Ilisimatusartartut aqutsisullu saarulliit pillugit isumattorsaqatigiilerput Saqqummersinneqarfia 21.08.2017
Ilisimatusartartut arlalissuit nunanit makkunaneersut: Sverige, Norge, Island, Savalimmiut, Danmark aamma Kalaallit Nunaat saarulliit aqutsivigineqarnerinit misilittakkaminnik saqqummiussivigeqatigiinniarlutik isumassanillu pikialaartitseqatigiinniarlutik ulluni 22.-24. august 2017 Pinngortitaleriffimmi katersuuteqqaniarput.
Pinngortitalerfimmeersut saarulliit pillugit ilisimatusartarnerinit inernerusartut maannamut takutippaat saarulliit Kalaallit Nunaata imartaaniittartut Nunatta imartaani sumiiffinni assigiinngitsuni suffiaasartunik akuleraartuusut – allaat ilaat Islandip imartaani suffiarineqarsimasunik akoqarsinnaasarlutik.
Taamaattumik pingaartumik sinerissap qanittuiniittartunik saarullinnik imartanit assigiinngitsuneersuunertik peqqutigalugu kingornuttakkamikkut assigiinngissuteqartunik aalisartoqartarpoq, naak isikkumikkut immikkoortikkuminaatsuugaluartunik. Nunat isumattorsaqatigiinnissami peqataatitaqartussat tamarmik aalisarnernik taama ittunik tunngaveqartunik aqutsiniarnikkut unammilligaqarput, misilittagaallu tusarfigissallugit soqutiginartuullutik. Misilittagarilersimasaat saarulleqatigiiaat ilisimatuussutsikkut misissuivigineqartarnerinut, kingornalu taakkunanngarpiaq toqqammaveqartunik aqutsinikkut ingerlatseriaatsinut tunngassuteqarput.
Tassami saarulliit Nunatta sineriaata qanittuini pisarineqartartut imaanngilaq “nunap namminermi saarulleqqaarigai”. Taakkumi imaassinnaavoq nunatsinni Tunup, Kitaata imaluunniit Islandip imartaanni suffiaasimasinnaasut, taamaammallu allillutik suffisinnaalerunik namminneq tukerfigisimasaminnut suffiartorlutik uteqqittussaasut. Taamaammat ilisimatuussutsikkut misissuiniarnerit imaannaanngitsorsiorfiusinnaasarput, tamatumalu malitsigisaanik aqutsinikkut aaqqiissuteqarniarnerittaaq sunnerneqarsinnaasarlutik.
“Takorlooriartigu imartaq saarulleqarfiusoq soorlu lagkaagisut. “Lagkaagip ilaa” saarullinnit aaliangersimasumi suffiarineqarsimasunit oqarta sanaajusoq qanormita angitigaa? Apeqqut akiuminaatsuuvoq, tassami saarulliit pineqartut suminngaannersoorpiarnerat paaseqqissaarniaraanni kingornuttagaasigut misissoqqissaarnissaat pisariaqartassapput”, Pinngortitaleriffimmi ilisimatusartartuunertut, seniorforskeritut, atorfeqartoq Rasmus Hedeholm nassuiaavoq.
Rasmus Hedeholm ilanngullugu nassuiaavoq kingornuttakkat katitigaanerinik misissueqqissaarisarnerit akisuupilussuusarmata, taamaattumillu saarulliit pillugit ilisimatuussutsikkut siunnersuniarneq annerusutigut kingornuttagaasigut misissuinernit toqqammaveqartumik uppernarsaasiorfiginiaraanni akisuupilussuusinnaassammat.
Aalisagaqatigiiaanik assigiinngitsunik toqqammaveqartumik aalisartitsisarnernik aqutseriaatsit pillugit isumattorsaqatigiissitsinissaq Pinngortitaleriffimmeersunit aaqqissuunneqarpoq, Nordisk Rådillu ataani Avannaamioqatigiit aalisarnermi ilisimatusarnerit pillugit suleqatigiissitaanit Nordenimit aningaasalersorneqarluni.
Sukumiinerusumik paasisaqarusunnermi attavigisassaq:
Aalisakkanut Qalerualinnut Immikkoortortaqarfimmi ilisimatusartartuuneq Rasmus Hedeholm, oqarasuaat 361200 imaluunniit rahe@natur.gl
