Rejsegilde for Grønlands Naturinstituts nye bygning Saqqummersinneqarfia 12.12.2016

Pinngortitaleriffiup illuutaa nutaaq 2017-imi atulersussaq sisamanngornermi 8. decembari 2016 nappaanersiorneqarpoq. Illumik naappaanersiornermut illup pilersinneqarnissaani suleqataasut, Naalakkersuisuni ilaasortat, sanasut, suliffeqarfiillu illumik titartaasut sanaartortullu, Pinngortitaleriffimmiut Ilisimatusarfimmiullu peqataapput.

Pinngortitamut Avatangiisinullu Naalakkersuisoq Suka K. Frederiksen Pinngortitaleriffiup Ilisimatusarfimmik nunanilu allani ilisimatusarfinnik suleqateqarluni illumi nutaami ilinniakkamik pinngortitamik ilisimatusarnermik imalimmik ingerlatsinissaa pillugu nappaanersiornermi oqalugiarnermini ilaatigut ima oqaaseqarpoq:

“Pinngortitalerifflup maanna nunatsinni namminermi isumalluutit atorlugit ilisimatusarnissamut periarfissat pitsaanerulersittussanngormagit tulluusimaarutissaavoq. Ilinniarlertartussat pikkorissariartartussallu Kalaallit Nunaanni issittumilu pinngortitaq aamma silap avatangiisillu issittumi uumasut ataqatigiinnerinut sunniutaat pillugit annertuumik paasisaqartarumaartut qularnaanngilaq.”

Kalaallit Nunaanni peqqissutsimut Ilisimatusarfik aamma illumi nutaamiissaaq taannalu pillugu Suka K. Fredriksen ima oqarpoq:

“Kalaallit Nunaanni Peqqissutsimut Ilisimatusarfik 2008-mili namminerisaminik inissaqartinneqarani atuussimavoq. Inini nutaani nunanit allamiut, taamatullu nunatsinni innuttaasut peqqissusaannik ilisimatusartartussat katersuuffeqassapput, tamannalu annertuumik iluaqutaassasoq qularnanngilaq.” Pinngortitaleriffiup illuutaanik nutaamik nappaanersiornermut peqataavortaaq Ilinniartitaanermut, Kultureqa rnermut, Ilisimatusarnermut, Ilageeqarnermullu Naalakkersuisoq, Doris Jakobsen.