Nunatta imartaani avaleraasartuunik misissuinerit nutaat Saqqummersinneqarfia 27.07.2015
Assimi: Immap assingani takuneqarsinnaapput Nunatta imartaani avaleraasartooqassutsimik misissuinissat ingelaar-fissaat aammalu misissuutissap aappaata Birtingurip assinga. Kisitsisitaanni avaleraasartuunik qaloorfiusus-satut pilersaaruteqarfigineqartut ersipput aammalu tappiorannartut misissugassallu allat katersorneqarlutik. Asseq ilanngunneqarsimasoq tassaavoq Birtingur.
Pinngortitaleriffiup Nunatta imartaani siaruariartornerat malinnaaffiginiarlugu ukiumoortumik avaleraasartuunik misissuisarnini aqaguagu aallartissavai. Pinngortitaleriffik avaleraasartooqassutsimik misissuinerit pingajussaannik ingerlatsilerpoq, sapaatit akunnerinilu marlunni misissuisoqassalluni. Nunatsinniit ukiormanna misissuinissanut attartorneqarput Islandimiut ilisimatusaatigalugu misissuutaat Arni Fridriksson avaleraasartoorniutigisartagaallu Birtingur. Pinngortitaleriffimmeersut ilisimatusartartut aammalu ikiortaat umiarsuarni pineqartuni misissueqataasusssaapput.
Imartat ukiormanna misissuiffigineqartussat tassaapput Tasiilamiit Nunap Isuanut kiisalu Nunatta kitaata kujasinnerusortaata imartaa. Kitaata imartaani misissuinissat immap nillertiffia tikillugu ingerlanneqarnissaat naatsorsuutigineqarpoq, naatsorsuutigineqarmammi avaleraasartuut immami nillertumiinnaviarunannginnissaat.
”Atlantikup avannaata imartaata qaavatungaa ukiormanna siornamut sanilliullugu manna tikillugu nillerneraaq, taamaattumillu pissanganassaaq avaleraasartuut ukiormanna siornatullu kippariarsimatigisinnaanissaat takussallugu. Siorna misissuinerni Nunap Isua tikillugu avaleraasartooqarpoq, taamaammallu kitaata kujasinnerusortaata imartaani aamma peqarsinnaanissaa ilimagineqarluni”, ilisimatusartartoq Teunis Jansen Pinngortitaleriffimmeersoq oqarpoq.
Kilisaatersortut Nunatsinneersut Tunup imartaani avaleraasartuunik 78.000 tonsinik siorna pisaqarput, ukiormannamullu Kalaallit Nunaannut 85.000 tonsit pisassiissutaapput. Atlantikup avannaani avaleraasartoortassiissutissanik agguaassisarnerni Nunatta qanoq annertutigisumik pisassinneqarnissamik piumasaqarsinnaatitaaneranut Pinngortitaleriffiup imartatsinni avaleraasartooqassutsimik misissuisarneri aalajangiisuulluinnartussaapput.
Pinngortitaleriffimmeersut misissuinissaat norskit umiarsuaannut marlunnut, Savalimmiormiut Islandimiullu tamarmik ataatsimik misissuutaannut piffissami pineqartumissaaq namminneq imartaminni misissuinissaannut ataqatigiissarneqassapput. Misissuinernit paasissutissat pissarsiarineqartut Atlantikup avannarliup imartaani peqassutsimik tamarmiusumik nunat tamalaat nalilersuinissaanni atorneqartussaapput. Nalilersuinissani taakkunani ilisimatusartartut Pinngortitaleriffimmeersut naatsorsuinertaanni pingaarutilimmik peqataatinneqartussaapput.
Nunat tamalaat imaani ilisimatusartarnerit pillugit ataatsimiititaliaani ilaasortat qaammammi tullermi ulluni 25.-31. august Spaniami ataatsimiittussaapput, misissuinernillu inernerit qulaani pineqartut tassani saqqummiunneqartussaallutik. ICES´imit inaarutaasumik 2016-imut biologit siunnersuinissaat naatsorsuutigineqarpoq ukiormanna oktoberip aallartisimalernerani pissasoq.
Itinerusumik paasisaqarusunnermi saaffigisassaq:
Aalisakkanut Qalerualinnullu Immikkoortortaqarfimmi ilisimatusartoq Teunis Jansen oqarasuaat +45 61308828 imal. email.
