Biologinngorlaaq Juuntaap Nersorinnissutaanik tunineqarpoq Saqqummersinneqarfia 16.02.2017
Mala Broberg Aarhusip Universitetianit ilinniagartuunngorniumminik ullumikkut illersuisoq naammassinnillunilu Jonathan Motzfeldtip Aningaasaateqarfianit nersorinnissummik “Juuntaap Nersorinnissutaanik” 2016 50.000 koruuninik aningaasartaqartumik tunineqarpoq. Tamanna pivoq Pinngortitaleriffimmi Mala Brobergip naammassinera nalliuttorsiutigalugu ilasseqatigiinnermi. Mala Kalaallit Nunaanni biologimi ilinniagartuunngortuni siullersaalluni nunatsinniiginnarluni soraarummeerpoq. Soraarummeerneq pivoq Pinngortitaleriffimmi.
Jonathan Motzfeldtip Aningaasaateqarfiata siulittaasuata, Karen Motzfeldtip, nersorinnissummik tunniussinermi tunuliaqutaasut oqaaseqarnermini ima tunngavilersorpai:
“Asasakka maaniittusi.
Karen Motzfeldt-imik ateqarpunga maaniippungalu Jonathan Motzfeldtip Aningaasaateqarfia sinnerlugu. Aningaasaateqarfiup siulersuisuini siulittaasuuvunga maaneeqatigaaralu aqqaluara Claus. Ulloq manna qilanaarisimaqaarput.
Ataatatta Jonathan Motzfeldtip nersorinnissut una pilersissimavaa – qiimassaammik taaguuserlugu, nammineq oqarnera naapertorlugu qiimmassaat tunineqartumit kajumissaatitut tiguneqaqqullugu.
“Juuntaap Nersorinnissutaa” ukiut tamaasa toqqarneqartumut ataatsimut arlalinnulluunniit tunniunneqartarpoq – inuusuttuunerusunut, immikkuullarilluinnartumik suliaqarnermikkut tunniussaqarsimasunut imaluunniit ajasoornaannartumik piginnaanilinnut piginnaasaminnilluunniit ineriartortitsilluartunut tunniunneqartarluni. Nersorinnissutip 2016-imi tunniunneqarnissaa peqquteqavissumik kinguarsalaarsimavarput.
Jonathan Motzfeldtip Aningaasaateqarfiani siulersuisut aalajangerput Juuntaap nersorinnissutaa 2016, 50.000,- koruuninik aningaasartalik Mala Brobergimut tunniunneqassasoq Pinngortitaleriffimmi biologinngortumut.
Tunngavilersuutit
Mala Broberg ullumi biologinngorluni kandidatinngorpoq. Mala Brobergip ilinniarnini Aarhusip Universitetiani aallartippaa, piffissallu ilaani ilinniarnini unitsikkallarniarlugu aalajangerami Pinngortitaleriffimmi ilinniartutut ikiortaasartutut atorfinippoq.
Taava Pinngortitaleriffiup Ilisimatusarfik Danmarkimilu universitetit suleqatigalugit pinngortitaq pillugu ilisimatuussutsikkut tunngaveqartumik kandidatinngorniartunut ilinniartitsinerit 2015-imi aallartimmagit Malap qiimmaallalluni ilinniakkani nangippaa, peqataaffigisaminilu karakteri qaffasinnerpaaq angullugu. Kingorna Mala Broberg maaniilluni inaarutaasumik allaaserinnippoq maannalu tassa naammassinnilluni ilinniagartuunngorpoq.
Mala aamma pinialerituujuvoq, taamaattuuneratalu takutippaa biologiuneq piujuartitsinermillu tunngaveqarluni pisuussutinik iluaqutiginninnermik suliaqartuuneq aammalu pinngortitap tunniussinnaasaanik atuilluartuuneq imminni ajornartorsiutitaqartariaqannginnerat. Mala oqaatigineqarpoq nukappiatsialassuusoq, qularnanngilarlu inuunermut peqqissumik isiginnittaaseqarnera ilinniakkaminik naammassinninneranut peqqutaaqataasoq. Qujanartumillu aamma biologinngorniat ullutsinni arnarpassuusartut akornanni angutinut nuannaartorineqarsinnaalerluni naammassivoq.
Maani pinngortitarsuup tunniussinnaasai sutigut tamatigut inooqataaffigaavut. Pinngortitap tunniussinnaasaanik iluaqutiginninneq mianerinninnerlu imminnut akerleriissuunngillat ataqatigiillutilli taamaattumillu Issittumi biologinik ilinniarsimasunik pisariaqartitseqaagut.
Ullumi nersorinnissummik tunniussaqarnitsinni neriuutigarput pinertussutsip ilinniagartuunngorsinnaanerullu maluginiarneqarnerisa saniatigut Nunatsinnissaaq ilinniagartuunngorsinnaanikkut periarfissat maani Pinngortitaleriffimmi aamma periarfissiissutaasut maluginiarneqarumaartuttaaq.
