Inuusuttut uumassusillillu assigiinngissitaarnerat Saqqummersinneqarfia 23.09.2020
Suliffeqarnermut, Ilisimatusarnermut Avatangiisinullu Naalakkersuisoq Jess Svane inuusuttunik uumassusillit assigiinngissitaarnerinut tunngasunik illersuisunik peqateqarluni marlunngormat 22. september 2020 uumassusillit assigiinngissitaarnerat pillugu suleqatigiisitsivoq. Inuusuttut 30-t missaannik amerlassusillit 15-30-nik ukiullit aaqqissuussamut peqataapput. Pinngortitaleriffimmi ilisimatusartartut aaqqissuussamut qaaqqusaapput. Taamaalillutik Josephine Nymand aammalu Aili Lage Labansen Kalaallit Nunaanni uumassusillit assigiinngissitaarnerat pillugu saqqummiussaqarput.
Uumassusillit assigiinngissitaarnerat imartoorujussuuvoq taamaattumillu naatsorsoruminaallunilu uuttortaruminaallunilu ilusileruminaattarluni. Josephine Nymandip erseqqissaatigaa uumassusillit assigiinngissitaarneri uumasut, naasut, pupiit, bakteeriallu uumaneqartitserujussuartarput, taamaalillutillu uumassusillit assigiinngissitaarnerujussuannik pilersitsisarlutik uumasullu assigiinngitsut uumaannarnissaannut sunniuteqarnerpaajusarlutik, uumassusillilli assigiinngissitaarnerat aamma uumasut uumaffiinut, peqassutsit amerlassusaannut aammalu uumasut imminnut sunniuteqaqatigiittarnerannut avatangiisaannullu attuumassuteqarpoq, soorlu sumiiffimmi silap pissusaanut, tatsit akornganni kooqarnernut assigisaannullu. Aili Lage Labansenip oqalugiarnermini appanut tunngasut assersuuteqarfigai.
Tamatuma kingorna inuusuttut eqimattanut tallimanut agguaapput tamarmillu politikerimik ataatsimik peqateqalerlutik, tassani biologit apeqqutinut akisinnaaniarlutik najuutiinnarput. Eqimattanilu inuusuttut sammisaat assigiinngitsut sisamaapput (Imaq, Suna annaasinnaavarput pissarsiaraluguluunniit, Nuna kiisalu Kalaallit Nunaata nunanut allanut attuumassuteqarnera).
-Inuusuttut oqallisillaqqissorujussuupput eqimattanilu sulinerminni annerusumik apeqqutissaqaratik, Aili Lage Labansen nassuiaavoq.
Unnuk naggaserlugu inuusuttut eqimattani eqqartorneqartut pingaarnersiorlugit saqqummiussiffigaat tamatumalu kingorna politikerit tallimat inuusuttullu akornganni oqallittoqarpoq.
Uumassusillit assigiinngissitaarnerat pillugit aaqqissuussaq inuusuttunut tunngasuusoq Nunat Avannarliit suleqatigiillutik suliaat, inuusuttut peqataatillugit eqqartuisitsisoqarami uumassusillit assigiinngissitaarnerat pillugit nunarsuaq tamakkerlugu anguniagassanik peqalerniassagatta. Uumassusillit assigiinngissitaarnerat pillugu inuusuttunut taamatut aaqqissuussinerit Danmark-imi, Sverigemi, Finlandimi, Islandimi Savalimmiunilu ingerlatsisoqareerpoq. Aaqqissuussami pissarsiarineqartut Inuusuttut Avannaamioqatigiit Københavnimi ataatsimeersuarnissaanni atugassaapput, ataatsimoorussamillu innersuussuteqarnissamut ilanngunneqartussaallutik. Innersuussutit tamakkiisut Kina-mi COP15-ataatsimeersuartitsinermi Uumassusillit Assigiinngissitaartuunerat pillugu Isumaqatigissusiornissamut atugassatut isumaqatiginninniutaasussaapput.
Uumassusillit Assigiinngissitaarnerat pillugu aqqissueqatigiipput Iluuna Sørensen, Kira Lennert Olsen aammalu Nuiana Hardenberg.
Uumassusillit assigiinngissitaarnerat pillugu Josephine Nymand tamatigoortumik imartuumillu saqqummiussaqarpoq. Assiliisoq: Mie Winding
Aili Lage Labansen, appat assersuutigalugit tigussaasumik assersuuteqarluni oqalugiarpoq. Assiliisoq Mie Winding
Eqimattat sisamat tamarmik assigiinngitsunik eqqartuisinneqarput tamarmillu politikerimik ataatsimik peqateqarlutik. Assiliisoq Aili Lage Labansen
Eqimattani eqqartuisoqareermat inuusuttut eqqartorneqartut pillugit saqqummiussipput. Assiliisoq Aili Lage Labansen
Eqqartuineq naggaserlugu politikerit inuusuttullu oqalliseqatigiipput saamerlermiit peqataasut tassaapput Simigaq Heilmann (D), Jess Svane (S), Sofia Geisler (IA), Tillie Martinussen (Samarb), kiisalu Aqqalu Jeremiassen (A).
