*Required
*Required
*Required
*Required
*Required
*Required
*Required
*Required
Send
Thank you for your application!
 

Naalakkersuisoq akisussaasoq alakkarterivoq

Assimi: Pinngortitamut, Avatangiisinut Inatsinillu Atortitsinermik Naalakkersuisup Mala Høy Kúkop Pinngortitaleriffiup pisortaa Klaus Nygaard uani oqaloqatigaa.

Allattoq:  PeMi

Tunup imartaani aallartittumik piffissami aggersumi arfernik anginernik timmisartoq atorlugu kisitsinerit aallartinneqalerput; Illoqqortoormiit eqqaanni qilalukkanik qernertanik nassitsissutilersuinerit ingerlanneqaleruttorput; Tunup sineriaani nannunik misissuinerit annertoorujussuit ukiuni makkunani ingerlanneqaleruttorput, Tunup imartaa pingaarnerutillugu avaleraasartooqassutsimik misissuinerit naammasseqqammerneqarput, aammalu Tunup avannaarsuani ukiuni 20-ni qaangersuni silap pissusia malinnaavigineqarluni misissuinerit ingerlapput.

Pinngortitamut, Avatangiisinut Inatsinillu Atortitsinermik Naalakkersuisup Mala Høy Kúko-p Tunumi misissuisarnerit pineqaleraangata immikkut soqutiginninnera paatsuugassaanngilaq –  Tasiilarmiuugamimi. Tamanna erseqqippoq Naalakkersuisoq Pinngortitaleriffiup ingerlanneqarneranut akisussaasuusoq 13. august 2015 maanga alakkartereqqimmat.

Mala Høy Kúko Naalakkersuisutut ivertitinneqarnermi kingorna Pinngortitaleriffimmi suliassat malinnaaffiginiarlugit arlaleriarluni alakkaattarpoq. Alakkaateqqinnermini arferit mikinerit anginerillu aammalu Silap Pissusianik Ilisimatusarfiup suliassaqarfigisai pillugit itinerusumik paasitinneqarnissani immikkut kissaatigisimavai.

Silap Pissusianik Ilisimatusarfiup pisortarigallagaata Malene Simonip ilisimatusarfeqarfiup ukiunut tallimanut tulliuttunut iliuusissatut pilersaarutaa nutaaq anguniagaasullu saqqummiuppai. Iliuusissatut pilersaarummi qitiutinneqarpoq ukiuni aggersuni ilisimatusarnerit kalaallinik inuiaqatigiinnik akuutitsinerunissaat aammalu ilisimatusarnerit inuiaqatigiinnit pisariaqartinneqarnerusut toqqaannartumillu atorsinnaassuseqarnerusut sammineqarnerunissaat.

Silap Pissusianik Ilisimatusarfik imaani pissutsinut tunngassuteqarnerusunik suliaqarpoq, tassa imaani uumassuseqassutsip ataqatigiinnerata allannguutaanik misissuinerit, uumasut nerisassaqarnerinut toqqammaviusut allannguutaannut, immap sarfaata allanngorneri kiisalu imartat sikuisa allanngornerisa kingunerisaanik allannguutinik nalunaarsuinerit uppernarsaanerillu suliarineqartarlutik. Ilisimatusarfeqarfiup silap pissusiata allanngoriartornera malinnaaffiginiarlugu misissuinerit annertuut Tunup avannaarsuani Nuullu eqqaani kangerlunni ingerlataraattaaq. Kiisalu nutaatut imaani uumassuseqassutsip ataqatigiinneranut tunngassuteqartunik avaleraasartuunik misissuinernut ilanngullugu Tasiilap avataani ungasinngitsumi misissuisoqarpoq. Misissuinerit taama ittut aamma Qeqertarsuup Tunuani 2016-imi ingerlanneqarnissaat pilersaarutaavoq.

Tamakku saniatigut immap naqqata uumassuseqassusianik misissuinerit ingerlanneqaleruttorput. Suliniut Pinngortitaleriffiup immikkoortortaanik arlalinnik peqataatitsilluni kalluaasussaavoq, immap naqqatami uumasui uumasui nunarsuaq tamakkerlugu aalisakkanik MSC-mik meqqilersuisarnermi toqqammaviusutut pingaaruteqaqimmata.

Taamaalilluni Pinngortitamut, Avatangiisinut Inatsinillu Atortitsinermik Naalakkersuisoq Mala Høy Kúko Pinngortitaleriffiup ilisimatusaatissanik nutaajunerpaanik ingerlannialersaagaanik saqqummiiffigineqarpoq.