*Required
*Required
*Required
*Required
*Required
*Required
*Required
*Required
Send
Thank you for your application!
 

Kalaallit Nunaata amarua immikkuullarissoq Saqqummersinneqarfia 15.11.2018

Nunarsuup amaruinit immikkuullarinnerpaaq, qaqutigoornerpaaq ilisimatuussutsikkullu isigalugu ilisimaneqannginnerpaaq Kalaallit Nunaanni uumasuuvoq – Issittup amarua. Issittup amarua ilumut uumasoqatigiittut immikkoortutut isigineqarsinnaanersoq imalunniit Issittup ilaani allami amaroqatigiinnut arlaannut atasuunersoq ukiuni 100-likkaanik sivisunerusumik oqallisigineqarsimavoq. Maanna ilisimatusartartunit Pinngortitaleriffimmeersunit aammalu Københavnip Universitet-ianeersunit, Naturhistorisk Museum-imeersut, misissuereerlutik naqissuserpaat ilumut Issittup amarui pineqartut, naak ikitsunnguugaluarlutik, immikkoorlutik uumasoqatigiiullutik Umimmaat Nunaanni Kalaallit Nunaannilu uumasuusut.

”Maani immikkoortunik Issittup amaroqarpoq”, Mikkel Sinding Pinngortitaleriffimmi ilisimatusartartuusoq naqissusiivoq.

Taassuma Ameerikkap avannaaniit Kalaallit Nunaat tikillugu Issittup amaruisa kingornuttakkamikkut assigiinngissutaat paasisaqarfiginiarlugit misissuinerit ingerlassimavai. Tamanna ilisimatusartartup Mikkel Sindingip misissuinermini erseqqilluinnartumik paasivaa nunatani taakkunani pineqartuni amaqqut ilumut kingornuttakkamikkut immikkooruteqarnerat.

”Daneborgimi” Siriuspatruljekkut 2013-imi Issittup amarua qimmiminnik qimuttunik saassussimmat imminnut illersorniarlutik pisaraat. Amaroq una pisarineqarmat ilisimatusartartut misissugassaminnik katersiffigisimavaat, ullumikkullu Pinngortitaleriffimmi toqqortaatigineqarluni. Assiliisoq:Morten Petersen.

”Amerikkap avannaani tamarmi aammalu tamatuma issittoqarfiiniittut amaqqut kingornuttakkamikkut ilisarnaataat tamakkerlugit nalunaarsornikuuagut, taamaaliornitsigullu erseqqilluinnartumik kingornuttakkamikkut assigiinngissutaat takusinnaalerpagut. Taamaalillutalu nalorninngilluinnarluta oqarsinnaalerpugut Issittup amarua immikkooruteqarluinnartoq nassaassaammat”, Mikkel Sinding oqarpoq nangillunilu.

”Amaqqut pineqartut ikitsuinnaapput Umimmaat Nunaanni Kalaallit Nunaannilu avinngarusimaqalutik inuilaarsuarmi uumasuullutik”.

Amaqqunik misissuisimanerit pillugit ilisimatuussutsikkut allaaserisaq tamakkuninnga saqqummiussisarfimmit PLOS Genetics-imi saqqummiunneqaqqammerpoq.

Aajuna Issittup amaruata niaqua ” Krummelangsø” Statens Naturhistoriske Museumip Kalaallit Nunaannit katersaataani akuusoq. Taanna Kalaallit Nunanni Sirius Patruljekkunni sulisut ilaannit Johan Brusimit nassaarineqarsimavoq tatsip qallunaatut taaguuteqartinneqartup Krummelangsøp eqqaani, taassuma aamma kingornuttagaanut tunngassuteqartut ilisimatuussutsikkut misissuinermut allaaserisami pineqartumut tapertaasimapput. Assiliisoq: Johan Brus Mikkelsen.

Itinerusumik paasisaqarusunnermi attavigisassaq:

Pinngortitaleriffik aammalu Statens Naturhistoriske Museum, Københavnip Universitetia sinnerlugit ilisimatusartartoq, Ph.d., Mikkel Holger Strander Sinding, oqarasuaat +45 29 66 83 55 imaluunniit email: mhss@ghsdk.dk

Verified by ExactMetrics