*Required
*Required
*Required
*Required
*Required
*Required
*Required
*Required
Send
Thank you for your application!
 

Aalisakkat, miluumasut timmissallu aqutsivigineqarnerat pikkorissarfigaat

Allattoq:  PeMi

Aalisarnermut Piniarnermullu Naalakkersuisoqarfik aaqqissuisoralugu aqutsinikkut pilersaarutinik taaneqartartut qanoq aaqqissuunneqarsinnaanerat pillugu ulluni 8. – 10. novembari 2016 pikkorissartitsisoqarpoq. Pikkorissartitsinermut Pinngortitaleriffimmi ingerlanneqartumut peqataapput Namminersorlutik Oqartussani Naalakkersuisoqarfinneersut, Pinngortitaleriffimmeersut, Aalisarnermik Nakkutilliiveqarfimmeersut, KNAPK-meersut kiisalu Kommuneqarfik Sermersuumi atorfilittat.

Aqutseriaatsimik taama ittumik atuinermi attuumassuteqartut tamarmiullutik aqutsinikkut pilersaarusiariniakkakkut angusassanik isumaqatigiissuteqartussaatitaapput. Pilesaarutiginiakkamut attuumassuteqartut tamarmik anguniagassanik isumaqatigiissuteqareerneranni pilersaarutigisaq piviusunngortinneqartarpoq. Taamaalioreernermi malinnaaffiginninniarluni misissuisarnerit aallartinneqartarput, malitsigisaanillu ingerlaavartumik nalilersuinernik aammalu nalimmassaanernik ingerlatsisoqalertarluni. Taama periuseqarnikkut aqutsinermik suliaqartut, atuisut biologillu peqatigiillutik uumasumut aalajangersimasumut tunngatillugu aqutsinermik nalilersueqatigiissinnaanngortarput.

Adaptiv forvaltning: aqutseriaatsimik ingerlaavartumik nalimmassarneqartartumik taaneqarsinnaasoq pikkorissartunit sammineqarpoq, assersuutissanik nunatsinneersunik atorneqarsinnaasunillu aallaaveqarlutik sulisinneqartarlutik oqallitsinneqartarlutillu. Assersuutigalugu piffissami kingullermi oqallisaaqisunut Kalaallit Nunaata sineriaata avataani saarullinnut appanullu tunngatillugu aqutseriaatsimik taama ittumik pisariaqartitsisoqaraluarnera sammineqarpoq. Adaptiv forvaltning malillugu avataani saarulliit imaluunniit appat aqunneqaleraluarpata pisassiissutaasartut mianersortumik qaffakkiartuaartinneqartussaassagaluarput, taamalilluni saarullinniarnermut appanniarnermullu attuumaasuteqartut peqassutsip pisassiissutinik qaffaassuteqarnermut qisuariarneranut naleqqussarnissaminnut periarfissaqalissagaluarlutik.

 – Aqutseriaaseq una pineqartoq iluarinartuuvoq, attuumassuteqartummi akornanni tatigeqatigiinnermik pilersitsilluartarmat. Taamatut aqutseriaaseqarneq nunani allani atugaajartorluarpoq, tassami taama aqutseriaaseqarnikkut iluatsitsisarnernik assersuutissaqalereerpoq aammalu aqutseriaatsip taamaattup pilersaarusioriaaseqartitsinera amerlanerujartortunit atorluarneqariartormat. Assersuutigalugu nerlerit siggukitsut pillugit nunat attuumassuteqartut, Norge, Danmarki, Hollandi aamma Belgia aqutseriaatsimik taama ittumik atuilereernikuupput, tassani nerleqassutsikkut killiffiginiakkamik aalajangiussineq nerlerniartitsisarnerillu aqutsinermi killilersuutigineqarlutik. Piniagaanerisa killilersorneqarnerat ukiumiit ukiumut nalimmassarneqartarpoq peqassutsip qanoq ineriartorsimanera kiisalu pisarineqartartut amerlassusiat apeqqutaatillugu, pikkorissaanermik ingerlatsisuusoq, Jesper Madsen Aarhusip Universitetianeersoq oqaluttuarpoq.

Taamaalillutik pikkorissarnermi peqataasut pisuussutit uumassusillit pillugit aqutsinikkut sakkussarissaarnerulersussaapput.

Aqutseriaaseq adaptive forvaltning iluarinartinneqarluni nunani allani atugaajartuinnarpaluppoq. Assit: Pinngortitaleriffik

Sukumiinerusumik paasisaqarusunnermi saaffigisassat:

Piniarnermik Immikkoortortaqarfimmi pisortaq Amalie Jessen, oqarasuaat 345000, imaluunniit:

Jesper Madsen, Aarhus Universitet, Bioscience, oqarasuaat +4529440204; email jm@bios.au.dk