Kalaallit Nunaanni soraarummeerusiornermini misigisaqarluartoq Saqqummersinneqarfia 04.09.2017
“Den arktiske forårsopblomstrings skæbne i havis og den underliggende vandsøjle”, ilinniartup Issittoq pillugu ilinniartitaanerit, “Arktisk semester”-imik taaguuteqartinneqartumi, peqataaqqammersup soraarummeerutiginiarlugu allaaserisamini taama atsersimasamini silaannaap, immap sikuata immallu sunniivigeqatigiittarnerinut tunngassuteqartut sammivai. . Biologinngorniarluni ilinniagaqartut ilaat taanna Pinngortitaleriffiup Aarhusillu Universititiata suleqatigiillutik aaqqissuussaanni “Arktisk semester”-imik taaguuserneqartumi peqataanerminut atatillugu Tunup Avannaarsuani Young Soundimi ilisimatusartartut misissuiartorneranni iluatsitsilluni suleqataasimavoq.
-“Young Soundimi uppernanngingajattumilluunniit peqataaninni Issittumi ilisimatusaqataaneq misilittagaqarfigilerpara. Issittumi ilisimatusarnernut misissuinissanullu piareersartarnernut tunngasunik ilikkagaqarluarpunga, minnerunngitsumillu Kalaallit Nunaanni ilisimatusarnerit assigiinngitsut pillugit paasisaqarluarlunga”, ilinniartoq Finlandimeersoq Annaliina Koskinen unnersiorpoq. Taassuma Arktisk semesterimi, Nuummi ingerlanneqartumi, Issittumi immap sikua pillugu ilinniarnermini Kalaallit Nunaanni kangerluit ilaanni silaannaap, immap sikuata immallu sunniivigeqatigiittarnerinut tunngassuteqartumik soraarummeerusiornissaq isumassarsiarivaa.
-“Allaaserisara assorsuaq nuannaara. Issittumi ilisimatusaateqarnissamut periarfissiilluarpoq”, Annaliina Koskinen oqarpoq.
Suliaminut atatillugu inernik suli pigisaqanngilaq, naammassippalli allaserisaminit inernerusut ilisimatuussutsikkut allaaserinnittarfinni saqqummiunnialersaarpai.”Angalanitsinni paasissutissanik katersaqarluarpugut, taakkua ukiap ingerlanerani suliaralugit aallartissavagut. Suliatta, immap sikuata Issittumi kangerluit ilaannut qanoq sunniuteqartarneranik ilumut paasissutissanik nutaanik takussutissiilluni saqqummiiffiusinnaanissaa pissangagalugu erinigisorujussuuvara”, Annaliina Koskinen oqarpoq.
“Kalaalit Nunaat nuannareqaara. Qaammatini tallimani najornerani nunap assigiinngisitaassusia takuara – avannaarsuani issittoq nipaatsorsuaq ajasoornartorlu kiisalu Nuuk inussiarnersunik inulik”.
Kalaallit Nunaata kitaata kujasinnerusortaani Nuup Tunullu avannaarsuani Young Soundip – imminnut ungasissorsuit – imartaanni uumassuseqassutsit ataqatigiinnermikkut assigiinngilluinnassusiat Annaliina Koskinenip aamma paasisaqarfigilluarsimavaa.
– Kalaallit Nunaanniinninni nutaanik ilikkagaqarlungalu misigisarpassuaqarpunga. Ullut tamavimmik oqaluttualiaannartulluunniit misinnarmata aallaqqaataanilli tiguartivippunga Kalaallillu Nunaaniinnera manna kingulliugunanngilluinnarpoq, Annaliina Koskinen naggasiivoq.
Arktiske semesteri pillugu annnertunerusumik paasisaqarusunnermi attavissat:
Thomas Juul-Pedersen (thpe@natur.gl), Lise Lotte Sørensen (lls@bios.au.dk) imal. Dorte S. Schrøder (doso@natur.gl).
