Isaaffik.org Issittumi ilisimatusarnernik ataatsimut isiginnissinnaatitsisoq Saqqummersinneqarfia 04.04.2017
Nunarsuarmi silap pissusaata allanngoriartornerata kinguneri Issittuni malunnnarnerpaammata Issittoq pillugu Issittumilu ilisimatusarnerit ukiuni kingullerni amerliartupiloorput.
Issittumi sumiiffippassuarni ilisimatusarnerit amerliartuinnartut pissutigalugit tamakkiisumik isiginninniarneq ajornarsiartuinnarmat Pinngortitaleriffik Danmarkimilu suliffeqarfiit ilisimatusarnermik sammisaqarfiusut attuumassuteqartullu suleqatigiillutik internetsikkut qupperneq: www.isaaffik.org ukioq 2015-imi pilersitsippaat, kikkulluunniit Issittumi ilisimatusarnermik, ilinniartitaanermik, siunnersuisarnermik ingerlasussanillu pisareersaanermik aqutsinermillu (logistikki) suliaqartut, Kalaallit Nunaanni Issittullu sinnerani ilisimatusaatigalugu sulianik tamakkiisumik isiginnissinnaalerniassammata.
Isaaffik.org-ip quppernerata pisinnaasaanik isikkuanillu ukioq manna nutarterisoqarpoq – tassa, isaaffik.org-ip version 3.0-a nutaaq nutaanillu pisinnaasalik atuutilerpoq.
“Ilisimatusarfiit suliffeqarfiillu Issittumi ilisimatusarnermik, ilinniartitaanermik siunnersuisarnermik ingerlasussanillu piareersaasarnermik aqutsinermillu suliaqarfiusut suleqatigiilluarnerulernissaat, sunniivigeqatigiilluarsinnaanerulernissaat isumassarsioqatigiilluarsinnaalernissaallu ISAAFFIK-immik pilersitsinermi siunertarineqarpoq. Isaaffik.org-imik atuisut Kalaallit Nunaanni nunanilu issittoq pillugu ilisimatusarnermik suliaqarfiusuni Issittumi sumiiffinni assigiinngitsuni ilisimatusaatigalugu suliat, ilinniartitsinerit, ilisimasassarsiorluni angalanerit, suliffissat pisullu allat pillugit tamakkiinerusumik isigisaqarsinnaalerput. Tassa Isaaffik.gl-imi Issittumi sumi, kikkut, qanoq aamma piffissap qanoq ilinerani ilisimatusarnerat pillugu internetsimi quppernermut ataatsimut iserluni paasiniarneqarsinnaalerput”, Peter Schmidt Mikkelsen, Isaaffik.gl-imi ataqatigiissaarisutut atorfilik oqarpoq.
ISAAFFIK internettimi qupperneruvoq allanut attuumassuteqanngitsoq pisortatigoortorlu. Quppernermik immersuisuupput suliffeqarfiit ilisimatusarnermut attuumassutillit assigiinngitsut: Kalaallit Nunaanni Pinngortitaleriffik, Aarhusip Universitetia, Aalborgip Universitetia, Københavnip Universitetia, Syddansk Universitet Danmark, Danmarks Tekniske Universiteti, Danmarkimi Silasiorfik-Danmarks Meteorologiske Institutti, Geologiske Undersøgelser for Danmark og Grønland, Arktisk Kommando kiisalu Danmarkimi ilinniakkanut ingerlaqqiffiusunut ilisimatusarnermullu ministeriaqarfik. Isaaffik.org-ip qupperneranut akisussaasuullunilu aqutsisuuvoq Aarhusip Universitetiata Issittumik ilisimatusarnermut immikkoortortaa – Arctic Research Center. Suleqatigiit siunissami amerliartornissaat naatsorsuutigineqarpoq.
ISAAFFIK.org pillugu apeqqutissaqaruit siunnersuutissaqaruilluunniit ISAAFFIK-ip allattoqarfia attavigiuk uunga: info@isaaffik.org
Itinerusumik paasisaqarusunnermi attavissaq:
Peter Schmidt Mikkelsen, www.isaaffik.gl -imi ataqatigiissaarisoq, email: pemi@natur.gl, oqarasuaat: +4593508392
