*Required
*Required
*Required
*Required
*Required
*Required
*Required
*Required
Send
Thank you for your application!
 

Kalaallit Nunaat Japanilu ilisimatusarnerup tungaatigut qanillattorniarput

Pinngortitaleriffik Japanimilu Nationale Polarforskningsinstitut ullumi oqaluttuarisaanermut pingaarutilimmik suleqatigiinnissaq pillugu isumaqatigiissummik atsioqatigiipput. Isumaqatigiissut taanna taamaattut siullersaraat suleqatigiilerumasullu neriuutigaat atsioqatigiinnikkut nunat taakku akornanni ilisimatusaqatigiittarnerit tungaatigut ungasissimaneq qaninnerulerumaartoq.

Japan Qaanaap eqqaani sermersuup aakkiartornera pillugu ilisimatusarnernik ingerlataqareerpoq, Kalaallit Nunaannili ilisimatusarnikkut ingerlatani Pinngortitalerimmik suleqateqarnikkut annertunerulersinniarlugit. Illuatungaanilu Pinngortitaleriffiup aamma japanimiut uumassuseqassutsip ataqatigiinneranut ammalumi silap pissusianut tunngasutigut ilisimatusaatigereersimasaat  tamakkulu inunnut sunniutigisartagaannut tunngasutigut ilisimatusartarnerat annerusumik iluaqutigerusuppai. Taamaattumik illuatungeriit silap pissusiata kalaallinut nunarsuarmiunullu tamanut sunniutigisimasaasa ilisimatusaatigineqarnerat nukittorsaavigerusuppaat.

“Issittumi pisut Japanimi uagutsinnut sunniuttartorujussuupput. Silap pissusiata allanngornerata sunniutaannaaluunniit uagut qanimut malugilluartarpagut ilaatigut ukiumi apinerusalerneratigut aasaamilu siallerajunnerulerneratigut. Taamaattumik nunat tamat akornanni ilisimatuutut misissuisarnerit pitsaanerulernissaanik pisussaaffeqarpugut, nunarsuarmi inuiaqatigiissuit allannguutit sunniutigiumaagaasa sillimaffiginiarnissaannut siorngiiniarnerni pikkorinnerulerniassagatta”, professor Kazuyuki Shiraishi, Japanimi Nationale Polarforskningsinstitutimi pisortaasoq oqarpoq. Ilisimatusarfik taanna Pinngortitaleriffimmut isumaqatigiissutip atsioqqammerneqartup saniatigut aamma nunarsuarmi ilisimatuutut misissuisarneq pillugu isumaqatigiissutinik allanik 19-inik atsioqatigiissuteqarsimavoq.

“Ullumi maaniissinnaagama qujamasullungalu tulluusimaarpunga, upperilluinnarparalu suleqatigiinnissamik isumaqatigiissuterput ataatsimoorluta anguniakkatsinnut iluaqutaalluarumaartoq Japanilu kalaallit inuiaqatigiit iluaqutigisinnaasaannik tunniusseqataajumaartoq”, japanimiut ambassadøriat, Seishi Suei, Kalaallit Nunaata Japanillu suleqatigiinnissamik isumaqatigiissutaata atsiorneqarnerani  najuuteqataasoq oqarpoq.

Pinngortitaleriffiup pisortaa, Klaus Nygaard, Japanimilu Issittumut Ilisimatusarfiup pisortaa, Prof. Kazuyuki Shiraishi, Nunatsinni nunanut allanut Naalakkersuisoq, Vittus Qujaukitsoq, Japanillu aallartitaa, Ambassadør Seishi Suei, avaleralugit suleqatigiinnissamik atsioqatigiipput. Asseq: Pinngortitaleriffik.

Pinngortitaleriffiup aamma suleqatigiinnissaq pillugu japanimiut Polarforskningsinstitutiannut, angisoorujussuulluni suliassaqarfinnik arfineq pingasunik immikkoortortalimmut, isumaqatigiissuteqarneq nuannaarutigaa. Ilisimatusarfiup taassumap pisinnaasaqarfiginerpaavai silasiorneq, sermip pissusaanik misissuineq, avataannarsua silaannaallu ilaata avalliup pissusaanik ilisimatuutut misissuinerit aammalu Sikuiuitsumi Kujallermi ilisimatuutut misissuineq misilittagaqarfigilluarlugu.

“Isumaqatigiissuteqarneq suleqatigiinnikkullu ingerlatassat tassuunakkut pilerumaartut eqqarsaatigalugit Pinngortitaleriffiup naatsorsuutigaa, japanimiut Kalaallit Nunaanni suliarisartagassaat Kalaallit Nunaannut tunngasuunerullutillu Kalaallit Nunaat suleqatigalugu ingerlanneqartarumaartut. Tassami japanimiut Qaanaami ingerlataat ilisimatuutut misissuinernut Silap Pissusianik Ilisimatusarfeqarfip Pinngortitaleriffimmiittup ingerlataanut naapertuulluinnarput. Tassunga atatillugu sermersiorluni ilisimatuutut misissuinerit silap pissusianik, uumassuseqassutsip ataqatigiinneranut inuiaqatigiinnullu attuumassuteqartunik ilisimatusarnernut sangutinniarneqarumaarput”, Pinngortitaleriffiup pisortaa Klaus Nygaard oqarpoq.

Suleqatigiinnissamik isumaqatigiissummi atsiorneqartumi pineqarput sulisunik, paasissutissanik katersukkanik allanillu illuatungeriinnut soqutiginaateqartunik paarlaasseqatigiittarnissat. Illuatungeriit aamma ajornanngiffiini ilisimatusarnikkut suleqatigiittarnissaq, illuatungerisallu iluaquserneqarsinnaassappata aningaasartuutinik avitseqatigiittarsinnaaneq soqutigilluinnarpaat.

Itinerusumik paasisaqarusunnermi saaffigisassaq:
Pinngortitaleriffiup pisortaa Klaus Nygaard atorlugu tlf. +299 361200 imaluunniit email: nygaard@natur.gl.