Mala Høy Kúko Tunumi qilalukkat qernertat pillugit paasisassarsiorpoq Saqqummersinneqarfia 28.01.2016
Assimi: Professor Mads Peter Heide-Jørgensen Tunup imartaani qilalukkat qernertat pillugit misissuinissanik pilersaarutit nassuiaateqarfigai. Asseq: Pinngortitaleriffik.
Pinngortitamut, Avatangiisinut Inatsinillu Atuutsitsinermut Naalakkersuisoq Tunup imartaaniittartut qilalukkat qernertat pillugit paasisaqarnerujumalluni Pinngortitaleriffimmut marlunngorneq 26. januar 2016 ataatsimiigiapallappoq; tassa Citronen Fjord-imi zinkimik aatsitassarsiorfiliorniarneq pillugu Tasiilami innuttaasunik ataatsiimititsiartussalluni aallarfissi aqaguttoq.
Naalakkersuisut ippassatsiannguaq Nunatsinni qilalugartassiissutissanik aaliangersaaqqammerput, Tunup imartaani pisassiissutissat ilanngullugit, tamatumani NAMMCO-p ataani biologit siunnersuimmata Tunumiunut pisassiissutissat ikilineqartariaqaraluarnerinik. Matumani Ittoqqortoormiit Tasiilallu pigisaannilu pisassiissutissat ikilineqartariaqaraluarnerat innersuussutigineqarluni, tassami tappavani ataasiannaarluni kisitsioqarnikuummat (2008-mi).
Mala Høy Kúko-ip Tasiilamut aallanngilaattaani Tunup imartaani qilalukkanut qernertanut tunngatillugu ilisimasani nutarterpai. Tappavungalu apuuteriaruni nutaarsiassatsialammik apuussaqarsinnaassaaq, tassa tappavani qilalukkat Pinngortitaleriffimmeersunit kisinneqarnissaat ukiormanna pisssammat.
Tunup imartaaniittut qilalukkat qernertat kisinneqarniarput
Pinngortitaleriffimmeersut Tunup imartaani qilalukkanik qernertanik 2010-miit misissuisarsimapput, ilaatigut qilalukkat qernertat 30-nit amerlanerusut qaammataasanut nassitsissutilersorneqarnerisigut. Taakkua ikkussuunneqarnerisa kingorna ilisimatusartartut isumaqarluinnalerput qilalukkat qernertaqatigiit Tunup imartaaniittartut marlunnut, tassa Ittoqqortoormiit Tasiilallu eqqaanniittartunut immikkoortinneqarsinnaasut. Ilisimatusartartut aamma ilisimavaat Tunup avannaarpiarsuani ikinnerpaamik qilalugaqatigeeqartoq ataatsimik, kisiannili taakkua ilisimasaqarfigineqarpallaanngillat.
Tunup imartaani kisitsinissat pillugit pilersaarusiornissat annertunertigut kingullermik 2008-mi kisitsinermi periuseq malittussaavaat. Taamaattorli qaammataasanut nassitsissutit iluaqutsiullugit paasineqarpoq Tunumi Kangerlussuup ilaanni kisitsinissat augustimi pisariaqassanngitsut, kisitsivissalli pingaaruteqartut 2008-mi kisitsinernut sanilliullugit sammivilersoqqissaarnissaat pillugit Tunumi piniartut Pinngortitaleriffimmeersunit saaffigineqaqqissapput.
Naalakkersuisoq Mala Kúko-Høy soqutiginneqisoq, atorfilittani peqatigalugit, qilalukkanut qernertanut tunngassutillinnut tusarnaarsuaarpoq. Asseq: Pinngortitaleriffik
Tunup imartaaniittartut qernertat akornusersorneqartarnerat misissuiffigineqassaaq aamma
Uuliasiorniarluni immap naqqanik sajuppillatsitsisarluni misissuisarnerit nipiliortitsisaqisut aammalu umiarsuarsuit sikunik aserorterussuit nipiliortarnerisa qilalukkanut qernertanut sunniutigisinnaasaat toqqaannartumik misissuiffigineqarnikuunngillat. Sajuppillatsitsisarluni misissuisarnerit nipimik nipitoorujussuarmik aallakaatitsisarluni immap naqqata sananeqaataanik paasissutissanik pissarsiviusarput. Umiarsuarsuit assartuutit orsussamillu usisartut aamma nipiliortitsisaqaat immallu naqqanik sajuppillatsitsisarluni misissuisalernerit ilanngukkaanni qanga qilalukkat nipaassuarmi uummaffigisimasaat nipiliorfiulernikooqaat.
Taamaattumik ilisimatusartartut Pinngortitaleriffimmeersut qilalukkat qernertat nipinit sunnerneqartarnerat paasisaqarfiginiarlugu 2017-imi aasaanerani misissuinernik ingerlatsiniarput. Pilersaarutigineqarpoq qernertat nipinut assigiinngitsunut qisuariartarnerat paasiniarlugu aqutamik nipiliuutinik assigiinngitsunik nipiliortitsilluni misissuisoqarnissaa. Aamma qilalukkat qernertat namminneerlutik nipiliortariaasiat tamakkulu nipit assigiinngitsut qanoq isumaqarsinnaanerat kiisalu nipaallisimaffeqartarnerisa qanoq paasisassaasinnaanerat ilikkarniarneqassapput, taamaaliornikkut pissusissamisoortumik uumariaaseqarnerat paasiniarneqartussaammat. Assersuutigalugu ullormut qasseriarlutik nerisarnerat paasisaqarfigissallugu pingaartuuvoq, tassami uippakajaartinneqaleraangamik soorlu nipiliorfigineqarpallaarlutik pissusii allanngortarnersut paasisaqarfiginiarlugu. Aamma aqqaamariaasiat uummataasalu kassuttariaasiat misissuiffigineqassapput paasiniarlugu uippakajaartinneqaleraangamik tamakku tamarmik allannguuteqaartarnersut aamma.
Nunatsinni qilalukkat qernertat pillugit biologit tullianik siunnersuissapput 2017-imi.
Itinerusumik paasisaqarusunnermi saaffigisassaq:
Professor Mads Peter Heide-Jørgensen oqarasuaat: 0045 40.257943 imal. email: mhj@ghsdk.dk
