*Required
*Required
*Required
*Required
*Required
*Required
*Required
*Required
Send
Thank you for your application!
 

Pinngortitaleriffik ukiamut killeqanngitsumik tuttunniartitsisoqarnissaanik innersuussivoq

Tuttunniarfik aajunaralaannguanngorpoq. Pinngortitaleriffimmit Kalaallit Nunaanni tuttoqarfinni assigiinngitsuni kisitseqqittoqarnikuunngikkaluartoq, taamaattoq ilisimariikkat tunngavigalugit nunatsinni tuttoqarfinni anginerni tamani killeqanngitsumik tuttunniartitsisoqarsinnaaneranik siunnersuisoqarpoq. Aqutsiveqarfiit tuttunniartitsiviusartut pineqartut tassaapput tuttoqarfiit Kangerlussuaq-Sisimiut, Akia-Maniitsoq kiisalu Ameralik.

Aqutsiveqarfimmut Ameralimmut tunngatillugu Pinngortitaleriffik innersuussivoq tamaani tuttut ikilisarneqartariaqaraluartut aammalu piniagaanerat annertunerusinnaagaluartoq.

Innersuussutit tamakku Pinngortitaleriffiup Aalisarnermut, Piniarnermut Nunalerinermullu Naalakkersuisoqarfiup tuttut umimmaallu piniagaasarnerini piffissaliussat pisassiissutaasartullu pillugit 2016-imi ukiaanerani aammalu 2017-imi ukiuunerani piniartitsinissanut tunngatillugu tusarniaaneranut akissuteqaataani atuarneqarsinnaapput.

Tuttoqarfinni anginerni kisitsinerit kingulliit pipput 2010-mi, matumani aqutsiveqarfik Kangerlussuaq-Sisimiut kisitsivigineqarmat, 2012-imilu aqutsiveqarfik Ameralik kisitsivigineqarmat. Taamanikkut kisitsinernit inernerit paasinarsisippaat aqutsiveqarfinni taakkunani marlunni tuttut suli amerlavallaarujussuartut. Ima amerlatigalutik aallaat nerisassaqarniarnermikkut ajornartorsiulersimallutik. Ameralimmi sumiiffiit ilaat 2001-imiilli naggorlutsissimapput, Pinngortitaleriffimmeersullu ilimagaat sumiiffiit naggorluttoqarfiit suli naggorissisimanaviannginnissaat. Tassami nuna naggorlutsikkaangami aatsaat ukiorparpassuit qaangiutereernerini ilorraap tungaanut saattarmat. Taamaammanuna aqutsiveqarfimmi Ameralimmi tuttut suli ikilisarneqarnissaannik Pinngotitaleriffimmeersut innersuussuteqaqqittut.

Taamatullu aamma aqutsiveqarfimmut Kangerlussuaq-Sisimiut-mut tunngatillugu assinganik siunnersuisoqarpoq. Tamaani aamma tuttut nerisassaqarniarnerinut sanilliullugit amerlavallaartutut isigineqarput. Taama ilimagisaqarnerit tuttoqarfinnit taakkartorneqartunit anginernit pineqartunit piniartut paasissutissiissutigisartagaannik tunngaveqarput.

Kalaallit Nunaata kitaani avannaaniit aqutsiveqarfimmiit Nuussuarmit kujammut aqutsiveqarfik Neria tikillugu ukiuunerani tuttunniartitsisoqarnissaanut tunngatillugu biologit innersuussutigaat sapinngisamik sivikitsumik, tassa ullut qulingiluat sapaatip akunnerisa naaneri marluk ilanngullugit, tuttunniartitsisoqarnissaa. Pinngortitaleriffimmmeersunit innersuussutigineqarpoq. Kiisalu aamma innersuussutigineqarpoq ukiuunerani tuttunniartitsinermi angutiviaannaat piniagaasarnissaat, tassami taamaalinerani arnavissat ilaat ilumioqalereersarmata ilaalu ukiumik ataatsimik pisoqaassusilimmik piaqqisaateqartarmata.

Itinerusumik paasisaqarusunnermi saaffigisassaq:

Miluumasunut Timmissanullu Immikkoortortaqarfimmi pisortaagallartoq, Tenna K. Boye, oqarasuaat 361200 imal. tebo@natur.gl