Pinngortitaleriffiup inuiaqatigiit sullippai Saqqummersinneqarfia 28.11.2016

Kalaallit Nunaanni pisuussutinik uumassusilinnik aqutsineq pillugu piffissami kingullermi oqallinneq misigissutsinik ulikkaarlunilu sakkortusimavoq, allaat ima appasitsigilerluni Pinngortitaleriffimmi atorfilittat ilaata siorasaarneqarneranik kinguneqarluni. Atorfilittamut siorasaarisimaneq Pinngortitaleriffiup siulersuisuisa akuersaarnartinngilluinnarpaat taamaattumillu tunngavissaqarluarnerusumik pissuserissaartumillu oqallittoqarnissaa kajumissaarutigalugu. Pinngortitaleriffik pinngortitamik illersuiniarnermik soqutigisaqartuunerarneqarpoq, tamannali eqqunngilaq. Pinngortitaleriffiup suliaraa, inuussutissarsiornikkut, politikkikkut pinngortitamilluunniit illersuiniarnermut attuumassuteqanngitsumik Namminersorlutik Oqartussanik ilisimatuussusermik tunngaveqarluni siunnersuisarneq. Pinngortitaleriffiup suliaasa inerneri siunnersuisarnerilu Kalaallit Nunaanni inuiaqatigiinnut annertuumik sunniuteqartarlutillu isumaqartarmata, erseqqissaatigisariaqarluinnarpoq, uani pinngortitap pisuussutaanik inuiaqatigiit pitsaanerpaamik piujuaannartitsinermillu tunngaveqartumik pissarsiaqarnissaat anguniagaammat

“Pinngortitaleriffik pinngortitamut sullissisuunngilaq inuiaqatigiinnulli sullissisuulluni, inuiaqatigiinni massakkut siunissamilu atugarissaarneq inuussutissarsiornerlu qulakkeerniarlugit piujuaannartitsinermik tunngaveqarluni pisuussutinik atuinissaq pillugu siunnersuisartuuvoq”, Pinngortitaleriffiup siulersuisuini siulittaasoq Gert Mulvad taama oqaaseqarpoq.

Pinngortitaleriffimmi siulersuisut ataatsimiinneranni kingullermi siulersuisuni siulittaasup oqaaseqaataa Namminiilivinnermut, Pinngortitamut, Avatangiisinut Nunalerinermullu Naalakkersuisumit Suka K. Frederiksenimit taperserneqarpoq:

“Pinngortitaleriffik tassaavoq suliffeqarfik allanut attuumassuteqangitsumik ilisimatuussutsimik tunngaveqarluni ingerlatsiviusoq, Naalakkersuisunut inuiaqatigiinnullu siunnersuisarnissamik pisussaaffeqartoq. Tamanna paarilluartariaqarparput, qanorluunniit pisassiissutaasut pillugit isumaqatigiinngitsoqartigigaluarpat oqallinneq pissuserissaartumik ingerlattariaqarparput. Pinngortitaleriffik pisassat annertussusissaannik aalajangersaasartuunngilaq Naalakkersuisulliuku pisassat annertussusissaannik aalajangersaasartuusut” Naalakkersuisuni ilaasortaq Suka K. Frederiksen taama erseqqissaateqarpoq.

Annertunerusumik paasisaqarusunnermi attavigisassaq:
Pinngortitaleriffimmi siulersuisuni siulittaasoq, Gert Mulvad. E-mail: gm@peqqik.gl