Misiliummik saattuarniaqqinneq Saqqummersinneqarfia 02.10.2020
Saattussat aqitsut paasisaqarfiginiarlugit misileraalluni saattuarniarnissap pilersaarutigineqarnerani Pinngortitaleriffimmiit, Royal Greenlandimiit, KNAPK-miit Polar Seafoodimiilt, Sisimiuneersullu aalisartut peqatigalugit ataatsimiinnerit ingerlanneqaqqipput. Aalisartut Royal Greenlandillu aalisakkeriviani Sisimiuni sulisut elektroniskimik videokkoorlutik toqqaannartumik peqataatinneqarput.
Aalisartut tallimat Royal Greenlandimeersullu pingasut pilersaarutinut aalajangeeqataatinniarlugit Sisimiuniit peqataatinneqaramik. Ilisimatusartartuullunilu siunnersortaaneq AnnDorte Burmeister Pinngortitaleriffimmiit sumi misileraalluni saattuarniartoqassanersoq pillugu immap assinga atorlugu takutitsivoq. Misileraaffissat sinneri sumiissanersut qaqugulu saattuuarniarluni misileraasoqassanersoq pillugit aalisartut Sisimiuneersut aalajangeeqataanissaminnut periarfissaqartitaapput.
-
- Saattussat qaleruaminni 50 aamma 75%-imit nerpikinnerusut pitsaannginnerusarput. Saattussat aqitsut tunisassiassaqqitsinneqarneq-ajorput imertaqarpallaarlutillu nerpikippallaartaqimmata. Ass.: Royal Greenland.
-
- Saattussat qaleruaminni 75% sinnerlugu nerpillit pitsaasuupput. Qaammatit 18-it tikillugit qaleruataatik nerpiminnik ulikkaariartoqqittarpaat. Ass.: Royal Greenland.
Misileraaneq angallammik saattuarniummik Sisimiuneersumik naammassineqarpoq. Saattuarniutip inuttareriigai ilanngullugit immikkut ilisimatusartoq Pinngortitaleriffimmeersoq SFG-meersorlu kiisalu nakkutilliisoq KANUAANA-meersoq ilaapput. Misileraalluni saattuarniarnermi ingerlariaasissat malinneqarnersut taakkua nakkutigissassaraat, saattussanillu uuttortaajutigalutik qaleruisa manngissusaat naliliiffigisarlugit.
– Saattuarniarfinnik ammaasarneq matusisarnerlu aalisarnermik aallussisut kissaataat ileqqutoqqallu malillugit siornatigut isumagineqartarsimapput. Maannakkulli ammaatinnata saattussat qanoq-innersut pingajulerluta takuniaqqaarparput. Tassa imaappoq aalisartut aalisakkanillu tunisassiortut – aalisakkanik aningaasarsiutillit – saattussat naliliiffigineqarnerat kisimik sunniuteqarfigissanngilaat, taamaalilluni iluanaarniarnerunissaq salliunnagu naliliinerulluni, Sten Sørensen Royal Greenlandimi saarullinnik saattussanillu aqutsinermi ingerlatsisoq taamak nassuiaavoq.
– Suleqatigiinnissaq pingaaruteqartuaannarpoq. Assigiimmimmi unammilligaqaratta, taamaammat pineqartoq pillugu isummat allat tusassallugit iluaqutaallunilu pissarsiaqarnartuaannarpoq. Piujuartitsinissaq eqqarsaatigalugu inuussutissarsiutigalugu aalisartoqarsinnaanissaa anguniagaavoq, aqagu siunissamilu aggersumi saattuarniartuarsinnaaniassagatta, Sten Sørensen oqarpoq.
Sisimiut eqqaani saattuarniarnissaq oktobarip aappaaniit Namminersorlutik Oqartussanit ammaanneqaqqippoq, pisassiissutit sinneruttut 218 tonsiusut pisarineqareersimanissaata tungaanut. Uani annerusumik atuarit Naalakkersuisut.gl
