*Required
*Required
*Required
*Required
*Required
*Required
*Required
*Required
Send
Thank you for your application!
 

Tunumi nannut ilisimatusartartunit Pinngortitaleriffimmeersunit malinnaaffigineqarsinnaanngorput

Assimi: Nanorsuit angutivissat pingasut Tunumi Kangerlussuup kujataatungaani. Asseq: Kristin L. Laidre

Allattoq:  PeMi

Tunup kujataatungaata imartaaniittut nannut arnavissat qulit iluatsilluartumik qaammataasanut nassitsissutilerneqarput qungasequtsersorneqarlutik, allallu angutivissat inersimasut inuusukaajunerusullu siutaasigut mikisunnguanik nassitsissutilersorneqarput. Taamatut upernaajunerani nannunik nalunaaqutsersuinerit aatsaarpiaq pipput. Taamaalilluni aamma ilisimatusartartut Pinngortitaleriffimmeersut siullermeersumik nannunik Tunumiittunik ingerlaariaasiinillu qaammataasakkoortumik malinnaaffiginnissinnaanngorput.

Pinngortitaleriffimmeersut ilisimatusartartut seniorforsker Kristin L. Laidre siulersortiliullugu ulluni makkunani Tunup kujasinnerusortaata imartaani nannunik nalunaaqutsersuileruttorput. Kuummiut aallaavigalugu ilisimatusartartut martsip 21-aniit 18. april tungaanut nannut pillugit suliniuteqarniarput.

Nanorujussuaq Tunumi Timmiarmiut eqqaanni uuttortarniarneqarpoq. Angutiviaq, kaar 440 kilo. Asseq: Kristin L. Laidre

Tunumi nannut kisinneqarsimanngisaannarput, kisiannili nassitsissutit nannunut maanna ikkussuunneqartut iluaqutsiullugit Tunup sineriaa atuarlugu nannut ingerlaartarfiisa paasisaqarfigilluarnissaat anguniarneqarpoq. Tamanna anguneqarpat nannut Tunumiittut illersorneqarsinnaasumik tunngaveqarluni kisinneqarsinnaanissaat pilersaarusiorneqarsinnaalissaaq. Paasissutissat pissarsiarineqartussat Tunumi nannut pillugit biologit siunnersuisalernissaannut, qularnanngitsumillu tappavani nannunniartarnerup aqunneqalernissaanut atorneqassapput.

Qaammataasanut nassitsissutit nannunut qungasequtsiunneqartut immikkut tamarmik 150.000 koruunit missaannik akeqarput, taamaattumillu nannut nassitsissutilerneqarsimasut pisarinaveersaarnissaat pingaartuuvoq. Nanoq nassitsissutilerneqarsimasoq timimigut qalipaammik erseqqilluinnartumik normuligaasarpoq. Taanna qaammatit marluk missaanni atasarpoq, taamaalilluni biologit nannunniartartullu nalunaaqutsigaasimasumik ilisarsisissinnaalerlugit. Normuliussat nanup timaani ersilluartarput, aappaluttuullutik. Nannut qaammataasanut nassitsissutilerneqarsimasut qaqortumik qungasequtsigaasarput, allallu arnavissat angutivissallu siutimikkut nassitsissuteeraligaasarput siggummikkullu kakiorneqartarlutik.

Nanorli nalunaaqutsigaasimasoq pisarisoorsimagaanni Pinngortitaleriffimmeersut erngertumik attavigineqassapput. Nalunaaqutserneqaqqammersimasup neqaa nalunaaqutsigaaneraniit qaammatit marluk iluini nerineqassanngilaq.

Nanoq qungasequserneqarluni qaammataasanut nassitsissutilerneqarpoq aamma timimigut normulerneqarpoq. Asseq: Peter Hegelund

Nanoq ilisimajunnaarsinneqaraangami nalunaaqutsigaasarpoq qaammataasanullu nassitsissutilerneqarluni. Uuttortarneqartarpoq misissugassanillu tigusiffigineqartarluni. Nassitsissuteeqqat siutaannut ikkunneqartartut ukiup affaa tikillugu atasinnaasarput, qungasequtsiullugillu nassitsissutit ukiut arlerlugit atasinnaasarput. Nanoq nalunaaqutseqqammerneqarsimasoq pisarigaanni paasissutissarpassuugaluartut nannup ingerlaartarfiinut uninngaartarfiinullu tunngassuteqartut ilisimatusartartunit pissarsiarineqartussaagaluartut ukiunilu arlalialunni katersorneqartussaagaluartut annaaneqartarput.

Pilersaarutaavortaaq Pinngortitaleriffimmeersut aappaagu upernarnerani Tasiilap eqqaanissaaq nannunik nalunaaqutsersuinissaat.

Pinngortitaleriffimmeersut Kristin L. Laidre aamma Peter Hegelund Tunumi nanoq misissugassanik aavanik tigusiffigaat. Asseq: Fernando Ugarte

Itinerusumik paasisaqarusunnermi saaffigisassaq:

Miluumasunut Timmissanullu Immikkoortortaqarfimmi seniorforsker Kristin L. Laidre, mbl. 548513 imal. email: klaidre@uw.edu