*Required
*Required
*Required
*Required
*Required
*Required
*Required
*Required
Send
Thank you for your application!
 

Illu nutaaq ilisimatusarnermut atorneqassaaq

Pinngortitaleriffiup illuutaa nutaaq aappaagu 2017-imi naammassineqartussaq Kalaallit Nunaanni ilinniartitaanermi pinngortitalerinermik ilisimatusarnermut ilinniarfiit siullersarissavaat. Kalaallit Nunaanni Peqqissaanermik Ilisimatusarfik aamma illumiissaaq.

Suliat marluk illumi ataatsimi
Peqqissaanermik Ilisimatusarfik 2008-imili atulersoq Ilisimatusarfiup ataani maanna inissisimaffeqarpoq. Illu nutaaq atulerpat Peqqissaanermik Ilisimatusarfik namminerisaminik misissuiveqassaaq inunnullu qulinut – sulisunut ph.d-nngorniutigalugulu ilisimatusartunut inissaqalissalluni. Tamanna Nunatsinni peqqissutsimik ilisimatusarnermik pitsanngorsaaqataallunilu nunami namminermi atugassanik peqqissuseq pillugu ilisimasanik pilersitsissaaq.

Pinngortitalerinermik ilisimatusarneq Pinngortitaleriffiup Ilisimatusarfimmik Danmarkimilu ilisimatusarfinnik allanik suleqateqarluni ineriartortitarisaa aamma illumi nutaamiissaaq. Kandidatinngorniarlutik ilisimatusartunut pikkorissaasarnernik peqareerpoq Ilisimatusarfiullu 2018-imi ilinniakkamik tunngaviusumik pinngortitalerinermik ilisimatusarnerusumik aallartitsinissaa naatsorsuutigineqarpoq. Ilinniakkap taassuma atorfinissutaasinnaasumik bachelorinngorniarnertut ineriartortinneqarnissaa pilersaarutaavoq.

Pinngortitalerinermik ilisimatusartunut pikkorissaanerit
Pikkorissaasarnerit ilaat Pinngortitaleriffimmit ingerlanneqartartoq ateqarpoq Arktisk Marin Økologi, Issittumi imaani uumassusillit ataqatigiinnerat pillugu pikkorissaanertut kalaallisut taaneqarsinnaasoq. Pinngortitaleriffiup angalatitsilluni misissuisitsisarneri pikkorissaanerni atorluarneqartarput, pikkorissartut angalanernut peqataatinneqartarmata.

– Pikkorissartut angalaqataasut namminneq suliatik Pinngortitaleriffiup misissuinerinut attuumassuteqanngitsumik suliariutigalugit Pinngortitaleriffimmiut misissuinerinut malinnaasarput paarlattuanillu pikkorissartut suliaminnit pissarsiaat paasissutissat Pinngortitaleriffimmiut aamma pissarsiarisarmatigit angalaqatigiinneq peqataasunut tamanut iluaqutaasarpoq, Pinngortitaleriffimmi ilisimatusartartoq ilinniartitaanermillu ataqatigiissaarisoq Thomas Juul Pedersen oqarpoq nangillunilu:

– Kalaallit Nunaanni Ilisimatusarfik Århusimilu Universiteti suleqatigalugit pikkorissaanernik aaqqissuussissarnermik neqeroorutiginnittarnermillu misilittagaqarluarpugut, illulu nutaaq atulerpat suli pitsaanerusumik suleqatigiilernissarput naatsorsuutigaarput. Ilisimatusarfiuk aamma Kalaallit Nunaanni aalisarneq piniarnerlu pillugit ilinniartitsissutit assigiinngitsut akimorlugit ingerlanneqartartumik pikkorissaasarpoq.

– Kalaallit Danmarkimi universitetini pinngortitalerinermik ilisimatusarfinni ilinniagaqartut nunaminnut uterlutik pikkorissaanernut semesterinullu peqataasarput taamalillutillu nunagisap avatangiisinik avatangiiseqarlutik pikkorissartarlutik. Tamanna kalaallit Danmarkimi ilisimatusartut naammassigunik nunaminnut uteqqissinnaanissaannik periarfissiuusseqataasutut oqaatigisariaqarpoq, Thomas Juul Pedersen oqarpoq.

Ilinniagaqalerumaartussat
Kalaallit qallunaallu ilisimatusarfinni ilinniagaqartut pikkorissarnernut peqataasartussatut soorunami salliutinneqassapput.

– Siunissamili pikkorissaasarnissani kalaallit qallunaallu saniatigut nunani allaneersunik peqataasitsisoqartarnissarput, tassa nunani allaneersut ilinniakkanut pilersinneqartunut qinnuteqarnissamut periarfissinneqarnissaat aamma eqqarsaataavoq, Thomas Juul Pedersen oqarpoq nangillunilu:

– Kandidatinngornianut p.hd-rtunullu pikkorissaanernik ataasiakkaanik, soorlu aasakkut ukiukkullu pikkorissaasoqartarnissaanik pilersaaruteqarpugut, taakkunani ilaatigut nunami, kuunni tatsinilu uumassuseqassutsit sammineqartassapput. Tamatuma saniatigut eqqarsaataavoq Ilinniarfissuarmi Ilinniarnertuunngorniarfinnilu pinngortitamik ilisimatusarnermik ilinniartitsissutit pitsaanerulernissaat anguniarlugu ilinniarfiit taakkua siunissami pikkorissaasarnernut peqataasarnissanut periarfissinneqassasut. Tassa ilisimatusarfinni ilinniartut salliutinniarneqaraluartut ilinniarfinni pinngortitamut ilisimatusarnermik sammisaqarfiusuni ilinniartitaanermik qaffassaaqataanissaq pingaartinneqarpoq.

Pinngortitaleriffiup kandidatinngornianut pikkorissaasarnerinut peqataarusuttut qinnuteqarfissaq kingulleq suli ullulerneqanngimmat qinnuteqaammik tunniussinissamut suli periarfissaqarpoq.

Illu pillugu paasissutissat
Pinngortitaleriffiup illuutaa nutaaq marlunnik quleriilik TNT-mit titartarneqarsimasoq 1.500 m²-inik angissuseqarpoq. Suliffeqarfik Permagreen illumik sanaartortuuvoq. Illumiissapput init ilinniartitsiviit, misissuisarfiit, laboratoriat, allaffiit/ ilisimatusartartut allaffii inersuarlu atuartitsiviullunilu oqalugiarfiusinnaasoq kiisalu inissiat arfinillit ilisimatusartartunut avataaneersunut ilinniartitsiartortunullu atugassiat.

Illu, illumilu atortorissaarutissat katillutik 50 mio. kr.-inik akeqarput. Sanaartornermut aningaasartuutaasut amerlanersaat aningaasaateqarfinnit makkua tapiissuteqarnerisigut matussuserneqarput: Aage V. Jensen Charity Foundation, Karen Elise Jensens Fond, Jelling Foundation, NOJ Fonden aamma Holkegaardfonden – inunnit sanasumut Aage V. Jensenimut attuumassutilinnit pilersitaasoq. Illumi laborialiornermut atatillugu Namminersorlutik Oqartussanik isumaqatigiissuteqarnikkut Mærsk Oil Kalaallit Nunaat (Tullow Oil aamma Nunaoil) tapiissuteqartuupput.