaqarfimmi pisortaq Fernando Ugarte oqarasuaat 361200 imal. email: feug@natur.gl