Eqqaaniut: Ilisimatusarnermi isumalluutivissuaq akornatsinniikkunnaarpoq Saqqummersinneqarfia 04.01.2017
Michael C.S. Kingsley-p suliassanik ajornakusoortunik piuminaassinnaasunillu suliaqarnissamik nuannarisaqartuunini inuttut immikkut ilisarnaatigaa. Soorlu qangatsianngorpoq, tassa ukiut untritilikkaat makku inuuffigisatta aallartisimalernerini, naatsorsuusiornerit tunngavigalugit nunatta imartaani raajaqassutsip nikerartarneranik qarasaasiaq atorlugu naatsorsuisarnermik nunatsinni uumassuseqassutsip ataqatigiinneranut tulluussaallutik ineriartortitseqataagami taamaassimasoq. Taanna qarasaasiaq atorlugu naatsorsuut, imaannaanngitsumik suliaasoq pissutigalugu Kalaallit Nunaata nappataanik pingaarnerpaanik, tassa raajanut tunngatillugu Naalakkersuisut NAFO-mit (Nunat Avannarliit Aalisarnikkut Suleqatigiiffiat raajat pillugit ilisimatuussutsikkut siunnersuinernik suliarinnittartoq) ilisimatuussutsikkut suinnersorneqarsinnaasarnerat ukiut tamaasa pisarpoq.
Maanna Michael Kingsley akornatsinniikkunnaarpoq. Sivisuumik napparsimareerluni 75-inik ukioqarluni 22. decembari 2016 toqukkut qimaguppoq.
Ilisimatusarnernik suliaqallammassuaq
Ilisimatusarneq eqqarsaatigalugu qarasarissumik sullarissumillu Pinngortitaleriffik pisuunnguallaateqarpoq Michael Kingsley 1998-imi atorfinimmat. Taamanikkut atorfinitsinneqarami Issittumi ilisimatusarnernik ukiuni 22-ni misilittagaqareersimavoq. Immikkut piginnaaneqarfigisuuai matematik, statistik aammalu uumasut assigiinngitsut kisinneqarnerini nalilersueriaatsit, immikkuullarissumik piginnaaneqarfigilluarlugit uumasoqatigiiaat assigiinngitsut amerlassusiinut aammalu siaruarsimanerinut tunngassuteqartut.
Michael Kingsley ilisimatusartartuuvoq piginnaasatigut imaannaanngitsoq. Oqaatsit assigiinngitsut tallimat sapinngilai, qarasarilluinnartuulluni aammalu immikkuullarissuseqartumik ilisimasimatuussutsikkut allaaserinninnikkut piginnaaneqarluarluni, pingaartumik suut allagassat ajornakusoorlutik piuminaassinnaasut passutarinissaat soqutigisarisuullugu. Michael Kingsley-p ilisimatuussutsikkut suliarisimasai qiviarlugit pingaartumik imaani miluumasunut tunngasut amerlapput, taamaattorli ukiuni kingulliunerusuni toqussi tikillugu Kalaallit Nunaata imartaani raajanut tunngassuteqartut annertoqataanik sammisaqarfigisimavai. Ilisimatuussutsikkut allaaserisat 80-init ikinnerunngitsut Michael Kingsley-p imaannaanngissuseqartumik ilisimatusarnermut tamarmut tunniussarai.
“Matematikkersornermi, statistik-imi aammalu uumasut amerliartorsinnaassuseqarnerat paasiniarlugu naatsorsuusioriaatsinik ilisimasaqarnersua immikkoortortaqarfitsinni ilua qutigisimaqaarput. Aamma nunarsuarmioqatigiit ilisimatuussutsikkut siunnersuisooqatigiiffiini immikkut ilisimasalittut atorluarneqartarpoq. Taamaalilluni ilisimatuussutsikkut ataatsimiititaliani arlalissuarnittaaq siulittaasuusarsimavoq”, Aalisakkanut Qalerualinnullu Immikkoortortami pisortaq Helle Siegstad oqarpoq.
Michael Kingsley Pinngortitaleriffiup Aalisakkanut Qalerualinnullu Immikkoortortaqarfiani ukiut kingulliit qulit siunnersuinernik suliaqarsimavoq. Napparsimagaluaqaluni immikkoortortami suleqatini peqatigalugit siunnersuinernik kingullermik suliaqarpoq 2016-ip ukiaani.
Michael Kingsley Pinngortitaleriffiup Miluumasunut Timmissanullu Immikkoortortaani ukiuni 2002-2005 pisortaavortaaq.
Tulummaarik qanilaartoq
Michael Kingsley aamma umiatsiamik angalaarumatuujuvoq pimoorussisoq. Nuliilu Claudette Nuummi najugaqarnerminni angallassuarnut nuannaariartaataasartunut yachtinut naalaganngornianut ilinniartitsisarpoq. Namminerlu aamma pinngortitami pinialunnernik nuannarisaqarluartuulluni.
Michael Kingsley inuuvoq suliassaq sunaluunniit aallartikkuniuk peqqissaarluinnarlugit sunnguusinnaasullu tamaasa eqqarsaatigeqqissaarniarlugit suliniartuusoq. Ilisimatoorpalaartumillu sassartaaseqarnerata tunuatungaaniipporlusooq inuk kissalaartoq, unneqqarissoq quianartussaasinnaasunillu ujaasiuartarnermigut Pinngortitaleriffimmi suleqataasunit tamanit maqaasineqassaqisoq.
Eqqarsaativut misiginneqataanerpullu nulianut Claudettemut apuukkusuppagut.
Michael C. S. Kingsley-p eqqaaneqarnera ataqqinartuuli.
