Ilisimatusartartunngorniartumut kalaallimut millioniliisoqartoq Saqqummersinneqarfia 02.11.2018

Biolog Sascha Schiøtt Pinngortitaleriffimmeersoq ilisimatusartartunngorniarnissaminut 1,7 million koruuninik aningaasaliiffigineqarpoq, Ilulissat Kangerluani uumassuseqassutsip ataqatigiiffiinik misissuiniarpoq.

Aage V. Jensen Charity Foundation aningaasarpassuarnik taakkunannga tunniussisuuvoq, taamaalillunilu Sascha Schiøtt Århus Universitetimi Arktisk Forskningscenterimi, tassa issittoq pillugu ilisimatusarfimmi ph.d-ngorniarluni aallartittussanngorpoq. Saschalu nuannaangaarluni novembarip aallaqqaataani aallartinnissaminut akuersaarluni allatsissimavoq.

Sascha Schiøtt 2017-imi uumassusilerinermi kandidatinngorpoq, inaarutaasumik sammisani Ilulissat Kangerluanni natsernut qaleralinnullu tunngasoq Pinngortitalerinermik Ilisimatusarfittaami saqqummiullugu, allagartartaaramilu Pinngortitaleriffimmi atorfinilluni. PHD-ngorniarnermini Ilulissat Kangerluannut tunngasoq ingerlateqqittussaavaa, tassani uumassuseqassutsip ataqatigiiffiinik misissuissalluni. Professor Søren Rysgaard Århus Universitet-imi pingaarnertut siunnersortigissavaa, PInngortitaleriffimmiikkaangamilu ilisimasusartuuneq seniorforsker Aqqalu Rosing-Asvid siunnersortigisassallugu.

Suliamini Ilulissat Kangerluani ataqatigiissut pingaarnerit suunersut paasiniarlugillu misissuiffigissavai. Misissuinerit pingaarnersai kangerluup kujasissortaani ingerlanneqassapput ilaannikkullu avannaatungaani misissuisoqartassalluni. Natseq pingaarnertut misissorneqassaaq paasineqareersimammat natsiit tassaniitttu kangerluup iluaniiginnarnerusartut. Tamaalilluni ukiup ingerlanerani uumassuseqaqatigiinnut uumasut sorliit pingaaruteqartuunersut paasiniarneqarsinnaagami. Tamaani qalerallit aalisarneqartaqaat, taamaattumillu sumiiffimmi uumassuseqassutsip qaleraleqarneranut sunniutaasa qanoq pingaaruteqartiginera sammineqassallunittaaq.

Nunatta kitaani kangerlunni misissuinerit takutereerpaat kangerlunni sermip imaanut ataffeqarfiini qaleralinnik tunisisoqarnerusartoq. Aammattaaq Kalaallit Nunaanni, Canadami Svalbardtimilu misissuinerit takutereerpaat uumassuseqarnerusoqartartoq sermeq kangerlup imartaanut killissimagaangat, tassani pingaarnertut tulliitullu uumassuseqartitsineq pisarsimagami. Ilulissani Kangerluk nunatta kitaani sermit iigarnerpaaffigisartagaattut ilisimaneqareerpoq. Iluliarpassuaqarnerali pissutaalluni kangerlummi misissuinerit aamma ikittunnguupput. Taamaattumik kangerlummi uumasoqatigiiaat ataqatigiinnerannut tunngasut killilimmik ilisimaneqarput.

Sascha Schiøtt’p ph.d-ngorniarluni ilisimatusarnera ukiuni pingasuni ingerlanneqassaaq.

Annertunerusumik paasisaqarusukkussi attavigisinnaavarsi:

PHD-ngorniaq Sascha Schiøtt oqarasuaat. +45 21200501 imaluunniit mail: sasc@natur.gl.