Aalisartunik suleqateqarluarneq Saqqummersinneqarfia 01.10.2020
Pinngortitaleriffiup aalisartut suliffeqarfiillu aalisarnermik aallussisut assigiinngitsorpassuartigut suleqatigisarpai. Saattussanut tunngatillugu augustimi Royal Greenlandimit, Polar Seafoodimit, KNAPK-mit Pinngortitaleriffimmiillu peqataaffigineqartumik suleqatigiissitaliortoqarpoq. Nuuk-Paamiuni aamma Sisimiuni misiliummik saattuarniartoqarnissaq tamatumani suleqatigiissitap pilersaarusiorpaa, saattussanik aqitsunik qanoq peqartiginersoq paaserusunneqarmat.
Pilersaarusiornerit ingerlaneranni arlaleriarluni ataatsimiittoqarpoq aalisarfissatut pineqartuneersunit aalisartunik peqataasoqarluni, taakkua misiliinermik aalisartoqarnissaa pilersaarusioqataaffigaat, kikkut angallataat sumilu pisanit misissugassanik tigooqqaasoqassanersoq aalisartut aalajangeeqataaffigaat.
KNAPK-p pisortaata Tønnes ”Kaka” Berthelsenip suleqatigiissitaliap siunertaa nassuiarpaa, matumanilu ataatsimiinneq tassa misileraalluni saattuarniarnissamut tunngasuuvoq.
– Ataatsimiinnerup siunertaraa saattuarniarfiit ammaqqitsinnagit misiliilluni aalisarfigineqarnissaat, taava qulakkeerlugu saattussat qanoq nerpigissaartiginerat paasissagatsigu, KNAPK-p pisortaanera nassuiaavoq.
Ataatsimiinnerit kingunerisaannik maanna Nuummi Paamiunilu saattuarniarfissat ammaqqereerput, Sisimiulli inaarutaasumik naliliiffigineqarnissaa suli utaqqisaavoq.
Ilisimatusartartuutigaluni siunnersortaaneq AnnDorte Burmeister nassuiaavoq Sisimiut eqqaanni aalajangersimasunik 20-nik misiliiffissanik Pinngortitaleriffik toqqaasimasoq, taakkunanngaanniillu misissugassanik tigooraasoqassasoq saattussat aqitsut qanoq akulikitsigisumik pisarineqartarnersut paasiniarlugu. Pinngortitaleriffiup toqqagaasa qaavisigut aalisartut namminneq saattuarniarfigisassaqqitsitaminni misiliiffigisassat amerlaqataannik toqqaasussanngortinneqarput. Nuuk-Paamiunut tunngatillugu sumi misiliummik saattuarniartoqassanersoq aalisartut nammineerlutik aalajangiiffigaat.
Tønnes ”Kaka” Berthelsenip, KNAPK-mi pisortaanerusup naafferartumik ataatsimeeqatigiittarneq iluarisimaarpaa.
– Matumani saattussat pillugit taamatut suleriaaseqartoqarnera pitsaageqaarput, tassa illua-tungeriilluta – taamatut oqarsinnaagaanni – pisuussutitta erligisatta atorluarnissaat siunertarigatsigu. Ataatsimooqatigiilluni oqaloqatigiinneq sumiluunniit pitsaaqutaasarami, Tønnes ”Kaka” Berthelsen oqarpoq.
