*Required
*Required
*Required
*Required
*Required
*Required
*Required
*Required
Send
Thank you for your application!
 

Kalaaleq issittumi ilisimatusartartut ataatsimiitsitaliaanni ilaasortanngortoq

Sascha Schiøtt, ph.d-mik suliaqartoq, nunat tamalaat issittumi ilisimatusarnermi ataatsimiitsitaliaanni naggueqatigiit inuit ilisimatusartartuisut marluk toqqagaasut aapparaat.

Sascha Schiøtt IASC-mit (International Arctic Science Committee), “Indigenous fellow”-itut, tassa nunap inoqqaavisa ilaattut ilisimatusarnermi suleqatissatut, toqqagaaqqammerpoq, taamaalilluni ataatsimiitsitaliami, nunat issittumi ilisimatusarnermik suliallit tamarmik suleqatigiinnissaannik kaammattuisumik siuarsaasumillu, suleqataasussanngorpoq.

Saschap, ataatsimiitsitaliap aalajangiinerinut annerusumik sunniuteqarsinnaanngorluni, ”Indigenous Fellow”-itut toqqagaanini iluarisimaarpaa.

– IASC-p nunat issittut akornanni suleqatigiilluarnerunissaq, taavalu nunat inoqqaavisa ilisimasaat ilisimatusartartut misissueriaasianut annertunerusumik atorneqarnissaat anguniagaannut ilaapput, taamaattumillu Kalaallit Nunaannit ilisimasat atorneqarnerunissaat siuarsaaqataaffiginiassavara, tassuunalu sunniuteqarnerulernissaq anguniarlugu, Sascha oqaluttuarpoq, ”indigenous fellow”-inngornerminullu atatillugu ataatsimiinernut assigiingitsunut peqataanissaminut periarfissat ammassassut naatsorsuutigaa.

Sascha Schiøtt IASC-imi suleqatigiissitami, Marine Working Group-imiippoq, tassaasut imaani pissutsinut attuumassutilinnut ilisimatusartartut. Issittullu imartaani uumassusillit ataqatigiiffiinut tunngassuteqartut immikkut ilisimasaqarfigai.

– Suleqatigiinissamut periarfissaqarpugut, ilisimasanik immersoqatigiinnissatsinnut, misissuinissamullu periarfissanik isummersoqatigiisinnaassalluta, Sascha oqaluttuarpoq, namminerlu ukiut pingasut matuma siorna biologinngorpoq, kingornatigullu Pinngortitaleriffimmi sulisersimalluni.

IASC naalagaaffinnut attuumassuteqanngitsumik peqatigiiffiuvoq, ph.d.-liortullu imaluunniit ph.d.-liaminnik naammassinnereersimasut, nunanit IASC-mut ilaasortaneersut, ilisimatusartartut qinnuteqarsinnaapput. Toqqagaasinnaanermullu piumasaqaataavoq peqatigiiffiup suleqatigiissitaasa sammisarisaannik ilisimatusaammik suliaqartuunissaq.

Maannakkut Saschap ph.d.-liani, Ilulissat Kangerluanni pinngortitap ataqatigiinneranut tunngasoq, suliarivaa. Suliamilu qiteqqunnerani misilitsinnermini Århusip Universitetiani anguseqqammerpoq, tassanngaanneersullu Saschap killiffia, saqqummiinera maannakkumullu misissuinermini suliai iluarisimaarpaat. Ph.d.-liaminik naammassinninnikkiartuaarnera qularineqanngilluinnarpoq.

”Indigenous Fellow”-itut toqqagaasuni marluusuni, aappaa tassaavoq naggueqaterput Enooyaq Sudlovenick Nunavumeersoq.