*Required
*Required
*Required
*Required
*Required
*Required
*Required
*Required
Send
Thank you for your application!
 

Nunatta imartaani saattuaqassuseq appasittumiittuarsinnarpoq

Allattoq:  PeMi

Qeqertarsuup Tunuata, Uummannap Sisimiullu eqqaanni saattuaqassuseq suli appasittuarsinnarpoq. Saattuaqassuseq pitsaap tungaanut saatinniarneqassappat, taava pisassiissutigineqartartut suli apparneqartariaqassapput. Pinngortitaleriffiup ukiunut 2015 aamma 16-imut saattuarniarnissat pillugit siunnersuinera taama eqikkarneqarsinnaavoq, taannalu Naalakkersuisunut tunniunneqareerpoq.

Qeqertarsuup Tunuani 2015-imi saattuartarineqartussat 400 tonsit sinnertariaqanngikkaluaraat biologit siunnersuipput, tamannalu siorna innersuussutinut sanilliullugu 200 tonsinik appariarneruvoq. Siunnersuinermut tunngaviuvoq saattuuanik inerissimasunik peqassuseq appariartuinnarmat aammalu saattuaaqqanik siunissami aalisarneqarumaalersussanik taakkussuuttoqarpiannginnera.

Sisimiut eqqaanni sinerissap qanittuanut avataanullu pisassiissutigineqarsinnaasutut innersuussutit allannguuteqanngillat. Avataani saattuarniartarneq suli matoqqagallartineqartariaqaraluarpoq, tamaanimi suli saattuaqarpianngimmat. Sinerissap qanittuanut pisassiissutigineqarsinnaasutut innersuussutit allannguuteqanngillat.

Nuup Paamiullu akornanni saattuaqassuseq aalaakkaasumik inissisimavoq, taamaattumillu innersuussutaasut allannguuteqanngillat. Paamiut eqqaanni sinerissap qanittuanut 200 tonsit avataanullu 1.000 tonsit saattuartassiissutigineqarsinnaasut innersuussutigineqarput.

Pinngortitaleriffiup ilanngullugu innersuussutigaa qaammatit saattuarniarfiusartut marsimiit juulimuusariaqaraluartut, taamaaliornikkut qituttunik qalerualinnik avammut eqqaaginnartarneq ingalassimatinneqarsinnaassagaluarmat. Taamaaliortoqaraluarpammi saattuanik nutaanik siunissami aalisarneqarsinnaalersussanik pilersuineq qulakkeerneqassagaluarpoq, taamaalillunilu atorluaanerusoqalissagaluarluni.

Saattuartassiissutigineqarsinnaasut pillugit siunnersuinerit ukiut allortarlugit pisarput, ukiumoortumillu misissuinertigut malunnaatilimmik allanngortoqarsimaneranik paasisaqartoqarpat siunnersuineq nalimmassarneqarsinnaavoq.

Saattuarniarneq iluanaarutaanerpaavoq 2001-imi, taamani pisat katillugit 1.500 tonsit missaanniimmata. Taamanerniilli pisat ikiliartorsimapput siornalu pisarineqartut katillugit 2.000 tonsit missaanniipput.

Aqutsiveqarfinni ataasiakkaani 2015 aamma 2016-imut pisassiissutigineqarsinnaasutut innersuussutit.

Itinerusumik paasisaqarusunnermi saaffigisassaq:

 Ilisimatusartoq AnnDorte Burmeister oqarasuaat 361200 imal. mail: anbu@natur.gl