*Required
*Required
*Required
*Required
*Required
*Required
*Required
*Required
Send
Thank you for your application!
 

Nuup Kangerluani silap pissusianik ilisimatusarnermut tunngasoq atuagaq nutaaq

Nunarsuup Issittortaani sumiluunniit allamik kangerloqanngilaq Nuup Kangerluatulli ilisimatusarfigineqarsimatigisumik, maannamummi paasissutissarpassuit ataqatigiissut amerlasoorujussuit katersorsimaneqalerput. Pinngortitaleriffiup ataani Silap Pissusianik Ilisimatusarfiup ukiuni atuuffimmini angusarisimasaanut tunngassuteqartut atuartussanut tamanut paasiuminarsarlugit atuaganngorlugu ullumi saqqummiunneqarpoq: Nuup Kangerlua – Issittumi kangerlummik misissuineq.

Silap Pissusianik Ilisimatusarfiup ilisimatusarnikkut suliaanut tunngasut ullumikkumiit Nuummi atuarneqarsinnaalerlutik paasisaqarfigineqarsinnaalerput. Atuakkap nutaap ateqartup ”Nuup Kangerlua issittumi kangerlummik misissuineq” saqqummiunneqarneranut atatillugu Silap Pissusianik Ilisimatusarfeqarfimmi tamatumalu atuussimanerata ukiunik qulinngortorsiorneqarsimanera ilanngullugu nalliuttorsiualaarneqarput.

”Atuakkap ilisimatusartarnerit uummaarissisippaalusooq, atuartorlu soorluli ilisimatusaqataalluni misissueqataaginnakasillartoq. Atuagaq piviusunngormat nuannaarutigeqaarput.”, taama oqarpoq Silap Pissusianik Ilisimatusarfimmi pisortaagallartoq Mie H.S. Winding.

Atuakkamik tunuliaqutsiisuupput ilisimatusartartut, imarisaanummi Nuup eqqaani kangerlunnut tunngassuteqartumi ilisimasaminnik asserpassuarnillumi immersueqataasimapput.

Silap Pissusianik Ilisimatusarfeqarfimmeersut Nuup Kangerluanut tunngassuteqartunik siunnerfiliisumik ilisimatusarnernit paasissutissanik amerlasuupilussuarnik ukiuni qulini kingullerni katersuillutillu suliaqarsimapput. Paasissutissat tamakkua ilisimasanik nutaanik tunniussaqarsimapput, pingaartumik Nuup Kangerluani uumassuseqassutsit ataqatigiiffiinut paasiuminaassinnaasartunut tunngassuteqartut nutaarpassuarnik paasisaqarfigineqarlutik. Taamaalilluni Nuup Kangerlua Nunarsuup Issittortaani kangerluit ilisimatuussutsikkut paasisaqarfigineqarnerpaajusimasutut oqaatigineqarsinnaalerluni.

Silap Pissusianik Ilisimatusarfimmi pisortaagallartoq Mie H.S. Winding oqalugiarpoq. Ass.: Pinngortitaleriffik.

Atuagaq kikkunnut tamanut saaffiginnittoq

Atuakkami kangerluup pineqartup ilisimatusarfigineqartarnerani angusarineqartartut pingaarnerit uummaarissumik assitaqarluartumillu oqaluttuarineqarput. Nuup Kangerluani uumassusillit ataqatigiiffiini uumassuseqarnerit ersinngitsut taqqamanilu uumassuseqarnermut toqqammaviliisuusut, sermersuup kangerluup imartaani aalisagaqarluarneranut aalajangiisuunera, ukiup imaata sikuata gassimik kuldioxidimik nutserisuusarnera, saarullippassuaqarnera, arferit immallu naqqani uumassuseqarneq ikittuinnaat takorloorsinnaasaat – qulequttat arlalippaalunnguit atuakkami tikinneqarput. Kapitalitai immikkoortitaarlugit atuarneqarsinnaapput, atuagarli tamakkerlugu atuaraanni Nuup kangerluppassuisa ilaanni uumassuseqarneq immallu pissusaanut tunngasunik ataqatigiissumik paasinnittoqarsinnaassaaq.

Atuartussaq soorlulusooq ilisimatusarniarluni misissuisarnernut ilaserineqartoq, taamaalillunilu paasisanik nutaanik ilisimatusartartullu periuserisartagaannik paasisaqarnissamik ammaanneqarluni. Ilisimatusarnerni angusanut ullutsinni ilisimasatut soqutigisanut arlaannaannulluunniit attuumassuteqanngitsutut isigineqartunut suut tunuliaqutaasarpat? Misissuisarfinni sulerisarpat? Asimut misissuiartoraangamik qanoq iliortarpat?

Nuup aqquserngini – Nunarsuullumi sinneranut

Atuakkiakkut anguniagaavoq kimulluunniit atuartussamut issittup pinngortitaanut soqutiginnittumut Nuup Kangerluani pissutsinik assigiinngitsunik tamakkualu ataqatigiiffisa qanoq soorli taamaannerinut tunngassuteqartunik itinerusumik paasisaqartitsinissaq. Atuagaq kalaallisut, qallunaatut tuluttullu saqqummersinneqarpoq, Nuummilu Atuagkani, Brugsenimi Nunattalu Katersugaasiviani pisiarineqarsinnaassaaq. Kiisalu Qallunaat Nunaanni atuagaarniarfinni ikittuinnarni nittartakkakkullu pisiarineqarsinnaassaaq.

Atuakkakkut neriuutigineqartoq tassaavoq Kalaallit Nunaanni uumassuseqassutsit ataqatigiiffiinik tamanik ilisimasaqarnissaq sooq taama pingaaruteqartigisoq, immaqalumi aamma siunissami ilisimatusartartunngorusutsitsilersinnaassasoq.

Atuakkamik saqqummersitsisut, Signe Høgslund uumasorsiuutut ilisimatusartartuuvoq, Peter Bondo Christensenilu uumasorsiuujullunilu tusagassiortuulluni. Ass.: Pinngortitaleriffik.

Itinerusumik paasisaqarusunnermi attavissaq:

Silap Pissusianik Ilisimatusarfimmi pisortaagallartoq Mie H.S. Winding, oqarasuaat 361200 imal. mail: miwi@natur.gl